မဟာပညာ

။အရွယ်ငယ်
ပိန်ညောင်ကိုင်း
ခါးကုန်းကိုင်း
ထူထိုင်းထိုင်းပါ။

။အူရိုင်းရိုင်း
မူကိုင်းကိုင်းလို့
ရိုင်းပျတတ်ပါ။

။ အထင်သေး
အမြင်သေးကြ
ခွေးကလေး
အနှိုင်းခံရ
ဝမ်းနည်းတတ်ပါ။

။ စော်ကားသူ
အများက
နည်းပေါင်းစုံ
ဆဲဆိုကြလည်း
​မတုံ့ပြန်ပါ။

။ သည်းခံခြင်း
ချစ်မေတ္တာ
ရင်လွှာဝယ်အမြဲထား
ဘုရားသာသနာတွက်မို့
အမျိုးသားဘာသာတွက်မို့
အသက်ငယ်
အကိုင်းလေး
အရိုင်းလေး
ရိုင်းပျပါတယ်
ခုတော့ ……..။

အဲးခိုး
(၁၈.၃.၂၀၂၂) ရက်နေ့နံနက်။)

။ အသက်ရခြင်းအတူတူ ချမ်းသာခြင်းမတူနိုင်ပါ။
။ အသိရှိခြင်းအတူတူ အသိဉာဏ်ရခြင်းမတူနိုင်ပါ။
။ ပညာတတ်ခြင်းအတူတူ ပညာရခြင်းမတူနိုင်ပါ။
။ လာဘ်ရခြင်းအတူတူ လာဘ်ရမှုမတူနိုင်ပါ။
။ ချမ်းသာခြင်းအတူတူ ခြင်းသာရခြင်းမတူနိုင်ပါ။
။ မေတ္တာရခြင်းအတူတူ မေတ္တာခံယူခြင်းမတူနိုင်ပါ။
။ လှပခြင်းအတူတူ လှနေခြင်းမတူနိုင်ပါ။
။ မြတ်နိုးမှုအတူတူ မြတ်နိုးခြင်းမတူနိုင်ပါ။
။ ငြိမ်းချမ်းခြင်းအတူတူ ငြိမ်းအေးမှုမတူညီနိုင်ပါ။
။ သည်နေ့ အခက်အခဲခြင်းအတူတူ ခံစားရခြင်းမတူညီနိုင်ပါဆိုတဲ့တရားကို ဆင်ခြင်အောက်မေ့ပြီး နှလုံးသွင်းတတ်ပါစေ။

တောင်ကလေးဆရာတော်
(၁၈.၃.၂၀၂၂) ရက်နေ့နံနက်။)

။ သည်လောကမှာ
လူမှုဆက်ဆံရေး
လူအဖွဲ့အစည်း
မိဘနှင့်သားသမီး
ကျေးဇူးပေး
ကျေးဇူးခံ
အပြန်အလှန်
အဆက်အစပ်
မပြတ်မလပ်
ချစ်မြတ်နိုးကြ
ဦးထားရိုသေရှိနေကြ။

။ ရှည်လျားစွာလူ့သမိုင်း
မိဘကိုမိဘအရာ
လေးစားဝတ်ပြုလုပ်ကျွေးကြ
လူမျိုးတိုင်း
ဘာသာတိုင်း
လက်ခံထားသော
လူ့ကျင့်ဝတ်ပါ။

။ သို့သော်ငြားလည်း
မိဘကို
မိဘလိုအသိအမှတ်ပြုသော
လူ့အဖွဲ့အစည်းရှိကြသလို
အသိအမှတ် မပြုသော
လူ့အဖွဲ့အစည်းတွေလည်း ရှိကြလေရဲ့။

။ ဘဝတူလူတစ်ယောက်လိုသာ
သဘောထားသေးသိမ်ကြသည့်
လူတွေလည်း အရှိအရှိပါပဲလေ။

။ သေရေးရှင်ရေး
ကြုံလာသည့်အခါ
မိဘကိုသာတမ်းတကြတာ
ဓမ္မတာပဲမို့
မိဘကိုပိုသတိရကြနေမှာပါ။

။ အားမငယ်စေရ
အားတက်ဖွယ်ရာ
အားပေးသူမှာ မိဘတွေပါပဲ။

။ မိဘကို
မိဘလိုအသိအမှတ်ပြု
မိဘလိုဆက်ဆံ
ထိုက်တန်အောင်အရေးပေးဖို့
ငါတို့တွေ့
မေ့များမေ့နေကြပြီလား။

။ ဖဝါး လက်တစ်လုံး
ဖခုံး လက်လေးသစ်
ချစ်ခြင်းများစွာ
ကြင်နာယုယလာခဲ့ရသော
မိဘနှစ်ပါးကို
ဘယ်သူမေ့မေ့
ငါမမေ့ဘူး
အမှုမဲ့မဲ့
အမှတ်မဲ့မဲ့
မှုမှုမဲ့မဲ့ငါမနေဘူး
ကျေကျေနပ်နပ်
ကျေးဇူးဆပ်ရ
မြတ်မိဘကို
သည်နေ့
သခင်အရာ
ဂုဏ်ရည်အရာ
ထူးဂုဏ်အရာ
ဦးညွှတ်ခါခါ
ကန်တော့ပါသည်
ဖခင်ရှိရာသိပါစေ။

(ကျေးဇူးရှင် ဖခမည်းတော်မြတ် သခင်အောင်ခင်သို့ ဦးညွှတ်ရိုသေလျက်။)
တောင်ကလေးဆရာတော်
(၁၆.၃.၂၀၂၂) ရက်၊ တပေါင်းလပြည့်နေ့= ဖခင်များနေ့။)

။ စိတ်ကို ကြည်ကြည်လင်လင်ထားမယ်။
။ အားလုံးအပေါ်ကို မေတ္တာထားမယ်။
။ ကိုယ်နှင့်အတူ စာနာမှုထားမယ်။
။ သတ္တဝါများကို ကြင်နာသနားမယ်။
။ လူတိုင်းအပေါ်ကို နားလည်မှုထားမယ်။
။ ဆင်းရဲရောက်သူကို ကူညီမှုပြုမယ်။
။ လမ်းမှားသူကို စောင့်ကြပ်ကူညီမယ်။
။ လမ်းမှန်ရောက်အောင် ဓမ္မဖြင့်ကူညီပံ့ပိုးပေးမယ်။
။ လူတိုင်းအပေါ်ကို နူးညံ့သိမ်မွေ့စွာဆက်ဆံမယ်။
။ သည်နေ့ အကျိုးမဲ့မှုအားလုံးကို ရှောင်ရှားမယ်လို့ပဲ နှလုံးသွင်းလိုက်ပါ။
တောင်ကလေးဆရာတော်
(၁၅.၃.၂၀၂၂) ရက်နေ့နံနက်။

။ ခေတ်ဆန်ကို မလိုက်ပါ။
။ ခေတ်သစ်ကို မလိုချင်ပါ။
။ ခေတ်မီလည်း မနှစ်သက်ပါ။
။ ခေတ်နှင့်အတူသာ နှလုံးသွင်းမည်။
။ အပျက်ပဲပြောပြော မပျက်အောင်နေမည်။
။ အဖျက်ပဲလုပ်လုပ် မရှုပ်အောင်နေမည်။
။ အဆွယ်ပဲပြုပြု ငြိမ်ငြိမ်ပဲနေမည်။
။ အကြမ်းပဲဖက်ဖက် အေးအေးစက်နေမည်။
။ သည်အသက်သည်ခန္ဓာ ဘာဝနာဉာဏ်နှင့်သာနေမည်။
။ သည်ဘဝဖြင့်သာ အဖြေရှာမည်။
။ သည်နေ့အတွက် အပြစ်မရှိအောင်သာနေမည်။
တောင်ကလေးဆရာတော်
(၁၄.၃.၂၀၂၂) ရက်နေ့နံနက်။

အများနဲ့ဆက်ဆံ

။ဒီနေ့ နေအလွန်ပူပါတယ်။ နေထက်ပိုပူကြတဲ့သူတွေက ကျောင်းကိုစုတိုးပြီးရောက်လာကြတယ်။ အိုမီခရွှန်ရောဂါဝေဒနာကလည်း ခုချိန်ထိ ခံစားနေကြရဆဲဖြစ်လို့ ရောက်လာကြတဲ့ဒါယကာတွေနဲ့ မဆက်ဆံမိကြပြန်တော့လည်း အမြင်မရှင်းကြသူတွေကလည်း အရှိရှိဖြစ်နေတော့ အများတကာနဲ့ဆက်ဆံနေရတဲ့ဒုက္ခက အတော်လေးကို သိသွားပါပြီ။

အသက်အရွယ်

။ အရှင်ဟာ အသက်မငယ်တော့ပါဘူး။ ၆၀ ကျော် ၇၀ နီးပါရှိနေပါပြီ။ ယနေ့ယခုအချိန်ထိ ကိုယ်စိတ်လေး အေးအေးချမ်းချမ်းမနေရသေးဘဲ လူအများတွေနဲ့ပဲ ဆက်ဆံနေထိုင်သွားလာရပါသေးတယ်။ လူတယောက်ဟာ အသက် ၆၀ ပြည့်ကျော်လာရင် ကိုယ့်စိတ်နဲ့ကိုယ် လွတ်လပ်စွာနေရတော့မယ်မဟုတ်လား။

တန်ဖိုးထားမှု

။ သက်တမ်းကာလတစ်လျှောက်လုံးမှာ အပြည့်အဝနားရတယ်ဆိုတာ မရှိဘဲ အမုန်းပွားကြသူတွေကြားမှာပဲ အထင်သေးခံရ၊အမြင်သေးခံကြလို့နဲ့ ကိုယ့်ကိုယ်ကို တန်ဖိုးကျသူတစ်ယောက်လို ခံစားနေကြရသလားပါပဲ။

လူမှုကမ္ဘာ

။ မိမိအကြောင်းကို စုံစေ့အောင်မသိကြဘဲ အပြစ်တင်ကြမှု၊ရှုတ်ချကြမှု၊စော်ကားမိုက်မဲကြမှုတွေကလည်း အစုံအစုံအောင်ပါပဲ။ အရှင်တို့နေထိုင်ရာ လူမှုကမ္ဘာတွေဟာ ခုတိုင်းလိုပဲ ကဲ့ရဲ့ပစ်တင်ရှုတ်ချနေကြတာနဲ့ အလုပ်ပြီးနေကြတယ်လို့ ထင်မိကြတာလားပါပဲ။

အတင်း

။ အချို့သောလူတွေက သူတစ်ပါးကို ကဲ့ရဲ့ပစ်တင်ရှုတ်ချရမှ အားရကျေနပ်တတ်တယ်။ သူတစ်ပါးအကြောင်းကို မကောင်းကြောင်းသာပြောရရင် တစ်နေကုန်ခံပြီးပြောဆိုနိုင်တာရှိလို့ပဲလား ၊ သည်နေ့ အတင်းပြောကြတဲ့ခေတ်ကြီးလိုဖြစ်နေတယ်။

ဖြစ်နေကြရပါသလဲ

။ ကုန်ကုန်ပြောရရင် လူတွေဟာ ကိုယ့်အလုပ်ကို ဘာလို့တန်ဖိုးမထားကြသလဲ။ ကိုယ့်ကိုယ်ကို ဘာလိုများမဝေဖန်ပါသလဲ။ သူတစ်ပါးကို ကဲ့ရဲ့ပြစ်တင်ရှုတ်ချနေကြရမှဝမ်းသာအားရကျေနပ်ကြရတဲ့အဖြစ်မျိုးတွေဟာ ဘာလို့များ နေကြရပါလဲဆိုတဲ့အဖြစ်မျိုးတွေ ဖြစ်ကြရပါသလဲ?။

အရသာ

။ ဒီနေ့တော့ နေကအရမ်းပူတယ်။ နားချိန်မှာ မနားရ။ မသိတတ်ကြတဲ့သူတွေက ရစ်လုံးတင်လို့ မမြင်ချင်မကြားချင်စရာတွေ မြင်ရကြားရလို့ စိတ်ထဲမှာ ဒေါမနဿဖြစ်မိပါလေရဲ့။ ဒါပေမဲ့ ဒီလိုဖြစ်တာကို ဒါယကာတွေမသိအောင် အကြိမ်များစွာနေခဲ့ရတာကြာနေပါပြီ။ သည်းခံခြင်းရဲ့ အရသာပါ။

တောမှီရဟန်း
(၁၃.၃.၂၀၂၂) ရက်နေ့။

၁) သု – သုနေယျ = နာကြားရာ၏။
၂) စိ – စိန္တေယျ = ကြံစည်ရာ၏။
၃) ပု – ပုစ္ဆေယျ = မေးမြန်းရာ၏။
၄) ဘာ – ဘာသေယျ = ပြောဆိုရာ၏။
၅) ဝိ – ဝိစာရေယျ = စူးစမ်းဆင်ခြင်ရာ၏။
၆) လိ – လိက္ခေယျ = ရေးသားရာ၏။
၇ ) သိ – သိက္ခေယျ = သင်ယူရာ၏။
၈ ) ဓါ – ဓါရေယျ = ဆောင်ထားရာ၏။

။ သုစိပုဘာ ၊ ဝိလိသိဓာ
အက္ခရာစွဲသုံး ၊ ဤရှစ်လုံးကို
သီကုံးပန်းသွင် နေ့တိုင်းဆင်လော့။

။ စာသင်ပျိုနု ၊ အခြေပြုတို့
ဥဇုဘူတ ၊ လုံ့လပြင်းစွာ
သူ့ထက်ငါဟု ၊ နှုတ်မှာရွရွ
ကြိုးပမ်းကလျှင်၊သိပ္ပကျေးဇူး
အထူးသိမြင်၊ ပညာရှင်ဟု
မထင် မပေါ် ၊ မကျော်စောဘဲ
တီမှာလွဲအံ့​၊အရဲကြိုးကုတ်
ကြက်ရဲသုတ်သို့၊အားထုတ်ခုံမင်
မသင်မအံ ၊ မကြံမမေး
ဆွေးနွေးရောနှော၊ဟောပြောမဲ့ထွေ
ပေချပ်ရေဖြင့် ၊ ကုန်စေဆန်းသာ
သင်ချေပါလည်း၊
ဘယ်မှာဂုဏ်ရှင်၊ကျော်စောထင်လိမ့်။

။ စာသင်ဟူက၊ကျမ်းထိုမျှကို
တွေ့ကမရှောင်၊ကြောင်ပုစွန်စား
ကြွပ်ကြွပ်ဝါးသို့၊လွှသွားပမာ
ကျောက်ထက်စာသို့၊လိုရာရအောင်
ကြံဆောင်လေ့ကျက်၊အနက် အဓိပ္ပာယ်
နှုတ်ဝယ်ရွရွ ၊ ထားချေမှတည့်
တစ်စပေါ်လျှင် ၊ ချည်စငင်သို့
သဘင်ပွဲမှောက် ၊ ဆိုရေးရောက်က
လန့်ကြောက်မရှိ ၊ သတိမြဲခိုင်
ကျောက်တိုင်ပမာ၊ကေသရာသို့
ရွံ့ရှာမဲ့လျှင်၊ဆိုခင်းနည်းနာ
အဖြာဖြာကို၊မကြာနှုတ်လျှောက်
ခန့်ချင့်ထောက်လော့၊အံ့လောက်ဖွယ်သာ
ဂါထာပါဌ်သား၊စကားဝိုက်လည်
စဉ်ရှည်ရှေးတီး ၊ စကားကြီးက
စသည်ထိုထို ၊ ဝိဂြိုဟ်ဝစနတ်
ဓာတ်ရပစ္စည်း၊ထုံးနည်းပမာ
ဂါထာဆန်းဂိုဏ်း ၊ကရိုဏ်းဌာန်စစ်
ဖွင့်လှစ်ဋီကာ ၊ အဋ္ဌကထာပါဠိ
အောက်ထက်ညှိ၍၊ကဝိလက္ခဏာ
အဖြာဖြာကို၊သေချာဆည်းဆ
ဆိုဝံ့ကလျှင်၊ဘဝဤတွင်
ခုမျက်မြင်လည်း၊မထင်ဘယ်မှာ
ရှိဘိရာအံ့၊သံသရာလည်း
ပမာကဲလွန်၊အဆုံးစွန်မူ
ညီမွန်တုလွတ်၊သုံးလူ့နတ်ဝယ်
အကျွတ်ဘယ်မှာ ဝေးတော့မည်။

<><><><><><><><><><><><><><>
ရှင်မဟာရဋ္ဌသာရ
(ဆုံးမစာမှ ကူးယူသည်။)

။ မိခင်က
ဖလုံ ပိုးကရင်လူမျိုး။
ဖခင်က
နီဟွန်း ဂျပန် 🇯🇵 လူမျိုး။

။ တစ်နေ့သောအခါ
ကမ္မဋ္ဌာန်းရိပ်သာတစ်ခုကနေ
ပြန်ထွက်လာပြီး
မိဘရဲ့ကျေးဇူးတရားကို
ကမ္မဋ္ဌာန်းတရားပွားများနေရင်းနဲ့
အထူးနားလည်သိသွားလို့
အိမ်ပြန်ရောက်တော့
ခုလိုပါပဲ
ဝပ်တွားကော်ရော်
ဦးတော်ချပြီး
ကြီးမားသော
မိခင်ရဲ့ကျေးဇူးတော်
ဖခင်ရဲ့ကျေးဇူးတော်တို့ကို
ရိုသေမြတ်နိုးစွာ
ရှိခိုးခါခါဦးတင်လျက်
လိမ္မာလှသည့်
ဤသမီးငယ်လေးမျိုးလို
မိဘတို့ရဲ့အမွေကို
ခံယူထိုက်သူလို့ပဲ
ချီးမွမ်းပါရစေ။

(ဖိနပ် မချွတ်ထားမိသည်ကိုတော့ နားလည်မှုထားပေးနိုင်ပါရန်။)
တောမှီရဟန်း
(၁၀.၃.၂၀၂၂) ရက်နေ့နံနက်။

။ အပြစ်မရှိလို့
အပြစ်ရှာချင်နေကြတာလည်း
လူတွေရဲ့ ဝါသနာပဲပြောပြော။

။ ကဲ့ရဲ့စရာမရှိလို့
ကဲ့ရဲ့ချင်နေကြတာလည်း
လူတွေရဲ့စရိုက်တွေပါပဲပြောပြော။

။ မနာလိုလို့
ဝန်တိုကြတာလည်း ပြုပြု
အဲဒါတွေဟာ လူတွေရဲ့
အမူအကျင့်ပဲ ပြောပြော။

။ လောကမှာ
ရန်မူမပြုသောသူ
ရန်မစုဘဲနေသောသူ
ရန်တုံ့မမူဘဲနေသောသူ
အမှန်တရားကိုလိုလားသူ
သစ္စာနှံ၍အားထုတ်သောသူ
ထိုသူတွေအားလုံးဟာ
ဘယ်တော့မှ
ရန်ကိုရန်ချင်းတုံ့မူမှု
မပြုပါဘူး။

။ ဒါကြောင့်
မိမိကို
မည်သူတွေက
အထင်မှားမှား
ပြစ်မှားမှားလည်း
အပြစ်မယူ
မငြူစူဘူး
ကြည်ဖြူပေးဆက်
မေတ္တာလက်မြဲပါတယ်။

တောင်ကလေးဆရာတော်
( ၇.၃.၂၀၂၂) ရက်နေ့နံနက်။