မဟာပညာ
။ အဘိဓမ္မာနှင့်ဝိသုဒ္ဓိမဂ်စာမေးပွဲ ။
~~~~~~~~~~~~~~~~~~~~~~~~~
။ ကရင်ပြည်နယ်၊ဘားအံစာဖြေဌာန၊နိုင်ငံတော်အစိုးမှ ကြီးမှူးကျင်းပသော(၇၁) ကြိမ်မြောက် အဘိဓမ္မာနှင့်ဝိသုဒ္ဓိစာမေးပွဲတွင် တောင်ကလေးပရိယတ္တိစာသင်တိုက်၌ အောင်မြင်တော်မူကြသော သာမဏေ၊သီလရှင်၊ကျောင်းဆရာ၊ဆရာမများစာရင်းနှင့်အတူ ကရင်ပြည်နယ်တွင် အဘိဓမ္မာစာမေးပွဲပထမဆင့်(ဒုတိယဆု) တတိယဆင့်( ပထမဆု) ရရှိသောကျောင်းတိုက်ဖြစ်ပါသည်။
။ သံသရာကြွေး ။
~~~~~~~~~~~~
။ သံသရာကြွေးဆိုတာဟာ
သံသရာထဲမှာရှိနေကြတဲ့
သက်ရှိတို့ရဲ့အကြွေးကို
ဆိုလိုပါတယ်။
။ ဒီအကြွေးကို
ဘယ်လိုများ
ပေါ်ပေါက်လာခဲ့ရသလဲဆိုရင်
ကာမဂုဏ်ကျူးလွန်မှုနဲ့
မကောင်းသောကံအစွဲတွေကြောင့်
ဖြစ်လာတာပါ။
။ သည်ကံအကြွေးများကြောင့်
သက်ရှိတွေဟာ
ပြန်ဆပ်ခြင်းကို
မလွဲမသွေ ကြုံရပါမယ်။
။ တရားသဘောအရ
သံသရာကြွေးကို
၁) ကာမအကြွေး
လူသားအနေနဲ့
လိုချင်မှုတို့ကြောင့်
မကောင်းသောကံတွေ
ပြုမိကြလေ့ရှိတယ်။
။ ဥပမာ = တစ်ဦးတစ်ယောက်ကို
ဖျက်ဆီးမိတာ
သူ့ဥစ္စာကိုခိုးယူမိတာ
သူ့အပေါ်ကိုသစ္စာဖောက်တာ
စတာတွေဟာ
သံသရာအကြွေးတွေ
ဖြစ်လာတာပါ။
၂) စိတ်ပိုင်းဆိုင်ရာ
အကြွေးနဲ့ကတော့
မနာလိုမှု
သဘောမတူမှု
အမြင်မှားမှုတွေကြောင့်
သံသရာအတွင်း
ပြန်ဆုံပြန်တွေ့ကြတယ်။
။ ဥပမာ ရန်ငြိုးထားကြတဲ့သူနှစ်ဦးဟာ
မတူကြတဲ့ဘဝတွေမှာ
ချစ်ကြတဲ့သူတွေ
ပြန်ဖြစ်လာနိုင်ကြပါတယ်။
၃) သံသရာကြွေး
ပြန်ဆပ်တာနဲ့ပတ်သက်ရင်
. သူ့အား
ကျေးဇူးတင်မှုဖြင့်
ပြန်ဆပ်ရမယ်။
. မျှတမှုဖြင့်
အကြွေးကို ပြန်ဆပ်ရမယ်။
. ပင်ပန်းဝမ်းနည်းမှုဖြင့်
သူ့အားပြန်ဆပ်ရမယ်။
. မည်သည့်နည်းဖြင့်မဆို
သူ့ရဲ့အကြွေးကိုပြန်ဆပ်နိုင်တဲ့သူဟာ
သံသရာအကြွေး
နည်းပါးကြပြီး
ဘဝခရီးလမ်း
ဖြောင့်တန်းအေးချမ်းသွားမှာပါ။
။ သည်းခံခြင်းနဲ့
ခွင့်လွှတ်ခြင်းနဲ့
နားလည်မှုနဲ့
အတူတူဆုံကြရတဲ့
သည်လောကအလယ်မှာ
သူ့ကြွေးသူဆပ်
ကိုယ့်ကြွေးကိုယ်ဆပ်ရင်းနဲ့ပဲ
ခွဲခွာကြခြင်းပါပဲလေ။
။ အဲဒီတော့
သံသရာရှည်
သံသရာလည်
သံသရာမှာ
သူသူငါငါ
အကြွေးပေးဆပ်ကြခြင်းနဲ့
စိတ်အေးချမ်းခြင်းနဲ့
ရှိသောအကြွေးတွေ
ရှင်းလင်းနိုင်ကြပါစေလို့ပါပဲ
တပည့်တို့ရေ။
။ ရေးခဲ့တဲ့စာထဲမှာ
( မယ်နုအုတ်ကျောင်းစာအုပ်မှာ)
” သူ့ကြွေးရှိရင်ဆပ်ရမည်” တဲ့?
တပည့်တို့ရေ။
။ ဒါကြောင့်
ငြောင့်တံသင်းနဲ့တူပါသော
ဘဝအကြွေး
ကံအကြွေး
ဝဋ်အကြွေးတွေကို
ဆင်ခြင်နားလည်နိုင်ကြပါစေလေ။
တောင်ကလေးဆရာတော်
(၁၇.၂.၂၀၂၅) ရက်နေ့။
။ တပို့တွဲလပြည့်နေ့ ။
~~~~~~~~~~~~~~~
နိဒါန်း
။ မနေ့က တပို့တွဲလပြည့်နေ့ဖြစ်ပါတယ်။ လပြည့်နေ့မှာ ဗုဒ္ဓဘာသာနဲ့ဆိုင်တဲ့နေရာတိုင်းမှာ ကောင်းမှုကုသိုလ်တွေပြုကြပါတယ်။ အရှင်တို့အရှေ့ပိုးကရင်တိုင်းရင်းသား၊ဗုဒ္ဓဘာသာဝင်တွေအများစုက (စူဠာမဏိစေတီတော်) ကိုရည်မှတ်(ရည်မှန်း) ပြီး မိမိတို့မိဘဘိုးဘွားကြည်ညိုပူဇော်လာခဲ့ကြတဲ့( မီးပုံပူဇော်ပွဲ) မီးပူဇော်ပွဲကျင်းပါပြုလုပ်ကြပါတယ်။
ဗုဒ္ဓဘာသာရေးအရ
။ ဗုဒ္ဓဘာသာရေးအရ တပို့တွဲလပြည့်နေ့ဟာ
၁) ရှင်သာရိပုတ္တရာရဟန္တာဖြစ်တဲ့နေ့၊
၂) ရှင်သာရိပုတ္တရာနဲ့ရှင်မဟာမောဂ္ဂလန်
ဧတဒဂ်ဘွဲ့ထူးရတဲ့နေ့၊
၃) အင်္ဂါလေးရပ်နဲ့ပြည့်စုံတဲ့ရဟန်းပရိတ်သတ်များ အလိုအလျောက်စုမိကြတဲ့နေ့ဖြစ်ခြင်းနဲ့
၄) ဘုရားရှင်တိုင်းရဲ့ ” သြဝါဒပါတိမောက္ခ”
ပြတော်မူတဲ့နေ့ဖြစ်ခြင်း ဖြစ်တဲ့နေ့ပါပဲ။
ဩဝါဒပါတိမောက္ခ
။ ” သြဝါဒပါတိမောက္ခ” ဆိုတာ အပါယ်ဆင်းရဲဘေးမှကင်းဝေးစေသောအဆုံးအမ( ဩဝါဒ) ပါ။
ပထမဂါထာ( ပါဠိဘာသာ)
၁) ခန္တီပရမံ တပေါ တိတိက္ခာ၊
နိဗ္ဗာနံ ပရမံ ဝဒန်ဒိဗုဒ်ဓါ။
နဟိ ဗဗ္ဗဇိတော ပရူပဃာတီ၊
န သမဏော ဟောတိ ပရံ ဝိဝေဌယန္တော။
( မြန်မာဘာသာ)
လွန်စွာချုပ်တည်းမှုဟူသော
သည်းခံခြင်းသည်၊အလွန်မြတ်သော
အကျင့်ပေတည်း။
နိဗ္ဗာန်တရားကိုအမြတ်ဆုံးဟူ၍
ဘုရားရှင်တို့ဟောတော်မူကုန်၏။
သူတပါးကိုသတ်သောသူသည်
စိတ်အညစ်အကြေးကိုနှင်ထုတ်သူမဟုတ်။
သူတပါးကိုညှဉ်းဆဲသောသူသည်
မကောင်းမှုကိုငြိမ်းစေသူမဟုတ်။
ဒုတိယဂါထာ( ပါဠိဘာသာ)
၂) သဗဗှပါပဿ အကရဏံ၊
ကုသလဿ ဥပသမ္ပဒါ။
သစိတ္တ ပရိယောဒပနံ၊
ဧတံ ဗုဒ်ဓါန သာသနံ ။
(မြန်မာဘာသာ)
မကောင်းမှုဟူသမျှ မလုပ်ရာ။
ကောင်းမှုဟူသမျှကိုပြည့်စုံစေရာ၏။
မိမိစိတ်ကိုသန့်ရှင်းဖြူစင်စေရာ၏။
ဤသည်ကားဘုရားရှင်တို့၏အဆုံးအမတော်ပေတည်း။
တတိယဂါထာ( ပါဠိဘာသာ)
၃) အနူပဝါဒေါ အနူပဃာတော၊
ပါတိမောက္ခစ သံဝရော။
မတ်တညုတာစ ဘတ်တသ်မိံ၊
ပန္တဉ္စ သယနာသနံ၊
အဓိစိတ္တေ စ အာယောဂေါ၊
ဧတံ ဗုဒ်ဓါန သာသနံ။
( မြန်မာဘာသာ)
သူတပါးကို မစွပ်စွဲမပြစ်မှားရာ။
သူတပါးကို မညှင်းစဲ မနှိပ်စက်ရာ။
မြတ်သောသီလ၌စောင့်စည်းလုံခြုံရာ၏။
စားသုံးဖွယ်၌ပမာဏကိုသိရာ၏။
အစွန်အဖျားကျောင်းအိပ်ရာ၌နေရာ၏။
ထူးမြတ်သောစိတ်၌လွန်စွာအားထုတ်ရာ၏။
ဤသည်ကားဘုရားရှင်တို့၏အဆုံးအမတော်ပေတည်း, လို့လေ့လာမှတ်သားခဲ့ရပါတယ်။
တပို့တွဲလအမည်
။ တပို့တွဲလအမည်ကို ရှေးခေတ်က( တံပိုးတွဲ) (တပိုဝ်တွဲ)( ကျောက်စာမှာတော့ တပိုင်ထွဲ၊တပိုင်တွဲ၊တပိုင်တွယ်၊တပို့ထွယ်) လို့ရေးကြ၊ခေါ်ကြပါတယ်။ သည်ဘက်နောက်ပိုင်းမှာတော့ ” တပို့တွဲ” လို့ပဲရေးသားကြတော့တာကို မြင်ရတယ်။ မြန်မာ(၁၂) လရာသီအညွှန်းမှာတော့ ထန်းဖူးထန်းခိုင်များတွဲကျ( တွဲညွတ်) နေတဲ့ရာသီလလို့ပဲခေါ်ကြတာပါ။
ရာသီအလို
။ ရာသီမှာ မာဃနက္ခတ်စန်းနဲ့ယှဉ်ပြီးတော့ ရာသီရုပ်မှာတော့ ရေထမ်းသမားပုံပါပဲ။ အထိမ်းအမှတ်ပန်းကတော့ ပေါက်ပန်း( Buteamonosperma) လဲပွင့်၊လက်ပံပွင့်တွေပါပဲ။ထမင်းနှဲပွဲကျင်းပကြတဲ့လပါပဲ။ နံနက်(၆:၂၀)မှနေထွက်တာပါ။ ညနေဆိုရင်(၅:၄၀) မိနစ်ရောက်မှနေဝင်တာပါ။ညတာမှာ နေ့တာထက်ပိုရှည်ပါတယ်။ ရက်မစုံ၊လကွယ်ဖြစ်လို့(၂၉) ရက်သာရှိပါတယ်။
ကျန်းမာကြပါစေ
( ကိုးကား မြန်မာ့စွယ်စုံကျမ်း၊ အတွဲ(၄)
တောင်ကလေးဆရာတော်
(၁၃.၂.၂၀၂၅) ရက်နေ့။
။ ငြိမ်ပါပြီဘုန်းရေ ။
~~~~~~~~~~~~~~
။ အကုသိုလ်တန်းစီ
ဝဋ်ကြွေးတွေက မကုန်မဆုံး
မုန်းကြတဲ့သူတွေက များပြား
ချစ်ကြတဲ့သူတွေက နည်းပါး
ပါးနပ်တဲ့သူတွေက အကုန်စား
နွမ်းပါးကြတဲ့သူတွေက
သနားကြသူရှားပါးကြတဲ့
သည်လိုလူ့ဘုံမှာ
ခုချိန်တိုင်အောင်
ဘယ်သူမှစိတ်မကုန်ကြသေးဘူး။
။ တဟေးဟေး
တဝါးဝါး
ပျော်းပါးကြ
သူသူငါငါ
ငိုတစ်ခါ
ရယ်တစ်လှည့်နဲ့
မဲ့ရွဲ့ကြတဲ့သူလည်းမရှားပါး။
။ မနာလို
အူတိုသူတွေက
အနာအိုပေးလိုက်ကြလို့
ဝန်တိုပိတ်လှောင်
မာန်ပိုစိတ်ကြောင်သူတွေက
မိုက်ကြတာများ
များမှများပါပဲ။
။ သူ့ခေတ်မို့
သူ့နို့ခဲပဲလေ
သူ့အသဲပဲ။
ပြောမိရင်လည်း
ကိုယ်ပဲငရဲရနေ
အပ်ကြောင်းထပ်
အက်ကြောင်းထပ်
ငရဲထပ်ယူကြတဲ့သူတွေကလည်း
မရပ်မနား။
။ သည်နေ့
ကျောင်းကိုရောက်လာကြတဲ့တပည့်တွေ
အမေဖြစ်သူ
အဖေဖြစ်ကြသူ
အရွယ်စုံ
အသွင်စုံလို့ရယ်
သူတို့အကြောင်း
သူတို့အဖြစ်တွေ။
။ အဖြစ်အပျက်လည်းစုံ
အကွက်လည်းစုံ
အထွက်လည်းစုံပါပဲ။
။ နောက်ပိတ်ဆုံးတော့
အိမ်ပြန်ပါပြီဘုန်းရေ
ငြိမ်ပါပြီဘုန်းရေနဲ့ပဲ….။
( ရယ်ရွှင်ပျော်မြူးနိုင်ကြပါစေသော်။)
ဘုန်းအောင်ဖေ
( ၁၁.၂.၂၀၂၅) ရက်နေ့။
။ မေတ္တာလှေခါးဆီသို့ ။
~~~~~~~~~~~~~~~~~
။ သည်နေရာမှာ
ဆုံဖူးပါသည်
မေတ္တာရနံ့ကြည်။
။ သည်နေရာက
ပြန်ဆုံကြသည်
ဘဝသန္ဓေတည်။
။ သည်နေရာကို
တမ်းတပိုသည်
ရှေးဟိုအတိတ်ရည်။
။ သည်နေရာ၌
ဦးညွှတ်ခိုက်သည်
ရင်၌ပန်းဝေသီ။
။ သူသူငါငါ
ဤနေရာသည်
မေတ္တာမြှုပ်နှံခဲ့ကြသည်။
( ကိုယ်စိတ်ပင်ပန်းမှုကို ပဓာနမထားသော တပည့်ကြီးဇော်ဖြိုးအောင်အတွက် လက်ဆောင်ပေးသော အမှတ်တရကဗျာတစ်ပုဒ်ဖြစ်ပါသည်။)
ဆရာကြီး
(၁၀.၂.၂၀၂၅) ရက်နေ့။
။ နေပျော်ပါတယ် ။
~~~~~~~~~~~~~~
။ ကြင်နာတတ်မှ နှလုံးလှတယ်။
နှလုံးလှမှကြင်နာတတ်မယ်။
ချစ်တတ်မှနှလုံးမြတ်မယ်, ဆိုပြီးတော့ တရားစကားတွေ
နေ့တိုင်း ကြားသိမြင်ရပေမယ့်
တခါတလေ
သတိမမူ(မထား) မိလိုက်တာတွေ
အများကြီးပါပဲ။
။ လူ့ဘဝသက်တမ်း
အချိန်တိုလာတာနဲ့အမျှ
တန်ဖိုးထားခဲ့တဲ့အချိန်တွေရယ်
ရခဲ့တဲ့အကျိုးကောင်းတွေရယ်
တွေးတွေးမိရင်
လူဟာအလိုလိုနဲ့
ပေါ့ပါးစွာခံစားမှုဖြစ်တာလေးတွေ
ကျေနပ်မိပါတယ်။
။ များသောအားဖြင့်
လူတွေဟာ
မိမိရဲ့အပြုအမူအကြောင်းတွေကို
ပြန်ပြီးတွေးမိရင်
မတွေးချင်စရာတွေ
( မတွေးရဲတော့တာတွေ)
ဖြစ်နေတော့
မိမိကိုယ်မိမိအားမရမိတော့ဘဲ
စိတ်နှလုံးမသာမယာစွာ
မလန်းမဆန်းနိုင်ဘဲ
တမိုင်မိုင်တထွေထွေနဲ့
တွေဝေလို့
နေပြခဲ့ရတာတွေ
တွေ့ရပါတယ်။
။ လိုရင်းချက်
ပြောပြချင်တာက
မိမိရရ
မိမိဘဝမှာ
ဘာများအခိုင်အမာတရားတွေ
သိမြင်ခဲ့ပါပြီလဲ?
အမြင့်ဆုံးတရားအသိတွေ
ဆင်ခြင်သုံးသပ်နိုင်ပြီလဲ?
ပွားများအားထုတ်နေပါပြီလဲ ? ဆိုတဲ့အချက်တွေပါပဲ။
။ သည်နေ့ညချမ်းချိန်မှာ
သီလခံယူဆောက်တည်မယ်။
ဘာဝနာဉာဏ်ရအောင်တရားပွားများမယ်။
အထူးသဖြင့် မိမိမှာရှိတဲ့အချိန်ကို မြင့်မြတ်တဲ့တရားကိုသာ ပွားများအားထုတ်ဖြစ်မယ်ဆိုရင်
ဘဝမှာနေပျော်ပါတယ်။
ဘဝမှာမြတ်ပါတယ်လို့ပဲ
လက်ဆောင်ပေးပါရစေ။
တောင်ကလေးဆရာတော်
(၅.၂.၂၀၂၅) ရက်နေ့ည။
ဓာတ်ပုံ။ The White House
သတင်းအရင်းအမြစ်များစွာ၏ အစီရင်ခံချက်များအရ၊ သမ္မတ ဒေါ်နယ်ထရမ့်က အမေရိကန်ပြည်ထောင်စုအတွက် ဂါဇာကမ်းမြှောင်ကို “ထိန်းချုပ်ပြီး” ပြန်လည်တည်ဆောက်မည့် အငြင်းပွားဖွယ်ရာ အစီအစဉ်တစ်ရပ်ကို ကြေညာခဲ့သည်။ ပါလက်စတိုင်းနေထိုင်သူများကို ပြောင်းရွှေ့ပြီး စစ်ဘေးဒဏ်ခံနေရသော ထိုနယ်မြေကို အမေရိကန်ထိန်းချုပ်မှုအောက်တွင် စီးပွားရေးအရ ဖွံ့ဖြိုးတိုးတက်သော နေရာတစ်ခုအဖြစ် ပြောင်းလဲရန် အဆိုပြုခဲ့သည်။
ဂါဇာအတွက် ထရမ့်၏ အစီအစဉ်
၂၀၂၅ ခုနှစ်၊ ဖေဖော်ဝါရီလ ၄ ရက်နေ့တွင် အစ္စရေးဝန်ကြီးချုပ် ဘင်ဂျမင် နေတန်ညာဟုနှင့် ပူးတွဲကျင်းပသော သတင်းစာရှင်းလင်းပွဲတစ်ခုတွင် သမ္မတ ဒေါ်နယ်ထရမ့်သည် ဂါဇာကမ်းမြှောင်ဒေသအတွက် ထူးခြားသောအစီအစဉ်တစ်ရပ်ကို ထုတ်ဖော်ပြောကြားခဲ့သည်။ ယင်းအစီအစဉ်တွင် အမေရိကန်ပြည်ထောင်စုက ထိုနယ်မြေကို ပိုင်ဆိုင်ပြီး တာဝန်ယူရန် ပါဝင်သည်ဟု ထရမ့်က ဖော်ပြခဲ့ပြီး၊ “ကျွန်တော်တို့က ဒီနယ်မြေကို ပိုင်ဆိုင်မယ်၊ ပြီးတော့ အဲဒီနေရာမှာ အန္တရာယ်ရှိတဲ့ မပေါက်ကွဲသေးတဲ့ ဗုံးတွေနဲ့ အခြားလက်နက်တွေကို ဖျက်သိမ်းဖို့ တာဝန်ယူမယ်” ဟု ပြောကြားခဲ့သည်။ ဤအစီအစဉ်တွင် နယ်မြေကို ရှင်းလင်း ညီညာစေခြင်း၊ ပျက်စီးနေသော အဆောက်အအုံများကို ဖယ်ရှားခြင်းနှင့် စီးပွားရေးဖွံ့ဖြိုးတိုးတက်မှုအသစ်များ ဖန်တီးခြင်းတို့ ပါဝင်သည်။ ထရမ့်က ဤအစီအစဉ်ကို အရှေ့အလယ်ပိုင်းဒေသတွင် တည်ငြိမ်မှုယူဆောင်လာနိုင်မည့် ရေရှည်ပိုင်ဆိုင်မှုတစ်ရပ်အဖြစ် မြင်သော်လည်း၊ အမေရိကန်က မည်သို့ထိုနယ်မြေကို ရယူမည် သို့မဟုတ် အစီအစဉ်ကို အကောင်အထည်ဖော်မည်ဆိုသည့် အသေးစိတ်အချက်အလက်များကို မဖော်ပြခဲ့ပေ။
ပါလက်စတိုင်းလူဦးရေပြောင်းရွှေ့ခြင်း
ထရမ့်၏ အဆိုပြုချက်၏ အဓိကအချက်တစ်ခုမှာ လက်ရှိ ဂါဇာတွင် နေထိုင်နေသော ပါလက်စတိုင်းလူဦးရေ ၂ သန်းနီးပါးကို ပြောင်းရွှေ့ရန် ပါဝင်သည်။ သမ္မတက ဤနေထိုင်သူများကို အခြားအရှေ့အလယ်ပိုင်းနိုင်ငံများတွင် ပြန်လည်နေရာချထားသင့်ကြောင်း အကြံပြုခဲ့ပြီး၊ အထူးသဖြင့် ဂျော်ဒန်နှင့် အီဂျစ်နိုင်ငံတို့ကို ဦးတည်ရာနေရာအဖြစ် ဖော်ပြခဲ့သည်။ ထရမ့်က ဂါဇာသည် “နေထိုင်လို့မရသော” နှင့် “နေထိုင်ရန်မသင့်တော်သော” နေရာတစ်ခုကဲ့သို့ဖြစ်နေပြီး လူများသည် ထိုဒေသသို့ ပြန်မလာသင့်ကြောင်း ပြောကြားခဲ့သည်။ သူက ကနဦးတွင် လက်မခံငြင်းဆိုနိုင်မှုများရှိလာနိုင်သော်လည်း နောက်ဆုံးတွင် ထိုနိုင်ငံများက ပါလက်စတိုင်းဒုက္ခသည်များကို လက်ခံလိမ့်မည်ဟု ယုံကြည်ကြောင်း ဖော်ပြခဲ့ပြီး၊ “အခြားနိုင်ငံများကလည်း လက်ခံလိမ့်မည်” ဟု ထပ်လောင်းပြောကြားခဲ့သည်။ အဆိုပါ အငြင်းပွားဖွယ်ရာအချက်သည် လူသားချင်းစာနာမှုဆိုင်ရာ နှင့် ပထဝီနိုင်ငံရေးဆိုင်ရာ စိုးရိမ်မှုများကို မြင့်တက်စေသည်၊ အဘယ်ကြောင့်ဆိုသော် ၎င်းတွင် လူဦးရေတစ်ရပ်လုံး၏ လုံးဝပြောင်းရွှေ့ခြင်းကို ပါဝင်စေသောကြောင့်ဖြစ်သည်။
နေတန်ညာဟုဟူ၏ တုံ့ပြန်မှုနှင့် စိုးရိမ်မှုများ
အစ္စရေးဝန်ကြီးချုပ် ဘင်ဂျမင် နေတန်ညာဟုက ထရမ့်၏ အဆိုပြုချက်ကို အပြုသဘောဆောင်သော တုံ့ပြန်မှုပြခဲ့ပြီး၊ ၎င်းကို “သမိုင်းကို ပြောင်းလဲနိုင်မည့် အရာတစ်ခု” ဟုခေါ်ဆိုကာ “လိုက်စားထိုက်သော” အရာဖြစ်သည်ဟု အကြံပြုခဲ့သည်။ သို့သော်၊ ဤအစီအစဉ်သည် ၎င်း၏အကောင်အထည်ဖော်နိုင်မှုနှင့် ဖြစ်နိုင်ခြေရှိသော အကျိုးဆက်များနှင့်ပတ်သက်၍ ကြီးမားသော စိုးရိမ်မှုများကို ဖြစ်ပေါ်စေသည်။ ဝေဖန်သူများက အပြည်ပြည်ဆိုင်ရာဥပဒေအရ ထိုသို့သော သိမ်းပိုက်မှု၏ တရားဝင်မှုကို မေးခွန်းထုတ်နိုင်ပြီး၊ ပါလက်စတိုင်းလူဦးရေ သန်း ၂ နီးပါးကို အတင်းအကြပ် ပြောင်းရွှေ့ခြင်း၏ လူသားချင်းစာနာမှုဆိုင်ရာ အကျိုးသက်ရောက်မှုများကိုလည်း မေးခွန်းထုတ်နိုင်သည်။ ထို့အပြင် အကောင်အထည်ဖော်မှု၊ ငွေကြေးထောက်ပံ့မှုနှင့် အခြားအရှေ့အလယ်ပိုင်းနိုင်ငံများနှင့် သံတမန်ဆိုင်ရာညှိနှိုင်းမှုများနှင့်ပတ်သက်၍ အဆိုပြုချက်တွင် အသေးစိတ်အချက်အလက်များ ကင်းမဲ့နေခြင်းက ၎င်း၏အကောင်အထည်ဖော်နိုင်မှုနှင့် ဒေသတွင်းတည်ငြိမ်မှုအပေါ် ဖြစ်နိုင်ခြေရှိသော အကျိုးသက်ရောက်မှုများနှင့်ပတ်သက်၍ မေးခွန်းများစွာကို မဖြေရှင်းဘဲ ချန်ထားခဲ့သည်။
ရင်းမြစ်။ https://www.perplexity.ai/page/trump-says-us-will-take-over-g-35aN_SlySoWmV2YXDQ8.LQ
အသိပေးချက်။ ဤဆောင်းပါးသည် DeepSeek-V3 ကိုစမ်းသပ်အသုံးပြု၍ ဘာသာပြန်ထားခြင်းဖြစ်သည်။
🙏🙏🙏 မင်္ဂလာညချမ်းချိန် 🙏🙏🙏
~~~~~~~~~~~~~~~~~~~~~~~~~~~
။ ဘုရား,တရား,သံဃာ( ရတနာ) သုံးပါးကို အမြဲမပြတ်ဆည်းကပ်ကိုးကွယ်နေကြသောဒါယကာအယောက်တိုင်းအား ဘေးကင်းရန်ကင်းကြလျက် ကိုယ်စိတ်အမြဲအေးချမ်းသာယာကြပါစေလို့ ဆုတောင်းမေတ္တာ ပတ္ထနာပြုပေးကြပါတယ်။
။ ကိုယ်စိတ်အထူး အေးမြကြပါစေ။
။ မေတ္တာပို့သပါသည် ။
~~~~~~~~~~~~~~~~~
။ နံနက်ချိန်ခါ၊မင်္ဂလာ၊လိုရာဖြာဖြာပြည့်ပါစေ။
။ ကိုယ်လည်းကျန်းမာ၊စိတ်ချမ်းသာ၊ဘယာမျိုးမျိုးကင်းပါစေ။
။ မနှစ်သက်အပ်၊အနိဋ္ဌ၊မုချဝေးဝေးကင်းပါစေ။
။ နှစ်သက်မြတ်နိုး၊အမျိုးမျိုး၊ကောင်းကျိုးဆက်ဆက်ရောက်ပါစေ။
။ တရားဘာဝနာ၊အဖြာဖြာ၊ဉာဏ်မှာအမြဲသိပါစေ။
။ တရားသိထူး၊ထူးကဲထူး၊ကူးခပ်နိဗ္ဗာန်ရောက်ပါစေ။
တောင်ကလေးဆရာတော်
(၃.၂.၂၀၂၅) ရက်နေ့။
။ သည်နေ့နံနက်မေတ္တာပို့သပါသည် ။
~~~~~~~~~~~~~~~~~~~~~~~~~~~
။ သည်နေ့နံနက်၊မေတ္တာစက်၊အတွက်သူငါပို့ပါသည်။
။ မေတ္တာဖွေးဖြူ၊ကြည်သန့်ဖြူ၊သူငါအားလုံးရပါစေ။
။ ကိုယ်စိတ်ငြိမ်းအေး၊ဘယာဝေး၊ဆိုးဘေးကင်းလွတ်ကြပါစေ။
။ ငါးပါးရန်သူ၊ဒေါသမူ၊သူငါအားလုံးလွတ်ပါစေ။
။ ကိုယ့်စိတ်တည်ကြည်၊အေးမြကြည်၊သန့်တည်ဘဝင်လင်းပါစေ။
တောင်ကလေးဆရာတော်
(၂.၂.၂၀၂၅) ရက်နေ့နံနက်။