Categories
စကားလက်ဆောင် အမျိုးသားရေး အဲးခိုး

။ လွတ်လပ်ရေးနေ့ (မြန်မာနိုင်ငံ)။

မြန်မာနိုင်ငံ၏နေ့ထူးနေ့မြတ်

။ လွတ်လပ်ရေးနေ့ (အင်္ဂလိပ် Independence Day)သည်
နှစ်စဉ် ဇန်နဝါရီလ (၄)ရက်နေ့ ဖြစ်သည်။

။ မြန်မာနိုင်ငံသည်
၁၉၄၈-ခုနှစ်
ဇန်နဝါရီလ (၄)ရက်နေ့တွင်
စစ်မှန်သောလွတ်လပ်ရေး
ကိုရရှိခဲ့သည်။

နယ်ချဲ့တိုင်းတစ်ပါးတို့၏
စိုးမိုးအုပ်ချုပ်မှုအောက်မှ
လွတ်မြောက်လာခဲ့သော
တိုင်းပြည်နိုင်ငံများတွင် အချုပ်အခြာအာဏာပိုင်
လွတ်လပ်သောနိုင်ငံအဖြစ်သို့
ရောက်သည့်နေ့ကို
“ လွတ်လပ်ရေးနေ့” ဟူ၍
အသိအမှတ်ပြုထားကြသည်။

။ လွတ်လပ်ရေးနေ့
အင်္ဂလိပ်: Independence Day

ကမ္ပည်းစိုက်ထူ

။ ခရစ်နှစ် ၁၉၄၈ ခုနှစ်
ဇန်နဝါရီလ ၄ ရက်
မြန်မာသက္ကရာဇ် ၁၃ဝ၉ ခုနှစ်
ပြာသိုလဆုတ် (၉ )ရက်
တနင်္ဂနွေနေ့ကား
မြန်မာနိုင်ငံသည်
လုံးဝလွတ်လပ်သော
အချုပ်အခြာအာဏာပိုင်
သမ္မတနိုင်ငံတော်အဖြစ်သို့
ကောင်းစွာရောက်ရှိသောနေ့
ဖြစ်လေသည်။

။ ထိုနေ့သည်
ပြည်ထောင်စု
မြန်မာနိုင်ငံသားများအဖို့
ထူးမြတ်သော
နေ့တစ်နေ့ဖြစ်သည့်အားလျော်စွာ မြန်မာနိုင်ငံအနှံ့အပြားရှိ
မြို့ရွာများတွင်
ထိုနေ့ကို
မှတ်တမ်းတင်သော
မော်ကွန်းကျောက်စာတိုင်များ
စိုက်ထူကြပြီးလျှင်
အောက်ပါအတိုင်း
ကမ္ဗည်း ရေးထိုးထားကြသည်။

“ ဂြီသက္ကရာဇ် တစ်ထောင့်သုံးရာကိုးခုနှစ်၊ ပြာသိုလဆုတ် (၉)ရက်၊ တနင်္ဂနွေနေ့အား ဤငါတို့မြန်မာပြည် လုံးဝလွတ်လပ်သော အချုပ် အခြာအာဏာပိုင် ပြည်ထောင်စုသမ္မတနိုင်ငံတော်ကြီးအဖြစ် ကောင်းစွာရောက်သတည်း။ ”

ဆင်ယင်ကျင်းပ

။ မြန်မာနိုင်ငံ အောက်ပိုင်း၌
နှစ်ပေါင်း ၁ဝဝ မျှ
မြန်မာနိုင်ငံ အထက်ပိုင်း၌
နှစ်ပေါင်း ၆ဝကျော်မျှ
နိုင်ငံခြားသားတို့၏
အချုပ်အခြာကို
ခံခဲ့ကြရပြီးနောက်
မြန်မာခေါင်းဆောင်ကြီးများ၏
အမျိုးမျိုးသော
ကြိုးပမ်းမှု တို့ကြောင့်
ရရှိခဲ့သော ဤလွတ်လပ်ရေးကို
တည်တံ့ခိုင်မြဲစေရန်နှင့်
ပြည်ထောင်စုကြီး
တိုးတက်ဖွံ့ဖြိုးစေရန်မှာ
ပြည်ထောင်စုသားအားလုံး၏
တာဝန်ဖြစ်သည်နှင့်အညီ
နှစ်စဉ်နှစ်တိုင်း
သတိရ ကြစေရန်
သတိပေးနှိုးဆော်သည့်အနေဖြင့်
နှစ်စဉ်ထိုနေ့တွင်
လွတ်လပ်ရေးနေ့
အထိမ်းအမှတ်ပွဲများ
ဆင်ယင်ကျင်းပကြ၏။

ဘွဲ့ထူးဂုဏ်ထူး

။ ထိုအထိမ်းအမှတ်ပွဲများတွင် များသောအားဖြင့်
လွတ်လပ်ရေး ကျောက်တိုင်၌
စုဝေးကြ၍
ပြည်ထောင်စုတည်မြဲရေး
တိုးတက်ရေးကို
မမေ့ မလျော့ဆောင်ရွက်ရန်
အဓိဋ္ဌာန်များပြုလေ့ရှိကြသည်။

။ ပျော်ပွဲရွှင်ပွဲနှင့်
ပြပွဲ ပြိုင်ပွဲအမျိုးမျိုးကိုလည်း
တစ်ခမ်းတစ်နား
ဆင်ယင်ကျင်းပကြ၍
အစိုးရကလည်း
နိုင်ငံ၏တာဝန်ကို
ထူးချွန်စွာထမ်းဆောင်သူတို့အား
ဘွဲ့ထူး ဂုဏ်ထူးနှင့်
ဆုလာဘ်များ
ပေးအပ်ချီးမြှင့်လေသည်။

” လွတ်လပ်ရေးနေ့
တို့မမေ့ပြီ
တို့ရှေ့ကောင်းခြင်းရောက်ပါစေ” ဟု
အဓိဋ္ဌာန်ပြုပါသတည်း။

အဲးခိုး
(၃.၁.၂၀၂၄) ရက်နေ့။

Loading

Categories
စကားလက်ဆောင်

။ နှစ်ဟောင်းကို နှုတ်ဆက်ခြင်း ။

။ လူတစ်ယောက်ရဲ့အကြောင်းကို
အားလုံးမသိနိုင်သလို
နှစ်တစ်နှစ်ရဲ့အကြောင်းကို
အားလုံးမသိနိုင်ပါဘူး။

။ နှစ်ဟောင်းရဲ့အဖြစ်ကို
အမျိုးမျိုးဖြစ်နေသလို
နှစ်သစ်အဖြစ်သည်လည်း
အမျိုးမျိုးဖြစ်နေမှာပါပဲ။

။ နှစ်ဟောင်းကသင်ခန်းစာတွေက
နှစ်သစ်မှာ ပြန်မရတော့သလို
နှစ်သစ်ကသင်ခန်းစာတွေလည်း
နှစ်ဟောင်းကိုပြန်မပေးပါဘူး။

။ နှစ်သစ်ကူးတော့
နှစ်ဟောင်းကို
လွမ်းတဲ့သူ
မုန်းတဲ့သူ
နှမြောတသတဲ့သူ
တမ်းတတဲ့သူ
နှစ်သက်တဲ့သူ
မနှစ်သက်တဲ့သူ
နှုတ်ဆက်သူ
နှုတ်မဆက်သူ
အမျိုးမျိုးအဖုံဖုံပါပဲ။

။ နှစ်ဟောင်းက
မိမိရဲ့အကြောင်းကို
ပြန်ပြောင်းပြီး
ဘယ်လိုပဲအောက်မေ့အောက်မေ့
တမ်းတတမ်းတ
သတိဘယ်လိုပဲရရ
မရရပါ
ဖြစ်ပျက်ခဲ့တဲ့အဟောင်းတွေက
မိမိအတွက်သင်ခန်းစာပဲလေ။

။ နှစ်သစ်မှာ
မိမိအတွက်ရမည့်သင်ခန်းစာက
ဘာလဲဘယ်လဲဆိုတာ
ရေရေရာရာ
မသိရပေမယ့်
သမုဒယသစ္စာ
ဒုက္ခသစ္စာတွေကလွဲရင်
သည်ထက်ပို၍
မရှိပါဘူး။

။ အကြင်နာပို
ရင်နာပိုရတာတွေ
မနာလိုရတာတွေ
အပိုတွေ
အလိုတွေ
ဒုနဲ့ဒေးက
မနက်ဖြန်
သို့မဟုတ်
ဘယ်သောခါပါပဲဆိုတာ
သင့်အတွက် သင်ခန်းစာပါ ။

။ အဆင်ပြေလည်း ဒုက္ခ
မပြေလည်း ဒုက္ခမို့
ဒုက္ခပေးမည့်အရာက
အသက်ရှင်လေသမျှပါပဲ။

။ ဒါကြောင့်
၂၀၂၄ ခုနှစ်
နှစ်သစ်မှာ
” အပြစ်မယူ
မငြူစူဘူး
ကြည်ဖြူတွဲလက်
မေတ် တာ ဆက် ၍
စဉ်ဆက်ကမ္ဘာ
တိုင်ပါစေလေ
​ကောင်းဆုချွေသည်
ကောင်းထွေစည်လျက်တိုးစေသော်” ဟု
ဆုမြတ်ပတ္ထနာပြုပါသည်
ဆုလာဘ်ခါခါစုပါစေ။

တောင်ကလေးဆရာတော်
(၂၀၂၃ ခုနှစ်၊ ဒီဇင်ဘာလ(၃၁) ရက်၊ တနင်္ဂနွေနေ့နံနက်။)

Loading

Categories
စကားလက်ဆောင်

။ ကျန်းမာ,ရွယ်တင်၊ အသက်ရှည် ။

။ လူတိုင်းမှာ
၁) ကျန်းမာချင်ကြတယ်။
၂) ရွယ်တင်လှပနုပျိုချင်ကြတယ်။
၃) အသက်ရှည်ရှည်နေချင်ကြပါတယ်။ ဒီအချက်သုံးပါးဟာ လူတိုင်းလိုလားတောင့်တကြပါတယ်။

။ ၁) အလောဘော၊အလောဘသည်။
အရောဂျဿ၊ကျန်းမာခြင်း၏။
ပစ္စယော၊အကြောင်းသည်။
ဟောတိ၊ဖြစ်၏။

၂) အဒေါသော၊ အဒေါသသည်။( စိတ်မဆိုး အမျက်မကြီးတတ်ခြင်းသည်။)
ယောဗ္ဗနဿ၊ အရွယ်ကောင်းခြင်း( အရွယ်တင်ခြင်း) ၏။
ပစ္စယော၊အကြောင်းသည်။
ဟောတိ၊ဖြစ်၏။

၃) အမောဟော၊ အမောဟသည်။
ဒီဃာယုကတာယ၊အသက်ရှည်ခြင်း၏။
ပစ္စယော၊အကြောင်းသည်။
ဟောတိ၊ဖြစ်၏။

။ လောဘဟာ မကျန်းမာခြင်းရဲ့အကြောင်း။
။ ဒေါသဟာ အရွယ်အိုလွယ်ခြင်းရဲ့အကြောင်း။
။ မောဟဟာ အသက်တိုခြင်းရဲ့အကြောင်း ဖြစ်ကြောင်း သိနိုင်ပါတယ်။

။ ဒါကြောင့်

> လောဘနည်းရင်၊ ကျန်းမာရွှင်၊ ရွယ်တင်လှပ၊ အဒေါသ။
> သက်ရှည်နေရ၊ အမောဟ၊ သုံးဝမြတ်ဓမ္မလို့ ပြဆိုပါတယ်။ နုပျိုလန်းဆန်း၊ အမြဲတမ်း အရွယ်တင်လှပချင်ရင် ဒေါသနည်းပါးပြီး အဒေါသ( မေတ္တာ) ပြည့်ဝပါစေ။

။ တစ်နည်း
> လောဘကြီးရင် စည်းစိမ်ဥစ္စာပျက်စီးလွယ်တယ်။
> ဒေါသကြီးရင် မိတ်ဆွေပေါင်းသင်းပျက်လွယ်တယ်။
> မောဟကြီးရင် မပြည့်မစုံနဲ့နေရတတ်တယ်လို့ စာမှာပြတယ်။

။ နောက်ပြီးတော့
> လောဘကြီးရင် ပြိတ္တာဘုံ၊
> ဒေါသကြီးရင် ငရံဘုံ၊
> မောဟကြီးရင် တိရစ္ဆာန်ဘုံ ရောက်တတ်ကြောင်း (ဖြစ်တတ်ကြောင်း) လည်း စာမှာ သတိပေးပါတယ်။

။ အရေးကြီးဆုံးက
> အနိစ္စဒဿနေန အလောဘော ဟောတိ။
> ဒုက္ခဒဿနေန အဒေါသော ဟောတိ။
> အနတ္တဒဿနေန အမောဟော ဟောတိ ပါပဲ။
> အနိစ္စမြင်၊ လောဘစင်။
> ဒုက္ခသိမြင်၊ ဒေါသစင်။
> အနတ္တမြင်၊ မောဟစင် ဖို့ဖြစ်ပါတယ်။

နောက်ပိတ်ဆုံး
“ သမာဓိဉာဏ်၊ ရင့်ထက်သန်၊ နိဗ္ဗာန်ရောက်ရခြင်းပါပဲ။

(သည်နေ့တရားလက်ဆောင်မွန်)

တောင်ကလေးဆရာတော်
(၂၁.၄.၂၀၂၃) ရက်နေ့။)

Loading

Categories
စကားလက်ဆောင်

။ ဈာန်လမ်းလား? ဉာဏ်လမ်းလား? ။

။ နိဒါန်း ( စကားချီး)

ခေတ်ကာလအခြေအနေတွေက ပြောင်းလဲမှုတွေချည်းသက်သက်ပဲလားတော့ မပြောတတ်တော့ပါ။ သမထဘာဝနာနဲ့ဝိပဿနာဘာဝနာကမ္မဋ္ဌာန်းပွားများကြတဲ့သူတွေဟာ

အထူးအဆန်းတွေပြုကြလို့ လေ့လာနေကြသူအရှင်တို့အဖို့ တအံ့တဩပါပဲ။

အဖော်ရဟန်းများမိန့်

။ ဆောင်းပါးစာတစ်ပုဒ်ဖတ်မိပါတယ်။ ရေသောက်ပြီးတရားကျင့်တဲ့အကြောင်းပါပဲ။ ရေသောက်ပြီးတရားကျင့်နိုင်တဲ့အကြောင်းနဲ့ပတ်သက်ပြီးတော့ အဖော်ရဟန်းတွေကို မေးဖူးပါတယ်။ အဖော်ရဟန်းတွေက ရေသက်သက်သောက်ပြီး တရားကျင့်တာ၊ ရေမသောက်ဘဲတရားကျင့်တာ၊ပန်းပွင့်သာဘုဉ်းပေးပြီး တရားကျင့်တာ အမျိုးမျိုးကျင့်ခဲ့ဖူးကြောင်း မိန့်ကြပါတယ်။

ရေဖွဲ့စည်းမှု

။ ရေဆိုတာ ဓာတုဗေဒအရ အောက်ဆီဂျင်နဲ့ဟိုက်ဒရိုဂျင် ပေါင်းစပ်ထားတဲ့ဓာတ်ပါ။ ရေရဲ့ဓာတုဗေဒဖော်မြူလာမှာ H20 ပါပဲ။ အရောင်အဆင်းမရှိဖောက်ထွင်းမြင်နိုင်လို့ အနံ့ကင်းပြီးအရသာမရှိပါဘူး။ သူ့ရဲ့မော်လီကျူးဖွဲ့စည်းပုံမှာ အတန်းပညာသင်ခဲ့ဖူးကြတဲ့သူတွေ သိကြပြီးသားပါ။

အဓိက

။ မိုးရေ၊ရေခဲ၊နှင်းရေ၊ရေငွေ့စတဲ့ရေနဲ့ပတ်သက်တာ မြင်တွေ့ပြီးသားပါပဲ။အပင်နဲ့ပတ်သက်တာ၊သတ္တဝါတွေနဲ့ပတ်သက်တာ အသက်ရှင်နိုင်ဖို့ အာဟာရဓာတ်တွေအတွက် ရေဟာ အဓိကပါပဲ။ အထူးသဖြင့်ရေဟာ ဓာတ်ပစ္စည်းများဓာတ်ပြုရာမှာ ကြားခံဒြပ်တစ်မျိုးဖြစ်တဲ့အပြင် သွေးသားတွေမှာ အဓိကပါဝင်တဲ့ ဓာတ်ပစ္စည်းပါပဲ။

ကျောက်ကပ်

။ မိမိခန္ဓာကိုယ်ရဲ့၆၀/၇၀% မှာ ရေဖြစ်ပါတယ်။ ရေသောက်ပြီးတရားကျင့်ကြတယ်ဆိုလို့ ဘယ်ရေမျိုးတွေကို သောက်ပြီး တရားကျင့်ကြပါသလဲ ။

၁) မီးဖိုပေါ်မှာ အချိန်ကြာမြင့်စွာ ဆူပွက်အောင်ထားတဲ့ရေနွေးလား။

၂) ဓာတ်ဘူးထဲမှာ ရက်ကြာမြင့်စွာထားတဲ့ရေနွေးလား။

၃) အကြိမ်ကြိမ်ဆူပွက်အောင်ကြိုခဲ့သောရေနွေးလား။

၄) တစ်ညလွန်သောရေနွေးကို ထပ်ကြိုထားသောရေနွေး( သို့) ထပ်မကြိုထားသောရေနွေးလား။

၅) ထမင်း၊ဟင်းပေါင်းခံရေလား ဆိုတာကို သိထားသင့်ပါတယ်။ အဲဒီရေကို သောက်မိရင် ကယ်လစီယံ၊မက်ဂနီယံ၊ကရိုရင်းနဲ့အခြားဓာတ်သတ္တုတွေ ပိုများနေလို့ ကျောက်ကပ်ကို တိုက်ရိုက်ထိခိုက်စေနိုင်တယ်ဆိုတာကိုတော့ အားလုံးအသိဖြစ်ပါတယ်။

အံ့ဩမိ

။ ဒီနေ့ ကျောင်းကိုပြန်ရောက်လာပြီး အားအင်နည်းပါးတဲ့ ယောဂီအမျိုးသမီးဖြစ်တဲ့သူကို မြင်မြင်ချင်းပဲ ” ဟာ ဘယ်လိုများဖြစ်နေတာပါလဲ” လို့မေးမိလိုက်တော့ ” တပည့်တော် ရေသောက်ပြီး တရားကျင့်မိလို့ ဒီလိုဖြစ်လာတာပါဘုရား” ဆိုပြီးလျှောက်တော့ အံ့ဩမိပါလေခြင်းပါပဲ။

ဆလံပါပဲ

။ ” အော် ယောဂီဒါယိကာမကြီးရယ် ကျင့်ကြံစရာများရှားပါးလို့ ၊ ရေသောက်ပြီးကျင့်ရပါသလား” ဆိုပြီးတော့ ဆူမိတော့မလို့ပါပဲ။ တစ်ဆက်တည်းမှာပဲ ” နောက်ထပ်ကျင့်ဖို့အစီအစဉ်များ ရှိ, မရှိမေးတော့” ” ဆလံပါပဲဘုရား” တဲ့။

လေ့လာပါစေ

။ ” အစွန်းနှစ်ပါးမလွတ်ကြတဲ့ဒီအကျင့်တွေကြောင့်ပဲ ကင်္ခါဝိတရဏဝိသုဒ္ဓိဉာဏ်ဟာ ညစ်နွမ်းကြရတာပါပဲ။ ဗုဒ္ဓပေးထားတဲ့ ဝိပဿနာဘာဝနာဉာဏ်လမ်းစဉ်ဟာ ပရိယတ္တိပညာရပ်က ဘယ်လိုညွှန်ကြားထားပါတယ်ဆိုတာ လေ့လာသင့်ပါတယ်မဟုတ်ဘူးလား , လို့ပဲ မိန့်လိုက်ပါတယ်။

နေထိုင်ပါတော့မည်

။ ယောဂီဖြစ်သူက ဒီနေ့ သူ့ရဲ့သင်ခန်းစာစကားက ” သိမြင်ပါပြီဘုရား၊ သီလဝိသုဒ္ဓိ၊စိတ္တဝိသုဒ္ဓိ၊ဒိဋ္ဌိဝိသုဒ္ဓိ၊ ကင်္ခါဝိတရဏဝိသုဒ္ဓိစင်ကြယ်အောင်ပွားများနေထိုင်ပါတော့မည်ဘုရား” ဟူ၍ဖြစ်သတည်း။

( ရေသောက်တရားကျင့်သူ ယောဂီသို့ ။)

တောင်ကလေးဆရာတော်

(၁၉.၄.၂၀၂၃) ရက်နေ့နံနက်။)

Loading

Categories
စကားလက်ဆောင်

။ လမ်း ။

။ ဘဝမျက်နှာ
ဘာမှမပြောင်းလဲဘူးလို့သိရင်
သင် ဘာလုပ်ဖို့
စိတ်ထဲကဖြစ်နေပါသလဲ။

။ ဘဝဆိုတာ
အဆိုးထဲက
အကောင်းလား
သို့မဟုတ်
အကောင်းထဲက
အဆိုးလား
သင့်ဘဝရဲ့
အကျိုးအကြောင်းက
သင် ဘယ်လိုမြင်ပါသလဲ။

။ သင့်ဘဝအသစ်
မဖြစ်လာခင်
သင့်ရဲ့ဘဝအဟောင်းကို
စိတ်ချစွာစွန့်ပစ်ဖို့
သင့်စိတ်ရဲ့ခံစားချက်က
သင် နားလည်နေမှာပါ။

။ ဒီနေ့တော့
သင့်ရဲ့စိတ်ဆေးကို
စစ်ဆေးကြည့်လိုက်ပါ
ပြည့်သိပ်နေတဲ့
သင့်ရဲ့စွဲလမ်းစိတ်ဟာ
လမ်းပိတ်နေပြီလား
လမ်းပြတ်နေပြီလား
လမ်းဖြတ်နေပြီလား
လမ်းကြားထဲမှာပဲလား။

( ၂၀၂၃ – နှစ်သစ်လက်ဆောင်)
ဘုန်းသစ်ထူး( ၂.၁.၂၀၂၃) ရက်နေ့။

Loading

Categories
စကားလက်ဆောင်

။ နှုတ်ဆက်ခြင်း ။

။ ၂၀၂၂ နှစ်
ဒီဇင်ဘာလ ၃၁
၃၁ ဘုံသားတွေကို
နှုတ်ဆက်ပါတယ်။

။ ဘေးကင်းပါစေ
ရန်ကင်းပါစေ
အနာကင်းပါစေ
ဆင်းရဲခြင်းကင်းပါစေ
ချမ်းသာကိုယ်စိတ် မြဲကြပါစေ။

တောင်ကလေးဆရာတော်
(၃၁.၁၂.၂၀၂၂) ရက်နေ့။

Loading

Categories
စကားလက်ဆောင်

။ ငါတို့နေရာ ပြည်မြန်မာ သည် ။

။ ငါတို့နေရာ
ဤကမ္ဘာသည်
မေတ္တာကင်းကွာ နေကြပြီ။

။ ငါတို့နေရာ
ဤကမ္ဘာသည်
မေတ္တာနုနု လိုနေပြီ။

။ ငါတို့နေရာ
ပြည်မြန်မာသည်
( ဘေးရန်, အနာ
ဆင်းရဲကွာ
ချမ်းသာကိုယ်စိတ်
မြဲပါစေ။)
သာယာငြိမ်းချမ်း လိုနေပြီ။

ဘုန်းသစ်ထူး
(၁၀.၁၂.၂၀၂၂) ရက်နေ့။

Loading

Categories
စကားလက်ဆောင်

။ နှုတ်ဆက်တော့မယ် ။

။ များမကြာမီ
၂၀၂၂ ခုနှစ်က
ငါတို့ကို နှုတ်ဆက်တော့မယ်။

။ ငါတို့သည်လည်း
၂၀၂၂ ခုနှစ်ကို
စွန့်ခွာရတော့မယ်။

။ ၂၀၂၂ ခုနှစ်မှာ
အကောင်း,အဆိုး
အခက်အခဲ
ဆင်းရဲချမ်းသာ
အဖြာဖြာတွေကို
မေ့ကျန်လပ်ခဲ့ရတော့မယ်။

။ မေ့ကျန်လို့မရတဲ့
အရာခပ်သိမ်းတွေက
အမေ့တွေ
မေ့နေလို့မရတဲ့
အတွေ့တွေပါ။

။ မေ့များမေ့လို့မရတဲ့
အမေ့တွေ
နေ့နေ့ညည
မေ့မရနိုင်တဲ့
အတွေ့အမေ့တွေ
၂၀၂၂ ခုနှစ်ထဲမှာ
မေ့ထားလိုက်ရတော့မယ်။

။ အဟောင်းအတိတ်တွေဆီက
အကြောင်းအရိပ်တွေ
ဆက်စပ်အားကောင်းနေတဲ့
အကျိုးပုံရိပ်တွေ
တိတ်တိတ်လေးနဲ့
ငါတို့ကို နှုတ်မဆက်တယ်။

။ အနာဂတ်ကာလ
အသစ်အသစ်ဘက်ကို
ဘဝင်အသစ်စိတ်နဲ့အတူ
ပြိုင်တူနဲ့ဆက်ရဦးမယ်။

။ အတိတ်ဆီကအနှစ်ရယ်
ပစ်စက်ခဘဝထဲက
အသစ်အသစ်ထဲက
အနှစ်အနှစ်ရယ်
နှုတ်ဆက်ထားပေမင့်
ထာဝရနယ်
ဘဝနယ်နဲ့
နွယ်ဆက်သစ်တွေရှိကြဦးမယ်။

။ နှစ်ဦးညွှတ်တော့မယ့်
သည်နှစ်ကို
အဖြစ်ကူးရတော့မယ့်
နှစ်သစ်ကို
​ရွှင်ပျမြူးမြူးလေးနဲ့ပဲ
ကူးခပ်ရတော့မယ်မဟုတ်လား။

။ ဘဝလှေ
ဘဝရေ
ငါတို့တွေ
ကူးခပ်နိုင်ကြပါစေလေ။

​ဘုန်းသစ်ထူး
(၁.၁၂.၂၀၂၂) ရက်နေ့။

Loading

Categories
စကားလက်ဆောင် ဗုဒ္ဓဘာသာ

။ ပူဇော်ကန်တော့ခြင်း ။

။ သက်တော် (၉၃ )နှစ်၊ သိက္ခာတော် (၇၃ )ဝါရှိ ကျေးဇူးဂုဏ်ရှင် သာမညတောင်ဆရာတော်ကြီးသည်

၁) ဗုဒ္ဓသာသနာတော်နှစ် ၂၅၄၇ ခုနှစ်၊

၂) ခရစ်နှစ်၂၀၀၃ ခုနှစ်၊နိုဝင်ဘာ(၂၉ )ရက်နေ့၊

၃) မြန်မာကောဇာသက္ကရာဇ် ၁၃၆၅ ခုနှစ်၊နတ်တော်လဆန်း (၆ )ရက်၊စနေနေ့ နံနက် (၉:၀၀) နာရီအချိန်တွင် ဘဝနတ်ထံ ပျံလွန်တော်မူခဲ့သည်ကို သတိရကြဦးမည်ထင်ပါသည်။

။ သည်နေ့သည် ဆရာတော်ကြီးပျံလွန်တော်မူရာ၌(၁၉) နှစ်တိုင်တိုင်ရှိပြီဖြစ်သော်လည်း ဆရာတော်ကြီး၏ သီလဂုဏ်၊သမာဓိဂုဏ်၊ပညာဂုဏ်တို့ကို မြဲစွာအောက်မေ့ပါသည်။

။ ဆရာတော်၏ဂုဏ်တော်ကို ပူဇော်ကန်တော့ပါ၏ဘုရား။

တောင်ကလေးဆရာတော်

(၂၉.၁၁.၂၀၂၂) ရက်နေ့။

Loading

Categories
စကားလက်ဆောင်

။ သူတို့နှစ်ယောက် ။

။ သူတို့နှစ်ယောက်
တစ်ယောက်ပျောက်ပြီ
တစ်ယောက်တည်းသာ ကျန်နေခြင်း။

အဲးခိုး(၂၅.၁၁.၂၀၂၂) ရက်နေ့။

Loading