အဝိဟိံသာနိုင်ငံရေး (၁၃)

အားကိုးလောက်တဲ့စိတ်ကို ရှေ့တန်းတင်ပါ။

မျှတညီညွတ်တဲ့စိတ်

များသောအားဖြင့် လူတွေဟာ နိုင်ငံရေးသိက္ခာကို အကောင်းမြင်ဝါဒ သဘောတရား များ ထားပြီး နေကြတယ်။ အကောင်းမြင်ဝါဒ ဆိုတာ မုန်းတီးခြင်း၊ ကြမ်းတမ်းခြင်း၊ အကြမ်းဖက်ခြင်းကင်းနေတာကို ခေါ်တယ်။ လူတွေကတော့ ဘယ်အရာမဆို ဘာလုပ်လုပ် အကောင်းမြင်သက်သက်သာ ထားပြီး ဆိုးချင်သလို ဆိုး၊ မိုးချင်သလို မိုးနဲ့ နေလိုက်ကြ တယ်။ ဒီအမြင်မျိုးဟာ အကောင်းမြင်ကျင့်စဉ် မဟုတ်တာကြောင့် နိုင်ငံရေးလမ်းစဉ်မှာ မကျင့်သုံးအပ်ပါဘူး။ ဒီကျင့်စဉ်မျိုးကျင့်လို့ အောင်မြင်တဲ့နိုင်ငံရေး မရှိပါဘူး။ အောင်မြင်တဲ့ နိုင်ငံရေးလမ်းစဉ်ဆိုတာ ဘက်မလိုက်ခြင်းပါပဲ။ ဘက်လိုက်မှုရှိရင် ဘက်မလိုက်ဘဲ နေပါ။ အစွန်းထွက်သူရှိရင် အစွန်းမထွက်အောင် နေပါ။ မျှတညီညွတ်တဲ့စိတ်နဲ့ နေပါ။ ဒီစိတ်ဓာတ် မျိုးဟာ နိုင်ငံရေးအထွတ်အထိပ်ကို ရောက်တဲ့ စိတ်ဓာတ်မျိုးလို့ ခေါ်နိုင်ပါတယ်။

ဟန်ချက်ပျက် မာန်ချက်ထွက်တဲ့ နိုင်ငံရေးမူဝါဒ

အရှင်တို့ရဲ့ ပြုစုပျိုးထောင်ပေးမယ့် နိုင်ငံရေးဟာ ဆင်းရဲခြင်း တစ်စက်ကလေးမျှ မရှိ (မပါ)တဲ့ နိုင်ငံရေးပဲ ဖြစ်ပါတယ်။

အရှင်တို့ဟာ ဖြူစင်သောနှလုံးသားမှ ကောင်းမြတ်သော လူမှုဘဝနိုင်ငံရေးကို မဖြစ်မနေ ဆောင်ရွက်ပေးကြရမှာ ဖြစ်ပါတယ်။ ကောင်းမြတ်သောဆန္ဒ၊ အေးချမ်းသော မေတ္တာဓာတ်ဟာ ဆင်းရဲဒုက္ခအားလုံးကို ကင်းဝေးစေရုံမျှမက ဘေးအပေါင်းကိုလည်း လွတ် ကင်းပါတယ်။ယနေ့ လူတကာတွေမှာ –

(၁) ညီညွတ်ခြင်း
(၂) မျှတခြင်း
(၃) ညီမျှခြင်း
(၄) ငြိမ်းချမ်းခြင်းကို ရအောင် ဆုတောင်းနေကြတယ်။ တောင်းဆိုနေကြတယ်။ ဒီဆုတောင်း၊ တောင်းဆိုနေတဲ့အရေးဟာ ဆူပူခြင်းမှ ငြိမ်းချမ်းခြင်းကို ဖြစ်လာမယ်လို့ မျှော်လင့်နေကြတယ်။ တကယ်တော့ ပြောင်းလဲလာတဲ့ နိုင်ငံရေးခေတ်ရေစီးဟာ လောကရဲ့ ပြဿနာပေါင်းစုံကို မဖြေရှင်းနိုင်ဘဲ ရှိနေတယ်ဆိုတာကို တွေ့ရတယ်။ ကြီးမားတဲ့နိုင်ငံရေး နည်းစနစ်များ လောကမှာ မရှိသေးတော့ ခွဲထွက်မှု ပြဿနာတွေ စုပြီး ဖြစ်လာကြတယ်။ အပြီးမသတ်တတ်တဲ့ နိုင်ငံရေးပြုပြင်ပြောင်းလဲမှုတွေကြောင့် ဟန်ချက်ပျက်၊ မာန်ချက် ထွက်တဲ့ နိုင်ငံရေးမူဝါဒများ ပေါ်ထွက်လာခဲ့ရတယ်။

ပြောင်းလဲမှု မလုပ်မချင်း

အရှင်တို့ရဲ့ စိတ်ဟာ ဆင်းရဲ၊ ချမ်းသာမှုကို ခံစားတတ်တယ်။ သိတယ်။ နားလည် တယ်။ အကောင်းနဲ့ အဆိုးကို နားလည်တတ်တာကြောင့် ဘဝအဆိုးတရားများ ဖြစ်ပေါ်အောင် မည်သူမျှ မဖန်တီးရဲကြပါ။ အရုပ်ဆိုးသောဘဝကို ဘယ်သူမှ မမြတ်နိုးကြပါ။ ယနေ့ ကမ္ဘာပေါ်မှာ ပြစ်မှုတွေ၊ လုယက်မှုတွေ၊ အကြမ်းဖက်မှုတွေ၊ ကွပ်မျက်မှုတွေ၊ စစ်ပွဲကြီးတွေ ဖြစ်ပေါ်လာနေတာဟာ နိုင်ငံရေးပြဿနာသက်သက်ကြောင့် မဟုတ်ပါ။ ဆင်းရဲခြင်းအမျိုးမျိုး ပြည့်နှက်နေတာကြောင့်ပဲ ဖြစ်ပါတယ်။ ပြည့်နှက်နေတဲ့ ဆင်းရဲမှုကြောင့် နိုင်ငံရေး၊ စီးပွားရေး၊ ဘဏ္ဍာရေးတွေ အပြိုင်အဆိုင်ပြုလုပ်လာကြပြီး လက်နက်ပြိုင်ဆိုင်မှုတွေပါ လုပ်လာကြတယ်။ ဒီပြိုင်ဆိုင်မှုတွေ ဖြစ်ပေါ်လာအောင် လုပ်နေတာဟာ အခြားမဟုတ်ပါ။ ယုတ်မာကြမ်းတမ်း တဲ့ စိတ်ဓာတ်က ဖြစ်လာလို့ပါပဲ။ အဲဒီစိတ်ဟာ ဖြူစင်သန့်ရှင်းသော စိတ်ဓာတ်ဘက်ကို ပြောင်းလဲမှု မလုပ်မချင်း (မလုပ်လေသမျှ ကာလပတ်လုံး) လူ့လောကမှာ ငြိမ်းချမ်းရေး ဖြစ်ထွန်းမှာ မဟုတ်ပါ။

လူသားအားလုံးတို့ရဲ့ ရန်သူ

လူ့ဘုံလောကမှာ လူသားအားလုံးတို့ရဲ့ ရန်သူဟာ အကြမ်းဖက်ခြင်းတရား၊ သို့မဟုတ် ဒေါသဖြစ်ပါတယ်။)ဒေါသဟာ အမျက်ကို မဖျက်ဆီးနိုင်တာကြောင့် ကြောက်မယ် ဖွယ် ရက်စက်ကြမ်းကြုတ်မှုတွေ များစွာပေါ်ပေါက်လာတယ်။ လွန်ကျူးမှုလည်း ရေတွက်လို့ မကုန်နိုင်အောင် ဖြစ်ပျက်တယ်။

လူတွေဟာ –

(၁)  လက်နက်ပြိုင်ဆိုင်မှု၊
(၂)  အာဏာပြိုင်ဆိုင်မှုများ မက်မက်မောမော ဖြစ်နေကြတယ်။
နယ်မဲ့၊ အတားအဆီးမဲ့၊ တရားမဲ့အောင် ပြုမူလုပ်နေကြတယ်။ လက်နက်၊ စည်းစိမ်အင်အားတွေ သုံးပြီး အကျင့်ကောင်း၊ အကျင့်မြတ် လမ်းစဉ်၊ သို့မဟုတ် မိဘ ဘိုးဘွားအဆုံးအမ အသွန်အသင် ပေးထားခဲ့တဲ့ ဓလေ့ထုံးစံတရားများကို ကျောခိုင်းပြီး ထင်ရာစိုင်း မိုက်ကြတယ်။ စရိုက်ချင်းတူ၊ ဝါသနာချင်းတူကြသူတွေက အကြမ်းဖက်တဲ့ လုပ်ကွက်တွေ အုပ်စုဖွဲ့ပြီး သတ္တဝါအမျိုးမျိုး သေကျေတဲ့ ကွန်ရက်တွေ ဆက်စပ်ပူးပေါင်း ကြတယ်။ ရက်စက်တဲ့လုပ်ကွက်ကို လက်ရဲ၊ ဇက်ရဲအောင် လှုံ့ဆော်ပြီး အပြစ်ရှိတဲ့ အတတ် ကိုပါ သင်ကြားပေးခဲ့တယ်။ ဒီအကုသိုလ်ကွန်ရက်ထဲကို ရောက်သွားတဲ့ နိုင်ငံရေးအစုအဖွဲ့တွေ အားလုံး စုဖွဲ့ပြီး သင်တန်းတွေပေးကြတယ်။ သင်တန်းတွေ ယူကြတယ်။ ဒီအချက်ကို မြန်မာ့နိုင်ငံရေးလောကသားများ လေးနက်စွာ သိထားဖို့ လိုပါတယ်။

ရဲရဲရင့်ရင့် စွန့်ရမယ်

လူတွေဟာ ပင်ကိုနှလုံးသားက နူးညံ့ကြတဲ့သူတွေ ဖြစ်ကြတယ်။ ချစ်ခြင်းတရား တွေ အပြည့်အဝ ရှိကြပါတယ်။ လက်နက်၊ စည်းစိမ်၊ အာဏာ (လုပ်ပိုင်ခွင့်) (အစိုးရသူ) သုံးစွဲပိုင်ခွင့် ရရှိကြတဲ့အခါ ကူညီမှုကင်းမဲ့နေတဲ့ လူမှုလောကကို ဖျက်ဆီးပစ်တဲ့အကျင့်တွေ လုပ်ကြတယ်။

ခွဲခြားမှု၊ မညီမျှမှု၊ မရိုးသားမှု၊ မဖြူစင်မှု၊အကျိုးကောင်း မလိုလားမှုတွေ ဖြစ်အောင် လှုံ့ဆွပြီး သင့်မြတ်ကြသူကိုလည်း ခွဲခြားမှု ပြုတယ်။ ကွဲပြားအောင် လုပ်တယ်။ အဲဒီလို လူမှုဘဝ နိုင်ငံရေးအသိုက်အမြုံ ပျက်စီးမှုကြုံလာရင် နိုင်ငံရေးလုပ်တဲ့သူတွေဟာ အကျိုးစီးပွား အားလုံးအတွက် စွန့်လွှတ်နိုင်သူ ဖြစ်ရမယ်။ စွန့်နိုင်ခဲတဲ့ မိမိအသက်၊ မိမိတိုင်းပြည်၊ မိမိ ချစ်သူ၊ မိမိ မိသားစုကိုတောင်မှ ရဲရဲရင့်ရင့် စွန့်ရမယ်။ အများအတွက်နဲ့ လောကအတွက် အကျိုးများတဲ့အလုပ်ကို လုပ်တဲ့သူဟာ အကြွင်းမဲ့ အကန့်အသတ်မရှိ စွန့်ရဲရမယ်။

နိုးကြားမှုတရားနဲ့ ကျားကန်

အရှင်တို့ဟာ ငြိမ်းချမ်းရေး၊ တည်ငြိမ်ရေး၊ လွတ်လပ်ရေးနဲ့ ဖွံ့ဖြိုးရေးတို့ကို တည် ဆောက်နိုင်ရန် ကင်းမဲ့နေကြတဲ့ ညီညွတ်မှုကို နိုးကြားမှုတရားနဲ့ ကျားကန်ပေးရမယ်။ မှားယွင်းတဲ့ နိုင်ငံရေးအယူရှိတဲ့သူကို အစွန်းရောက်တဲ့သူလို့ မမြင်ဘဲ ပညာပေးပြီး ကူညီ နိုင်ရမယ်။ ရက်စက်သူ၊ သောင်းကျန်းသူ၊ စစ်ခင်းသူတွေကိုလည်း အတည်ငြိမ်ဆုံး ရောက်အောင် ညီညွတ်မှုတရားကို အခြေခံပြီး ဝိုင်းဝန်းစောင့်ရှောက်ပေးရမယ်။ အဆုံးမသတ်တဲ့ နိုင်ငံရေးကို တာဝန်အရ စုပေါင်းတုံ့ပြန်ကြရမယ်။ နိုင်ငံရေးမူဝါဒ ဆိုတာ တစ်ဖက်သတ် မှားတတ်တာကြောင့် မှားတတ်တဲ့နိုင်ငံရေးဝါဒကို အမှားမှားအယွင်းယွင်း မထားဘဲ စုပေါင်း ပြုပြင်ပေးကြရမယ်။

အနှစ်အသားပါသော နိုင်ငံရေးအုတ်မြစ်

လောကမှာ မေတ္တာတရားနဲ့ စုပေါင်းဖွဲ့စည်းထားတဲ့ အသင်းအဖွဲ့ မရှိပါ။ တင်းမာမှု၊ စွပ်စွဲမှု၊ ငြင်းခုံမှုတွေနဲ့ ရင်ဆိုင်ယှဉ်ပြိုင်မှုတွေ ပြုကြတယ်။ နည်းစနစ်ကောင်းမပါတဲ့အပြု အမူကြောင့် လေးနက်မှုတွေ မရှိဘဲ ပြဿနာတွေ အမျိုးမျိုးဖြစ်ပေါ်စေတယ်။ မိမိ ကောင်းကျိုးတရားကို လိုလားအားထုတ်မှု များပြားနေတာကြောင့် ပြီးစီးရမယ့် နိုင်ငံရေးအလုပ်တွေ မပြီးစီးဘဲ ရှိနေကြတယ်။ လူထုမကြိုက်တဲ့ အကြောင်းပြချက်တွေနဲ့ လှည့်ကွက်တွေ လုပ်ကြ တယ်။ အလုပ်မဟုတ် (အလုပ်မဖြစ်)တဲ့အလုပ်နဲ့ ရှုပ်ထွေးအောင် လုပ်နေကြတယ်။ အင်အား စုတာလား၊ အင်အားပြတာလားနဲ့ မဖယ်နိုင်တဲ့ အတ္တတွေ အထင်းသား ပေါ်လွင်နေတယ်။ လူတွေလုပ်တဲ့ နိုင်ငံရေးကြောင့် အပြစ်၊ အညစ်တွေ အမျိုးမျိုး ဖြစ်ပေါ်လာတယ်။ အန္တရာယ် တွင်းကို တူးကြတဲ့ နိုင်ငံရေးပရိယာယ်တွေဟာ စိုးရိမ်ခြင်း၊ ပူဆွေးခြင်း၊ ထိတ်လန့်ခြင်း များပြားလာစေတယ်။ အသက်အားလုံးကို တန်ဖိုးမထားတဲ့ နိုင်ငံရေးဟာ ပြိုင်ဆိုင်မှုကင်းတဲ့ နိုင်ငံရေးမဟုတ်ပါ။ ပြိုင်ဆိုင်တဲ့နိုင်ငံရေးဟာ လူမှုဘဝနိုင်ငံရေး မဟုတ်ကြောင်း မြင်စေချင် ပါတယ်။ သိစေချင်ပါတယ်။

အရှင်တို့ဟာ မြန်မာပြည်ရဲ့ ရိုးရာ၊ ဓလေ့၊ ထုံးတမ်းတွေကို ပျောက်ကွယ်အောင် မလုပ်ပါ။ မိမိ တည်ထောင်၊ တည်ဆောက်သော နိုင်ငံရေးကြောင့် တိုင်းပြည်ယဉ်ကျေးမှ မပျောက်ကွယ်အောင် ထိန်းသိမ်းကာကွယ်စောင့်ရှောက်ကြရမယ့် တာဝန်ကို တာဝန်သိသူ တစ်ဦးအဖြစ် ခံယူရမှာ ဖြစ်ပါတယ်။

မိမိနဲ့ သူတစ်ပါး လက်ခံကျင့်သုံးသော နိုင်ငံရေးမူဝါဒကို –
– ရှုတ်ချပြစ်တင်ဝေဖန်ခြင်း
– ပုတ်ခတ်ပြောဆိုခြင်း
– ပြောင်းလဲပစ်ခြင်း
– ဆန့်ကျင်ခြင်း ပြုလုပ်ကြောင်း အာမခံရဲသူ ဖြစ်ရမယ်။

အရှင်တို့ရဲ့ အခက်အခဲ၊ အကျပ်အတည်းကို အများမထိခိုက်အောင် ဆင်ခြင်ဉာဏ်နဲ့ နိုင်ငံရေးကို လုပ်ဖို့ စဉ်းစားထားရမယ်။ ခက်ခဲမှု၊ ကျပ်တည်းမှု ဖြစ်ရုံလေးနဲ့ ပြောဆိုငြင်းခုံ ဖို့ အကြောင်းမရှိအောင် နေရမယ်။ ငြိမ်သက်ရမယ်။တရားသဘောအရ

(၁) တွေဝေမှုကို ပညာဖြင့် ပြောင်းလဲစေရမယ်။
(၂) ကိုယ်ကျိုးကို အများအကျိုးနဲ့ ပြောင်းလဲစေရမယ်။
(၃) ထောင်လွှားမှုကို နိမ့်ချမှုနဲ့ ပြောင်းလဲစေရမယ်။
(၄) မောက်မာမှုကို သည်းခံမှုနဲ့ ပြောင်းလဲစေရမယ်။
(၅) ရက်စက်မှုကို ကြင်နာမှုနဲ့ ပြောင်းလဲစေရမယ်။
(၆) စွဲလမ်းမှုကို အမှန်တရားနဲ့ ပြောင်းလဲစေရမယ်

ဆိုတဲ့ မိမိရဲ့စိတ်နေသဘောထားကို အမြင့်မြတ်ဆုံးကို ရောက်အောင် နိုင်ငံရေး လုပ်သူတိုင်း နည်းလမ်းပေးထားခဲ့တယ်။

နိုင်ငံရေးဟာ ဥစ္စာစည်းစိမ် စုဆောင်းခြင်းမဟုတ်၊ ချမ်းသာခြင်း မဟုတ်၊ လောဘ မဟုတ်၊ တန်ခိုးအာဏာမဟုတ်၊ ဂုဏ်ပကာသနမဟုတ်၊ မကျေနပ်ခြင်းမဟုတ်၊ မနာလိုခြင်း မဟုတ်၊ မဖြစ်နိုင်ခြင်း မဟုတ်၊ မရနိုင်ခြင်း မဟုတ်၊ နက်နဲသိမ်မွေ့သော အနှစ်အသားပါ သော နိုင်ငံရေးအုတ်မြစ်ကို အရှင်တို့တိုင်းပြည်မှာ အသက်ပေး၍ တည်ဆောက်ကြပါစို့။

နိုင်ငံရေးမူဝါဒ ဆိုတာ

တစ်ဖက်သတ် မှားတတ်တာကြောင့် မှားတတ်တဲ့ နိုင်ငံရေးဝါဒကို
အမှားမှား အယွင်းယွင်း မထားဘဲ စုပေါင်း ပြုပြင်ပေးကြရမယ်။

ကိုးကား။ တောမှီရဟန်း၏ “အဝိဟိံသာနိုင်ငံရေး (၂၀၁၆)၊ စာမျက်နှာ ၁၄၄-၁၄၈၊ အဝိဟိံသာနိုင်ငံရေး (၁၃)” မှကောက်နုတ်ရေးသားဖော်ပြခြင်းဖြစ်သည်။