အမေရိကန်ခရီးစဉ်တွင် အောင်မြင်မှုရရှိခဲ့သည်ဟု တောင်ကလေးဆရာတော်ဒေါက်တာအရှင်ပညာသာမိ မိန့်ကြား

အမေရိကန်နိုင်ငံသို့ကြွရောက်ခဲ့သည့် ရက်ရှည်ခရီးစဉ်အတွင်း ရည်မှန်းချက်များအတိုင်း အောင်မြင်မှုများ အပြည့်အစရရှိခဲ့သည်ဟု မြန်မာနိုင်ငံသို့ ပြန်လည်ရောက်ရှိလာသည့် တောင်ကလေးဆရာတော် ဒေါက်တာအရှင်ပညာသာမိက မိန့်ကြားသည်။

တလခွဲကြာသွားရောက်ခဲ့သည့် အမေရိကန်နိုင်ငံခရီးစဉ်တွင် ရည်မှန်းချက်များ အားလုံးအောင်မြင်ခဲ့ကြောင်း အမေရိကန်ပြည်ထောင်စုသို့ရောက်ရှိနေကြသည့် ကရင် မြန်မာအပါအဝင်တိုင်းရင်းသားအားလုံးက မြန်မာပြည်ကိုပြန်လာပြီးအခြေချချင်ကြောင်း နိုင်ငံရေးတည်ငြိမ်သည့် မြန်မာပြည်၏ အပြောင်းအလဲကို စောင့်မျော်နေကြသည့် အနေအထားများရှိသည်ဟု ဆရာတော် ဒေါက်တာအရှင်ပညာသာမိက မိန့်ကြားသည်။

ဆရာတော်၏ အမေရိကန်ခရီးစဉ်တွင် ဝတ်ကြီးဝတ်ငယ်ပြု ခွင့်ရရှိခဲ့သောကြောင့် လွန်စွာဝမ်းသာပီတိဖြစ်ခဲ့ရသည်ဟု အမေရိကန်ပြည်ထောင်စုသို့ရောက်ရှိနေကြသည့် ပြည်ပရောက်ကရင်ဒုက္ခသည်များဆိုင်ရာ လူမှုစောင့်ရှောက်ရေးအဖွဲ (OKRSO) ၏ ခေါင်းဆောင်ဟောင်းများဖြစ်ကြသည့် စောစန်းအောင် မန်းဉာဏ စောကျော်ဇင် စောရွှေမိုး စောဘခန့်စိုး တို့က ပြောဆိုသည်။

စောရွှေမိုးက “ဆရာတော်ရဲ့ခရီးစဉ်မှာ တတ်နိုင်သည့်ဘက်က ကုသိုလ်ပြုခွင့်ရခဲ့တဲ့အတွက် အထူးဝမ်းသာကြည်နှုးရပါတယ် ” ဟု ကရင်အမျိုးသားမီဒီယာ ကို ပြောဆိုသည်။

အမေရိကန်ပြည်ထောင်စုအပါအဝင် နိုင်ငံတကာအသီးသီးသို့ရောက်ရှိနေကြသည် ကရင်အမျိုးသားအများစုက ဆရာတော်၏အမည်နာမ (ဘွဲ့) ထက် ကရင်ပြည်နယ်ငြိမ်းချမ်းရေးဦးဆောင်ဆရာတော်တပါးအပြင် တိုင်းရေးပြည်ရာများနှင့်ပတ်သက်၍ အစိုးရကို ပြောင်ပြောင်တင်းတင်း ဝေဖန်ပြောဆိုသည့် ဆရာတော်တပါးအနေနှင့်သိရှိထားကြသည်ဟု ကနေဒါနိုင်ငံတွင် နေထိုင်သည့် စောတကူး က ပြောဆိုသည်။

နိုင်ငံတော်ဗဟိုသံဃာ့ဝန်ဆောင် တောင်ကလေးဆရာတော် ဒေါက်တာအရှင်ပညာသာမိသည် အမေရိကန်ပြည်ထောင်စုခရီးစဉ်ကို စက်တင်ဘာလ ၁ ရက်နေ့ကစတင်ခဲ့ပြီ်း ယခုလ ၁၃ ရက်နေ့တွင် မြန်မာနိုင်ငံသို့ ပြန်လည်ရောက်ရှိလာခဲ့သည်။

ကရင်ပြည်နယ်တွင် စစ်မှန်သောငြိမ်းချမ်းရေးရရှိရေးအတွက် တောင်းကလေးဆရာတော်သည် အဓိကအခန်းကဏ္ဍမှဦးဆောင်ခဲ့ပြီး မြန်မာအစိုးရနှင့်ကရင်အမျိုးသားအစည်းအရုံး (KNU) တို့အကြား ငြိမ်းချမ်းရေးဆိုင်ရာလုပ်ငန်းစဉ်များကို လွန်ခဲ့သည့် ဆယ်စုနှစ်တခုကျော်ကပင် ဦးဆောင်ဦးရွက်ပြု ခဲ့သည့် အထင်ကရ ကရင်အမျိုးသားဆရာတော်တပါးဖြစ်သည်ဟု (KNU) ပြည်ထဲရေးနှင့်သာသနာရေးဌာနမှူး ပဒိုစောအားတိုးက ပြောဆိုသည်။

ကျေးဇူးတင်လွှာ – အထက်ပါသတင်းကို ရေးသားနိုင်ရန်အတွက် အကူအညီပေးခဲ့ကြသည့် ဓာတ်ပုံပိုင်ရှင်နှင့်ရပ်နီးရပ်ဝေးမှမိတ်ဆွေများအားလုံးကို ကျေးဇူးတင်ပါသည်။

သတင်း – ကရင်အမျိုးသား မီဒီယာ

Source: https://kareanmedia.blogspot.com/2015/10/blog-post_22.html