အဝိဟိံသာနိုင်ငံရေး (၁၄)

လူသည် လောဘကို ငြှိမ်းသတ်ရမည်။
ငြိမ်းအောင် အားထုတ်ရမည်။
တပ်မက်မှု ကင်းရမည်။ ရောင့်ရဲရမည်။ တင်းတိမ်ရမည်။

ခေါင်းဆောင်ကောင်းတစ်ယောက်

အရှင်တို့ဟာ နိုင်ငံရေးအကြောင်းနဲ့ ပတ်သက်ရင် အကုန်အစင် သိမြင်ထားကြသူ မဟုတ်ပါ။ (မဟုတ်ပေမယ့်) သို့သော် နိုင်ငံရေးနဲ့ ပတ်သက်လာရင်တော့ လိမ်လို့ ရမယ် မဟုတ်ပါ။ များသောအားဖြင့် အကြမ်းမဖက်သော နိုင်ငံရေးမူဝါဒဟာ လိမ်သူ၊ ကောက်သူ၊ ဖြောင့်သူအားလုံးကို သိနိုင်ပါတယ်။ လိမ်တယ်ဆိုတာ အချိန်ကြာကြာ တည်နိုင်တဲ့သဘော မရှိပါ။ ဘယ်အမှန်တရားကိုမှ ဖုံးကွယ်ထားလို့ မရပါ။ နိုင်ငံရေး သဘောမရိုးတဲ့သူတွေ၊ မရိုးမဖြောင့်မှ အမျိုးမျိုး လုပ်ပါစေ သည်းခံပေးပါ။ ဒီနေရာမှာ ရှေးခေတ် နိုင်ငံဦးသျှောင် ပုဂ္ဂိုလ်တစ်ဦးရဲ့ စကားကို ပြောချင်တယ်။

ကိုလိုနီနိုင်ငံရေးကြောင့် သူတို့ရဲ့တိုင်းပြည် ကျွန်ပြုခံရတဲ့အချိန်မှာ ဒီစကားကို သူ ပြောပြတယ်။ “ကိုလိုနီပုဂ္ဂိုလ်တွေ၊ ငါတို့လူမျိုးကို မသတ်ဖြတ်ပါနဲ့၊ ငါတို့တိုင်းပြည်ကို မဖျက်ဆီးပါနဲ့” လို့ ပြောပြပြီး မိမိရဲ့လူမျိုး ပြည်သူလူထုတွေကိုတော့ “တို့ပြည်သူတွေ ဒီသူတွေကို ဘာမျှ ရန်မပြုပါနှင့်၊ သည်းခံပေးပါ”ဆိုပြီး ပြောခဲ့တယ်။ သူ့စကားကို ပြည်သူ့ တွေက လေးစားလိုက်နာပြီးနေကြတယ်။ နောက်ဆုံး ကျွန်ပြုတဲ့ကိုလိုနီသမားတွေက ထုံးစံ အတိုင်း နေဝင်၊ မိုးချုပ်သွားတယ်။ စုပေါင်း၊ ပူးပေါင်းထားတဲ့အားနဲ့ လက်တွဲညီညာကြတဲ့ သူတို့ရဲ့ ညီညွတ်မှုအားကြောင့် လောကသားရန်သူအားလုံး လက်တွင်းထဲက လွတ်မြောက် သွားကြတယ်။ ဒီအကြောင်းကို အကဲခတ် လေ့လာကြည့်ရင် ခေါင်းဆောင်ကောင်း တစ်ယောက်ရဲ့ ရှိရမယ့် အရည်အချင်းနဲ့ ရှိရမယ့် ကြိုးစားအားထုတ်မှုဟာ ဘယ်ရွေ့ ဘယ်မျှ ရှိရမလဲ ဆိုတာ သိလောက်ပါတယ်။

ပြည်သူတွေက တော်ရင်

နိုင်ငံရေးဟာ ပုံပြင်၊ ဇာတ်တော်၊ ရာဇဝင်၊ သမိုင်း မဟုတ်။ အကြောင်းအားလုံး သိရမယ့်အရေး ဖြစ်ပါတယ်။ ယနေ့ ခေတ်သစ်နိုင်ငံရေးဟာ ဝါဒယှဉ်ပြိုင်တဲ့ နိုင်ငံရေး မဟုတ်။ စွမ်းနိုင်ခြင်းနဲ့ သိနိုင်ခြင်း နိုင်ငံရေး ဖြစ်ပါတယ်။ တိုးတက်နေတဲ့ လူမှုကမ္ဘာအလယ် မှာ အသိဉာဏ်၊ အကျင့်ဉာဏ်မမြင့်တဲ့ နိုင်ငံရေးခေါင်းဆောင်တစ်ယောက်ဟာ ရှက်စရာ အလွန်ကောင်းပါတယ်။ အသရေမဲ့ စိတ်ဓာတ်ခွန်အားနဲ့ ဉာဏ်ဓာတ်မပြည့်ဝတဲ့ နိုင်ငံရေး သမားဟာ ကမ္ဘာ့နိုင်ငံရေးဇာတ်ခုံပေါ်မှာ စိတ်ပျက်လက်ပျက်နဲ့ ဖယ်ရှားခံရတဲ့ မြင်ကွင်းတွေ့ မြင်တွေ့ကြတယ် မဟုတ်လား။ အမှားတရားကို အားပေးတဲ့နိုင်ငံရေးဟာ တိုင်းပြည် ဆင်းရဲ မွဲတေမှုကို မဖြစ်တာ နည်းပါတယ်။ အသိစိတ်ဓာတ် လေးမြတ်ခြင်းတရား ခေါင်းပါးတဲ့ ခေါင်းဆောင်တွေကို နိုင်ငံရေးလောကမှာ ပြည်သူတွေက ဖယ်ရှားပေးနိုင်ရမယ်။

ယနေ့နိုင်ငံရေးလုပ်တဲ့သူတွေဟာ သည်းခံခြင်းတရား၊ ချစ်ခြင်းတရား၊ ခွင့်လွှတ်ခြင်း တရားများ ရှိကြရဲ့လား။ မတူကွဲပြားတဲ့ လူမှုဘဝနိုင်ငံရေးဟာ ဦးဆောင်သူ အရည်အချင်း မပြည့်ဝဘဲ ရှိနေလျှင် လူသားအားလုံး အကျိုးကောင်းစီးပွားရေး ပျက်စီးကြကုန်မယ်။ နိုင်ငံရေးသဘောထားမမြင့်တဲ့ ခေါင်းဆောင်တွေ၊ နိုင်ငံရေးသဘောတရား နားမလည်နိုင် ကြတဲ့ပြည်သူတွေ မိမိနဲ့ ထိုက်တန်တဲ့နိုင်ငံရေးအစိုးရ ရအောင် (ဖြစ်အောင်) ပြည်သူတွေမှာ လည်း တွေးခေါ်မှုအရည်အချင်း၊ မြော်မြင်မှုဉာဏ်ရည်များ ပြည့်ဝစွာ ရှိရမယ်။ အဲဒီတရားသာ မဖောက်ရ မရှိရင်တော့ မိမိနဲ့ ထိုက်တန်တဲ့ အစိုးရသာ ရကြမယ်။ ယောင်ဝါးဝါးအစိုးရနဲ့သာ ရရင်တော့ နေခါးခါးအချိန်မှာ မတော်မတရားတဲ့ နိုင်ငံရေးလမ်းစဉ်အောက်က ကုန်းမနိုင်၊ ရုန်းမထနိုင်ဘဲ ဖြစ်ကြမယ်။ နိုင်ငံရေးဆိုတာ ပြည်သူအပေါ်မှာ မူတည်ပါတယ်။ ပြည်သူတွေ တော်ရင် နိုင်ငံရေး တော်ပါတယ်။ ကောင်းပါတယ်။

မားမားမတ်မတ် စွန့်စွန့်စားစား

အရှင်တို့ရဲ့ မိဘဘိုးဘွားတွေ ဖြတ်သန်းလာခဲ့ရတဲ့ ဘဝတစ်လျှောက်ကို ပြန်လေ့လာ ပါ။ ပဒေသရာဇ်အုပ်ချုပ်ရေး၊ နယ်ချဲ့စနစ်အုပ်ချုပ်ရေး၊ ဖက်ဆစ်ဝါဒီအုပ်ချုပ်ရေး၊ ဆိုရှယ်လစ် ဝါဒီ အုပ်ချုပ်ရေး၊အရင်းရှင်နဲ့အာဏာရှင်ဆန်ဆန်အုပ်ချုပ်ရေးစတဲ့အုပ်ချုပ်ရေးလက်သစ်၊လက်ဟောင်းမျိုးမျိုးကြားက ဒုက္ခပေါင်း မရေတွက်နိုင်လောက်အောင် နိုင်ငံရေးပြဿနာအမျိုးမျိုး ခံစားတွေ့ကြုံလာခဲ့ကြရတယ်။ အဲဒီလို ခံစားတွေ့ကြုံလာခဲ့ရလို့ပဲ အရှင်တို့ရဲ့ဘဝ

ခံစားမှု အစိတ်အပိုင်းတွေဟာ နိုင်ငံရေးကို မကြောက်မရဲစရာ မရှိဘဲ မားမားမတ်မတ်၊ စွန့်စွန့်စားစား လုပ်ရဲကိုင်ရဲကြတာ ဖြစ်ပါတယ်။ နိုင်ငံရေးလုပ်လို့ ကွယ်လွန်သေဆုံးကြတဲ့ `သူတွေ နည်းပါးပါတယ်။ ဘာမှမလုပ်ဘဲ ကွယ်လွန်သွားကြတဲ့သူတွေ ရေတွက်မကုန်နိုင် / အောင်ပါပဲ။

လက်တွဲမှ အောင်မြင်မယ်

အရှင်တို့ဟာ ယုံကြည်ချက်အမျိုးမျိုး ရှိကြလို့ လူမှုကမ္ဘာကြီးကို တိုးတက်အောင် လုပ်နိုင်ကြတာပါ။ အရှင်တို့ဟာ ကွဲပြားမှုကို စုစည်းမယ်။ မတူညီမှုကို စုဖွဲ့ကြမယ်ဆိုရင် တစ်ခုတည်းသော အကျိုးစီးပွားအတွက် မလုပ်ကိုင်နိုင်စရာအကြောင်း မရှိပါ။ အရှင်တို့ဟာ ရည်ရွယ်ချက်နဲ့ ဆောင်ရွက်လုပ်ကိုင်ချက်များ ပူးပေါင်း၍ သတိထားကြပါ။ အခက်အခဲ မရှိနိုင်ပါ။ အသက်ပေါင်းများစွာ သေကျေနိုင်တဲ့ အဏုမြူပစ္စည်း အစိတ်အပိုင်းတောင်မှ ခက်ခက်ခဲခဲ ထုတ်လုပ်နိုင်ကြသေးတယ်ဆိုရင် ပင်ပင်ပန်းပန်းမရှိတဲ့ တူညီလက်တွဲခြင်းဟာ မတွေ့နိုင်၊ မဆုံနိုင်၊ မတွဲနိုင်စရာအကြောင်း မရှိပါ။ လူသားများအကျိုးသယ်ပိုး ဆောင်ရွက်မှ အားချင်းများ တူညီကြရင် အတူတကွ လက်တွဲမှ အောင်မြင်မယ်။

ဝိုင်းအုံပြီး စုပုံ မဖြေရှင်းကြရင်

အရှင်တို့တိုင်းပြည်မှာ တကယ်စေတနာ အမှန်ထားရင် –
(၁) တည်ငြိမ်မှုရှိအောင် တည်ငြိမ်မှုကို တည်ဆောက်ပေးရမယ်။ 
(၂) ငြိမ်းအေးအောင် တည်ဆောက်ပေးရမယ်။
(၃) ဒုက္ခဆင်းရဲမရောက်အောင် တည်ဆောက်ပေးရမယ်။
(၄) မိဘဘိုးဘွားများ ချမှတ်ကျင့်သုံးလာခဲ့တဲ့ ထုံးတမ်းစဉ်လာဓလေ့ကို မမေ့ အောင် တည်ဆောက်ပေးရမယ်။
(၅) ပြည်သူအားလုံး အလိုဆန္ဒကို နေရာတိုင်း ပြည့်စုံအောင် တည်ဆောက်ပေး ရမယ်။
(၆)အဆုံးမသတ်နိုင်သော ရန်လိုမာန်ထောင်မှုများ၊ အချင်းချင်းမရှိအောင် တည်   ဆောက်ပေးရမယ် ဆိုတဲ့ စေတနာအမှန်နဲ့ မိမိရဲ့ တိုင်းပြည်ကို တည်ဆောက် နိုင်ကြရမယ်။

အချင်းချင်း အပြစ်မြင်၊ အပြစ်ဆိုခြင်းဖြင့် မလုပ်ကြဘဲ အပြစ်မမြင်၊ အပြစ် မဆိုကြဘဲ တိုင်းပြည်ကို တည်ဆောက်ထိန်းသိမ်းကြရမယ်။ယနေ့ တိုင်းပြည်တိုင်းမှာ အကျပ်အတည်းပေါင်းများစွာ ရင်မဆိုင်ရတဲ့ တိုင်းပြည်မရှိပါ။ အလုပ်ထွက်မဲ့ပြဿနာလား၊ စားဝတ်နေရေးပြဿနာလား၊ စစ်မက်အရေးပြဿနာ လား၊ နိုင်ငံရေးပဋိပက္ခလား၊ အကျပ်အတည်းတွေ အများအပြား တွေ့နေကြရတယ်။ လူသား များ ရင်ဆိုင်တွေ့ကြုံနေရတဲ့ အကျပ်အတည်း၊ အခက်အခဲတွေကို ဝိုင်းအုံပြီး စုပုံမဖြေရှင်း ကြရင် ပြဿနာအခင်းတွေ၊ လူအရိုးစုတွင်းတွေ မြေပြင်တစ်လွှားမှာ မြင်မကောင်းလောက်အောင် မတွေ့ဆုံရဘူးလို့ မထင်ပါနဲ့။ လူတွေရဲ့ ဒေါသဟာ အလွန်အမင်း ပြင်းထန်တယ်။ အလွန်အမင်း ကြမ်းတမ်းတယ်။

အားကိုးမှုအမှားကြောင့်

အရှင်တို့(လူသားတွေဟာ) လှုပ်ရှားနေတဲ့ အကြောင်းအရာတွေကို ကြည့်ရင် လိုအပ် ချက်ရှိတဲ့ အကြောင်းအရာကို ဖြည့်စွက်အားဖြည့်ဖို့ပါပဲ။ ရန်ပွဲမဟုတ်ပါဘူး။ မမြဲတဲ့သဘော့မှာ ခိုင်မြဲတဲ့ ခေါင်းဆောင် မရှိပါဘူး။ ဖြစ်ပျက်တဲ့အခြင်းအရာအပေါ်မှာ လတ်တလော ဖြေရှင်း ပေးနိုင်တဲ့ အားကိုးခံ၊ ဂုဏ်ပြုခံ မဟုတ်တဲ့ ခေါင်းဆောင်ကို အားကိုးခဲ့လို့ မြန်မာတွေ ယနေ့တိုင် မြန်မာ့နိုင်ငံရေးပြဿနာကို မဖြေရှင်းနိုင်ကြသေးတာကို ထောက်ပြရင် သင်ခန်းစာ ရသင့်လောက်ပြီပေါ့။ မီးဝိုင်းရှို့သောသူတွေကို သတိထားရမယ်။

အရှင်တို့ရဲ့လိုအပ်ချက်မှာ သီးခြားကမ္ဘာ၊ သီးခြားတိုင်းပြည်၊ သီးခြားနေရာ တည် ဆောက်ဖို့ မဟုတ်၊ ကျေးဇူးပြုတတ်သော၊ ကျေးဇူးအထူးသိတတ်သော၊ ပြည်သူပြည်သားတို့ရဲ့ လိုအပ်ချက်ကို နားလည်ပေးနိုင်သော၊ ထိန်းကျောင်းမှုအသိတရား အားကောင်းသော ခေါင်းဆောင်ကို တင်မြှောက် အားကိုးဖို့ပါပဲ။ နိုင်ငံရေးပြဿနာမီးကို ငြိမ်းအောင် မငြိမ်းသတ် တတ်သော ခေါင်းဆောင်ကို အရှင်တို့ရဲ့ ခေါင်းဆောင်အဖြစ် မတင်မြှောက်နိုင်ပါဘူး။ အရှင်တို့ရဲ့ တိုင်းပြည်မှာ ရသေ့၊ ရဟန်း၊ လူသူတော်စင်တွေများစွာ ကိန်းအောင်းနေထိုင်တဲ့ တိုင်းပြည်ပါ။ သူတော်ကောင်းတရား စောင့်ထိန်းတဲ့ခေါင်းဆောင်ကိုသာ တင်မြှောက်အားကိုးမှာပါ။ အအုပ်စိုးခံရတဲ့ ပြည်သူတွေဟာ ခေါင်းဆောင်တို့ရဲ့ မာန်ဖီမှုကို ခံစားလာခဲ့ရတဲ့ အပြုအမူကြောင့် ခုချိန်မှာ လူတိုင်းလူတိုင်း စည်းကမ်းမဲ့စွာ အကြောက်တရားက လွှမ်းမိုးမှမှု ခံရတယ်၊ အကြောက်တရား လွှမ်းမိုးမှုခံရတဲ့ ပြည်သူတွေဟာ အလုပ်၊ အစား၊ အသွားအလာ၊ အနေအထားတွေအားလုံး မှန်စွာလုပ်နိုင်ကိုင်နိုင်ခြင်းမရှိဘဲ အကြောက်တရားကြောင့် (လုပ်ကိုင် နေထိုင်ရတာကြောင့်) လူမှုရေး၊ နိုင်ငံရေး၊ စီးပွားရေးစည်း စနစ်မကျနဘဲ ဖြစ်ခဲ့ရတယ်။ လူမှုဘဝ နိုင်ငံရေးရည်ရွယ်ချက်ဆိုရင်လည်း (ပက်ပက်စက်စက်) ပျက်စီး၊ ဆုံးရှုံး၊ ပျက်သုဉ်း ခဲ့တယ်။ ဒီလိုဒီပုံဖြစ်ခဲ့ရတာဟာအားကိုးမှုအမှားကြောင့်(သို့မဟုတ်)အရည်အချင်းဖျင်းတဲ့ ခေါင်းဆောင်ကို တင်မြှောက်ထားမှုကြောင့် ဖြစ်ပါတယ်။

ကြိုးပမ်းအားထုတ်ရမယ့်အလုပ်

နိုင်ငံရေးလောကမှာ လူမှုဘဝနိုင်ငံရေးလောကကို တည်ဆောက်ကြမယ် ဆိုရင် တိုးတက်ကြီးပွားသော အဆုံးအမ (လိုက်နာရန်စကား) ရှိပါတယ်။

(၁) ညှိနှိုင်းသည့် ညီလာခံများ မကြာခဏ ကျင်းပရန်။
(၂) ညီညွတ်စွာ လုပ်ကိုင်ဆောင်ရွက်ရန်။
(၃) မှန်သည်ကိုသာ ကျင့်ဆောင်သွားရန်တွေပဲ ဖြစ်ပါတယ်။
လူတွေဟာ ယုံကြည်မှုကင်းမဲ့နေအောင် မနေသင့်ပါ။ အရှိန်အဝါရရှိရေးအတွက် လည်း နိုင်ငံရေးကို လုပ်တာ မဖြစ်ရပါ။ (အောင်ပွဲအလီလီရဖို့ နိုင်ငံရေးလုပ်တာ မဟုတ်ရပါ) စွန့်လွှတ်သည့်အတွက် နိုင်ငံရေးလုပ်တာပဲ ဖြစ်ရမယ်။ တူညီမှုမရှိသော သဘောတရား၊ ကွဲလွဲချက်များ ရှိသော နိုင်ငံရေးသဘောတရား၊ ယူဆချက်အမှား အမျိုးမျိုးကို အမှန်သို့ ရောက်အောင် ဖော်ပြကြိုးပမ်း အားထုတ်ရမယ့်အလုပ်ဟာ နိုင်ငံရေးအလုပ်ပါပဲ။

ငြိမ်းချမ်းသော လူ့ဘောင်စနစ်သို့ ရောက်အောင်

အရှင်တို့ဟာ သာယာဝပြောသည့် လူ့ဘောင်ဖြစ်အောင် (ရောက်အောင်) ကြိုးပမ်း အားထုတ်ကြရမယ့် တာဝန်ရှိပါတယ်။ လူတို့တာဝန်ကို မသိဘဲမနေပါ။ ငြိမ်းချမ်းသည့် လူ့ဘောင်စနစ်၊ သို့မဟုတ် မြန်မာ့လူမှုဘဝနိုင်ငံရေးစနစ်ရောက်အောင် မြန်မာပြည် ချမ်းသာရေး ဟူသမျှ မြန်မာနိုင်ငံရေးဇာစ်မြစ်ကို (ရိုသေလေးစားမှုမရှိသူတို့ကို) ဝိုင်းဝန်း၍ အများသူငါ လက်ခံခြင်းရောက်အောင် သုံးသပ်ပြီး တည်ဆောက်ရမယ်။ အရှင်တို့အချင်းချင်း စွပ်စွဲပြစ်တင် ကွဲပြားနေမည့်အစား ကွဲပြားဆန့်ကျင်နေကြတဲ့ သဘောတရား အချက်အလက်များကို ညှိနှိုင်း ဆောင်ရွက်လုပ်ကိုင်ဖို့ စဉ်းစားရမယ်။ ဆုံးဖြတ်ရမယ်။ ဘယ်စနစ်မဆိုပါ အဆိုးနဲ့ အကောင်း တွဲနေကြစမြဲမို့ ကောင်းလည်း မကောင်း၊ ဆိုးလည်းမဆိုး ဆိုတဲ့ စနစ်မျိုး မဖြစ်အောင် လုပ်ရမယ်။

(ဘယ်နိုင်ငံရေးစနစ်မဆို တစ်ဦးတစ်ယောက် (တစ်မိသားစု)အတွက်ကိုသာ ကာကွယ် စောင့်ရှောက်တဲ့ နိုင်ငံရေးစနစ်မျိုး မရှိဖို့ လိုတယ်။)အများလက်ခံတဲ့ နိုင်ငံရေးစနစ် ဆိုတာ လူစု၊ လူနည်းမခွဲခြားဘဲ လက်ခံတဲ့စနစ်ကို ဆိုလိုပါတယ်။ လက်ခံခြင်းဆိုတာ သူတစ်ပါးတို့ရဲ့ သမိုင်းကြောင်းအရ တည်တံ့ခိုင်မြဲရေးအတွက် စိုးရိမ်စရာမလိုဘဲ ပြန်လည် သုံးသပ်နိုင်ရန် အခွင့်အရေးပေးခြင်းပဲ ဖြစ်ပါတယ်။

“ကမ္ဘာကြီးသည် အကြမ်းဖက်မှုများ၊ ကြောက်မက်ဖွယ် ကြမ်းတမ်းရက်စက်မှုများ များပြားလာပါသည်။ ငြိမ်းချမ်းသာယာဝပြောမှု မရှိခြင်းကြောင့် ငြီးငွေ့ဖွယ် ခြောက်သွေ့သော လောက များပြားလာမည် ဖြစ်သဖြင့်”

သင် ဘယ်လိုပုံစံမျိုးနှင့် ဝိုင်းဝန်းကူညီလေမလဲ။

နိုင်ငံရေးမူဝါဒဟာ
လိမ်သူ၊ ကောက်သူ၊ ဖြောင့်သူ အားလုံးကို သိနိုင်ပါတယ်။
လိမ်တယ် ဆိုတာ
အချိန်ကြာကြာ တည်နိုင်တဲ့သဘော မရှိပါ။
ဘယ်အမှန်တရားကိုမှဖုံးကွယ်ထားလို့မရပါ။ နိုင်ငံရေးသဘောမရိုးတဲ့သူတွေ မရိုးမဖြောင့်မှုအမျိုးမျိုး လုပ်ပါစေ၊သည်းခံပေးပါ။

ကိုးကား။ တောမှီရဟန်း၏ “အဝိဟိံသာနိုင်ငံရေး (၂၀၁၆)၊ စာမျက်နှာ ၁၄၉-၁၅၄၊ အဝိဟိံသာနိုင်ငံရေး (၁၄)” မှကောက်နုတ်ရေးသားဖော်ပြခြင်းဖြစ်သည်။