မန္တလေးမြို့၊ တောင်ပြင်ထီးလင်းတိုက်၊ တိုက်ကျောင်းနှင့် ရွှေရေးဆောင်တိုက်၊ ရန်ကုန်ကျောင်း တို့၏ပဓာနနာယကဖြစ်တော်မူသော ညဝါအကျော်
ပဋ္ဌာန်းဆရာတော်ဦးဝဇီရဗုဒ္ဓိသည် ယနေ့ ကရင်ပြည်နယ်အတွင်းပါဝင်သော လှိုင်းဘွဲမြို့နယ်အပိုင်၊ နောင်ဘိုကြီးရွာ၌ မြန်မာကောဇာသက္ကရာဇ် ၁၂၈၂-ခုနှစ်၊ တော်သလင်းလပြည့်ကျော် (၁၂)ရက်၊ ဗုဒ္ဓဟူးနေ့ (၂၈၊ ၁၀၊၁၉၂၁)(၁၀)
နာရီတွင် ဖွားမြင်တော်မူပါသည်။ မိဘနှစ်ပါးမှာ ဦးအေးပြိုင်နှင့်ဒေါ်ရင်တိုးဖြစ်သည်။
သက်တော်တစ်ဆယ့်သုံးနှစ်အရွယ်တွင် နောင်ဘိုကြီးကျောင်းဆရာတော်ဦးပညာကို ဥပဇ္ဈာယ်ပြု၍ ရှင်သာမဏေပြုတော်မူပါသည်။ ပရိယတ္တိအခြေခံရသည်နှင့် ပဲခူးမြို့၊ မြို့မစာသင်တိုက်ဆရာတော်ဦးဣန္ဒာစာရထံ၌ ပရိယတ္တိစာပေကို ဆက်လက်သင်ယူသည်။ မြန်မာကောဇာသက္ကရာဇ် ၁၃၀၂-ခု၊ တန်ခူးလဆန်း (၈)ရက်(၁၄၊၄၊၁၉၄၀)တနင်္ဂနွေနေ့တွင် မိဘနှစ်ပါး၏ ပစ္စယာနုဂ္ဂဖြင့် နောင်ဘိုကြီးဆရာတော်ဦးပညာကိုပင် ဥပဇ္ဈာယ်ပြု၍ သထုံခရိုင်၊ ရင်းငြိမ်မြို့၊ ကျောက်လုံးကြီးကျောင်းခဏ္ဍသိမ်၌ ရဟန်းအဖြစ်သို့ရောက်တော်မူသည်။
ရဟန်းဖြစ်သည်မှစ၍ အထက်တန်းပရိယတ္တိစာပေများကို ရင်းငြိမ်မြို့၊ ကျောက်လုံးကြီးဆရာတော်၊ သထုံမြို့၊ လယ်ဝန်တိုက်ဆရာတော်၊ပဲခူးမြို့၊မြို့မစာသင်တိုက်ဆရာတော်ဦးဣန္ဒာစာရ၊ခရမ်းမြို့၊ ကိုင်းကုန်းဆရာတော်၊ မန္တလေးမြို့၊ တောင်ပြင်ထီးလင်းတိုက် ဆရာတော်ဦးသူရိယာဘိဝံသ၊ ဆရာတော်ဦးပုညာန္ဒာဘိဝံသ၊ ဆရာတော်ဦးသံဝရမာလာ၊ မန္တလေးရွှေရေးဆောင်တိုက်၊ ဆရာတော်ဦးပဏ္ဏဝ၊ ဘုရားကြီးတိုက် ဆရာတောဦးနာရဒ၊ ဆရာတော်ဦးဣန္ဒကထံတော်တို့၌ ပရိယတ္တိပညာသင်ကြားခဲ့သည်။
အောင်မြင်ခဲ့သောစာမေးပွဲများမှာ ပဲခူးမြို့၊ ဝိနယာဓိက (ငယ်-လတ်)စာမေးပွဲ၊ အစိုးရ (ငယ်-လတ်-ကြီး)ကို အောင်မြင်ခဲ့ပြီး မြန်မာကောဇာသက္ကရာဇ်
၁၃၁၅-ခုနှစ်၌ စာချတန်းကို ဂုဏ်ထူးနှင်အောင်မြင်၍ (သာသနဓဇသီရိပဝရဓမ္မာစရိယ) ဘွဲ့ရရှိသည်။ဆရာတော်သည် မြန်မာကောဇာသက္ကရာဇ် ၁၃၁၄-ခုနှစ်မှ ၁၃၅၀ပြည့်နှစ်တိုင်အောင် (၃၆)နှစ်ကာလအတွင်း တောင်ပြင်ထီးလင်းတိုက်၊ တိုက်ကျောင်းနှင့် ရွှေရေးဆောင်တိုက်၊ ရန်ကုန်ကျောင်းတို့၌ သီတင်းသုံးစဥ်(ငယ်-လတ်-ကြီး)နှင့်စာချတန်းစာဝါများကို ပို့ချခဲ့သည့်အပြင် ယမိုက်ကျမ်း၊ ပဋ္ဌာန်းကျမ်းများကို အကြိမ်များစွာပို့ချခဲ့ရုံမျှမက နွေရာသီ အထူးစာဝါအဖြစ် ပဋ္ဌာန်းကို ပို့ချတော်မူသေးရာ ကျောင်းမဆန့်သဖြင့် လှေခါးရင်းသစ်ပင် အောက်တို့မှနေ၍ စာဝါလိုက်ကြရသည်။ စာဝါလိုက်သူများပြားကြသဖြင့် ညဝါအကျော် ပဋ္ဌာန်းဆရာတော်အဖြစ် ကျော်ကြားတော်မူပါသည်။
ဆရာတော်ကြီးသည် “ယမကသင်္ခေပကျမ်း”နှင့်“ပဋ္ဌာနနယကသင်္ခေပကျမ်း”
ကိုလည်း ရေးသားပြုစုတော်မူခဲ့၏။ ဤကဲ့သို့ သာသနအကျိုးကို သည်ပိုးရွက်ဆောင်နေစဥ် သက်တော် (၆၈) သိက္ခာတော် (၄၈)ဝါအရ မြန်မာကောဇာ
သက္ကရာဇ်၁၃၅၁ခုနှစ်၊ ဦးတန်ခူးလဆန်း (၁၃)ရက် အင်္ဂါနေ့၊ (၁၈.၄.၈၉) နံနက် (၆)နာရီ၊ မန္တလေးမြို့၊ ရွှေရေးဆောင်တိုက်၊ ရန်ကုန်ကျောင်းတွင် လွန်တော်မူပါသည်။
