။ စေတနာမပါရင်
အရာရာမှာမပြည့်စုံနိုင်သလို
စေတနာကပဲ
အရာခပ်သိမ်းကို
သိမ်းကျုံးပါတယ်။
။ ကိုင်း
သင့်ရဲ့စေတနာအရင်းအမြစ်က
သင့်အတွက်ထက်
ဘယ်သူ့အတွက်ကို
ပို၍တန်ဖိုးထားပါသလဲ?
သင် သိပါတယ်။
( ဓာတ်ပုံကို ယူသုံးပါသည်။)
တောင်ကလေးဆရာတော်
(၁၁.၈.၂၀၂၅) ရက်နေ့။
Category: တောင်ကလေးဆရာတော်
~~~~~~~~~~~~~~~~~~~
ချက်ချင်းပျောက်သွားတယ်
။ ဘယ်ပုံဘယ်နည်း ဖြစ်နေသလဲဆိုရင်
ဘဝအသစ် ဖြစ်တယ်ဆိုတာ
ပဋိသန္ဓေစိတ်ကလေးက စဖြစ်တယ်။
စိတ်ကလေးက တစ်ကြိမ်တည်းပဲ
ဘာမှကြာတာ မဟုတ်ဘူး။
တစ်စက္ကန့် ဆယ်ပုံပုံ တစ်ပုံလည်း မကြာဘူး။အပုံတစ်ရာပုံလို့ တစ်ပုံလည်း မကြာဘူး။ပဋိသန္ဓေစိတ်ကလေး ဖြစ်ပြီး ချက်ချင်း ပျောက်သွားတယ်။
ဖြစ်ပြီးပျက်သွားပြီ
။ အဲဒီနောက်မှာ ပဋိသန္ဓေစိတ်က
ဖြစ်ပွား လာတဲ့ ဘဝင်စိတ် ဖြစ်တယ်။ဘဝင်စိတ်ကလည်း အဲဒီအတိုင်းပဲ။ ဘာမှကြာတာ မဟုတ်ဘူး။ စိတ်ဆိုတာ ဥပါဒ်, ဌီ, ဘင် ဆိုတဲ့အမည်တပ်ပြီးပြောလို့ရှိရင် ဖြစ်တာနဲ့ တည်တာနဲ့ ပျက်တာနဲ့ အဲဒီလောက်မြန်တယ်။ ဖြစ်ပြီး ပျက်သွားပြီ။
ပျောက်သွားရင်သေတာပဲ
။ ဘဝင်ဆိုတာ ဘဝရဲ့အစိတ်အပိုင်း၊
အဲဒီစိတ်တွေ မပြတ်ဖြစ်နေသမျှကာလပတ်လုံး အသက်ရှင်နေတယ်လို့ ဆိုရတယ်။
အဲဒီစိတ်တွေ အစဉ်ပြတ်သွားပြီး
နောက်ထပ် မဖြစ်လာဘူးဆိုရင် သေတာပဲ။
သေတယ်ဆိုတဲ့ နောက်ဆုံးစုတိစိတ်ဟာ
အဲဒီဘဝင်စိတ်ပဲ၊ ဘဝင်စိတ် ပျောက်သွားရင် သေတာပဲ။
ဘဝင်စိတ်ပြန်ဖြစ်တယ်
။ ဘဝင်စိတ်ကလေး ဖြစ်ပြီး ပျောက်တယ်။
နောက်ထပ် ဖြစ်ပြီး ပျောက်သွားပြန်တယ်။
အဲဒီလို ဆက်ခါ ဆက်ခါ ဖြစ်နေရင်းက
မြင်စရာရှိတဲ့အခါ ဘဝင်စိတ်အစဉ်က
တက်ကြွပြီး အိပ်ပျော်ရာက နိုးလာသလို
ဆင်ခြင်တဲ့စိတ် ဖြစ်တယ်။ဆင်ခြင်တဲ့စိတ်
ပျောက်သွားတော့ မြင်သိစိတ် ဖြစ်တယ်။
မြင်သိစိတ်ပြီးတော့ လက်ခံတဲ့စိတ်၊
စဉ်းစားတဲ့စိတ်၊ဆုံးဖြတ်တဲ့စိတ်၊
အဲဒီက နောက် ဇောစိတ် ခုနစ်ကြိမ်၊တဒါရုံ နှစ်ကြိမ်၊ အဲဒီလို စိတ်တွေ အဆက်မပြတ် ဖြစ်သွားတယ်။ အဲဒါကို “တစ်ဝီထိ” ခေါ်တယ်။ အဲဒီ ဝီထိဆုံးသွားရင် စိတ်တွေ
အားလျော့သွားတာပဲ။ စိတ်တွေ အားလျော့သွားတော့ ဘဝင် ပြန်ကျသွားတယ်။ ဘဝင်စိတ် ပြန်ဖြစ်တယ်။
သေတယ်လို့ခေါ်တယ်
။ အဲဒီလို မြင်လိုက်, ကြားလိုက်, နံလိုက်, စားလိုက်, တွေ့ထိလိုက်, အာရုံအထူးတွေ သိသိပြီးတော့ အဲဒီစိတ်တွေ ဆုံးသွားတာနဲ့
ဘဝင်စိတ်တွေဖြစ်တယ်။ တစ်ဆက်တည်း ဖြစ်နေတာ။ နေ့ရောညရော အများကြီးပေါ့။
တစ်စက္ကန့်အတွင်း စိတ်တွေ အကြိမ်ပေါင်းများစွာ ဖြစ်နေတယ်။ အဲဒီလိုဖြစ်နေရင်းနဲ့ နောက်ဆုံး သေရတော့မယ်ဆိုတော့
နောက်ဆုံးစိတ်ကလေးဖြစ်တယ်။ဘဝင်စိတ်ပါပဲ စုတိစိတ်ခေါ်တယ်။အဲဒီစိတ်ကလေး ချုပ်ပျောက်သွားတော့ စိတ်အသစ် မဖြစ်လာတော့ဘူး။ အဲဒီ အခါ သေတယ်လို့ ခေါ်တယ်။
အကုသိုလ်ကံကအကျိုးပေးပြန်တယ်
။ စိတ်ပျောက်တိုင်း ပျောက်တိုင်း
ရုပ်တွေလည်း ပျောက်လိုက်နေတာပဲ။စိတ်အသစ်တွေ ဖြစ်နေ သလို ရုပ်တွေလည်း ဆက်ပြီးတော့ အသစ်အသစ်တွေ ဖြစ်နေတာ။ အဲဒါကို “တစ်ဘဝ’လို့ ခေါ်တယ်။အမှန်စင်စစ်ကတော့ ရုပ်နာမ်အစဉ်တွေ
ဆက်ခါ ဆက်ခါ ဖြစ်နေတာပဲ။ပုဂ္ဂိုလ် သတ္တဝါလည်း မရှိပါဘူး။ နောက်ဆုံးစိတ်ကလေး ပျောက်သွားလို့ စိတ် အသစ်ကလေး မဖြစ်တာကို သေတယ်ဆိုရတာပဲ။သေတော့ ပြီးရော့လားဆို မပြီးသေးဘူး,
မိမိပြုထားတဲ့ ကုသိုလ်ကံ အကုသိုလ်ကံက
အကျိုးပေးပြန်တယ်။
အာရုံနိမိတ်တွေပေါ်လာတယ်
။ အကျိုးပေးဆိုတာ အားကောင်းတဲ့ကံ
ပေါ်လာတာ ပါပဲ။ ကံဆိုတာ မိမိပြုထားတဲ့ အမှုပေါ့။ ဒါမှမဟုတ် ကံပြုစဉ် အခါက တွေ့ခဲ့တဲ့ အာရုံနိမိတ် ပေါ်လာတယ်။ကမ္မနိမိတ် ခေါ် တယ်။ဒါမှမဟုတ် ဂတိနိမိတ် ပေါ်လာတယ်။ ကံက အကျိုးပေးတော့ ဖြစ်ရမယ့်
ဘဝအခြေအနေကို ဂတိနိမိတ် ခေါ် တယ်။
အိပ်မက် မက်သလိုပဲတဲ့။အာရုံနိမိတ်တွေ
ပေါ်လာတယ်။
စုတိစိတ်ဆုံးတာနဲ့
။ အဲဒီလို ကံ, ကမ္မနိမိတ်, ဂတိနိမိတ် သုံးခုထဲက တစ်ခုခုကို စွဲပြီးတော့ စွဲနေရင်းနဲ့နောက်ဆုံး စုတိစိတ်ကလေး ပြတ်သွားတာကိုး။ ပြတ်သွားပြီးတော့ အဲဒီစွဲတဲ့အာရုံကို အာရုံပြု ပြီး စိတ်အသစ်ကလေး ဌာနအသစ်မှာ ဖြစ်တယ်။ အဲဒီစိတ်ကို ပဋိသန္ဓေစိတ်လို့ ခေါ်တယ်။ ရှေ့ဘဝက စုတိစိတ် ပျောက်တာနဲ့ ဘ၀အသစ်၌ ပဋိသန္ဓေစိတ် ဖြစ်တာဟာကာလအခြား မရှိဘူး။ရှေ့စိတ်နောက်စိတ် ဆက်ရက်ပဲ။အခုမသေခင်အတွင်း စိတ်တစ်ခုပြီးတစ်ခု ဆင့်ခါဆင့်ခါ ဖြစ်နေရာမှာ အခြား မရှိသလိုပဲ စုတိစိတ်ဖြစ်ပြီးနောက် ပဋိသန္ဓေစိတ် ဖြစ်တာပဲ၊ ဒါပေမယ်လို့ သူဖြစ်တာဟာ ပထမကိုယ့်သန္တာန်မှာ ဆက်ပြီးတော့ ဖြစ်တာ မဟုတ်ဘူး။ ကံအားလျော်စွာ တခြားဌာနမှာ သွားဖြစ်တာ။ဝေးချင်ဝေး နီးချင်နီး ချက်ချင်းဖြစ်တာပဲ။
အခြားလည်း မရှိဘူး။စုတိစိတ် ဆုံးတာနဲ့
ပဋိသန္ဓေစိတ် ဖြစ်တာပဲ။
ဘဝသစ်မှာ
။ တရားထူးကို မသိရင် ရုပ်နာမ်အစဉ်က မငြိမ်းဘူး။ ပဋိသန္ဓေကနေပြီး တစ်ဘဝလုံး
စိတ်တွေ မပြတ်ဖြစ် သွားတယ်။
နောက်ဆုံးကျ စုတိစိတ်ရောက်ပြန်ပြီ၊
သေခါနီး စွဲတဲ့အာရုံကလေး အာရုံပြု ပြီးတော့ ဘဝသစ်မှာ ပဋိသန္ဓေစိတ် ကလေး ဖြစ်ပြန်ပြီတဲ့။
ဖြစ်တဲ့အခါလည်းဖြစ်တယ်
။ အဲဒီလိုချည်း ဖြစ်နေတာ၊ ကံအားလျော် စွာ
ငရဲဖြစ်တဲ့အခါလည်း ဖြစ်၊တိရစ္ဆာန်ဖြစ်တဲ့အခါလည်း ဖြစ်၊ ပြိတ္တာဖြစ်တဲ့အခါလည်း ဖြစ်၊အသူရကယ်ဖြစ်တဲ့အခါလည်း ဖြစ်၊
လူ့ဘဝဖြစ်တဲ့အခါလည်း ဖြစ်၊နတ်ဘဝဖြစ်တဲ့အခါလည်း ဖြစ်၊နတ်ပြည်ခြောက်ထပ်ဌာနတွေ ဖြစ်တဲ့အခါလည်း ဖြစ် ဈာန်ရလို့ရှိရင် ဗြဟ္မာပြည်မှာဖြစ်တဲ့အခါလည်း ဖြစ်တယ်။
သံသရာဆင်းရဲ
။ နောက်ဆုံးတစ်နေ့ကျ ဖြစ်ရာဘဝမှာ
အိုရတယ် နာရ တယ်, သေရတယ်။ သေပြီးလို့ရှိရင် ဘဝသစ် ဖြစ်ပြန်တယ်။ အဲဒီလို ဆင်းရဲတွေ တွေ့နေရတယ်။ အဲဒါ သံသရာဆင်းရဲတွေ တဲ့။
သံသရာလို့ခေါ်
။ သံသရာဆိုတာ ရုပ်နာမ်အစဉ်၊ပဋိသန္ဓေက နေပြီး တော့ စုတိစိတ်တိုင်အောင် စိတ်တွေအစဉ်မပြတ် ဖြစ်တယ်။ အဲဒီစုတိစိတ်က ပြတ်သွားပေမယ်လို့ နောက်ထပ် ပဋိသန္ဓေ စိတ်က နေပြီးတော့တစ်ဘဝလုံး ဖြစ်သွားပြန်ရော။ အဲဒီလို စိတ်အစဉ်တွေ မပြတ်ဖြစ်နေရာကို သံသရာလို့ ခေါ်တယ်။
ရုပ်နာမ်အစဉ်တွေပြတ်စဲသွားတဲ့အခါ
။ တရားအားမထုတ်လို့ တရားထူးကို မသိလို့ရှိရင် ဒီရုပ်နာမ်အစဉ်က ဘယ်တော့မှ မငြိမ်းဘူး။ကိလေသာ ရှိနေရင် တစ်ဘဝကသေရင်
တစ်ဘဝဖြစ် တစ်ဘဝကသေရင် တစ်ဘဝ ဖြစ်၊ ရုပ်နာမ်အစဉ်တွေ မပြတ် ဖြစ်သွားနေတာ။ တရားအားမထုတ်တဲ့ ပုဂ္ဂိုလ်တွေမှာ
ရုပ်နာမ်အစဉ်သံသရာကြီးက ရှည်တယ်။
တရားအားထုတ်တဲ့ ပုဂ္ဂိုလ်တွေမှာ ရဟန္တာဖြစ်ပြီးတော့ ရုပ်နာမ်အစဉ်တွေ ပြတ်စဲသွား
တယ်၊ ပြတ်စဲသွားတဲ့အခါ နိဗ္ဗာန် ရောက်တာပဲ။
ကြောက်စရာ
။အဲဒီတော့ ရုပ်နာမ်အစဉ်တွေ မပြတ်ဖြစ်နေတာ ဒီဘက်ကမ်းပဲ။ဒီဘက်ကမ်းမှာ အိုရမယ်၊နာရမယ်၊သေရမယ်၊စိုးရိမ်ပူဆွေးရမယ်၊ငိုကြွေးရမယ်၊ကိုယ်ဆင်းရဲ စိတ်ဆင်းရဲ
အမျိုးမျိုးတွေလည်း ဖြစ်ရမယ်။ ဘဝတိုင်း
ဘဝတိုင်း ဒီဆင်းရဲတွေကို တွေ့နေရမယ်။
ဒါကြောင့် ဒီဘက်ကမ်းဆိုတဲ့ ရုပ်နာမ်
အစဉ် သံသရာဟာ ဆင်းရဲတွေနဲ့ ကြောက်စရာကောင်းတယ်။
တခြားနည်းနဲ့မငြိမ်းဘူး
။ ရုပ်နာမ်အစဉ်တွေ ချုပ်ငြိမ်းတဲ့ နိဗ္ဗာန်ဟာ
ဟိုဘက်ကမ်း တဲ့၊ တရားနှလုံးသွင်းအားထုတ်လို့ ကိလေသာတွေ ကင်းသွားပြီးတဲ့ ရဟန္တာပုဂ္ဂိုလ်မှာစွဲလမ်းမှု မရှိတော့ ကံကလည်း အကျိုး မပေးဘူး။ပရိနိဗ္ဗာန်ဆုံးသွားတာနဲ့ နောက်ထပ်ဘဝအသစ် ရုပ်နာမ်ခန္ဓာတွေ မဖြစ်လာတော့ဘူး။ ဆင်းရဲခပ်သိမ်း အကုန် ငြိမ်းတာ၊ဒီပုံ ဒီနည်းဖြင့်သာ ငြိမ်းတာ၊ တခြားနည်းနဲ့ မငြိမ်းဘူး။
ဒီလိုဟောကြတယ်
။ ဗုဒ္ဓဘာသာအပြင်ဘက်က ဘာသာခြားတွေက ဘယ့် နှယ်ဟောထားသလဲဆိုရင်
ဘုရားသခင်က ဖန်ဆင်းတယ်။ဘုရားသခင်ကို ကိုးကွယ်နေလို့ရှိရင်
ဘုရားသခင်က ကောင်းကင်ကို ကယ်တင်တယ်။ကောင်းကင်ဘုံမှာ ရောက်ပြီးတော့ မအို မနာ,မသေ အမြဲတည်နေရတယ်တဲ့ ဒီလိုဟောကြတယ်။
ဘဝအသစ်ဖြစ်ရင်
။ ဒါ ယုံကြည်ပြီးတော့ အဲဒီဘာသာဝင်တွေက သဘောကျတယ်။ သူတို့ယုံတဲ့အတိုင်း
တကယ်ရှိ မရှိကို ဆင်ခြင်ကြည့် နိုင်တယ်။
ရုပ်နာမ်တွေဟာ ဖြစ်ရင် ပျက်ရတာချည်းပဲ၊
ဖြစ်ပြီးမပျက်တာ ဘယ်ဟာမှ မရှိဘူး။
ကောင်းကင်ဘုံဆိုတာ တခြား မဟုတ်ဘူး,
နတ်ဘုံဖြစ်မှာပေါ့။သူက ကာမဂုဏ်အာရုံတွေ ခံစားနေနိုင်တာပဲ၊အဖိုအမတွေ အစုံရှိတာပဲ။ကာမဂုဏ်တွေ ခံစားနေရတာကို
ချမ်းသာနေတာလို့ သူတို့က ဒီလိုပြောတယ်။
အဲဒီနတ်ဘုံမှာလည်း သေရတာပါပဲ။
ဗြဟ္မာဘုံမှာလည်း သေရ တာပဲ။ ဘဝအသစ်ဖြစ်ရင် သေရတာချည်းပဲ။
နိဗ္ဗာန်ရောက်မှငြိမ်းတယ်
။ အဲဒီတော့ ဘဝသစ် ဖြစ်ကတည်းက
အဲဒီဘဝဆိုင်ရာ ဖြစ်တဲ့ ဆင်းရဲတွေ
ခံစားရတော့မယ်ဆိုတာ သေချာတယ်။
အဲဒီတော့ ဆင်းရဲတွေ ငြိမ်းတာက
နိဗ္ဗာန်ဆိုတဲ့ ဟိုဘက်ကမ်းပဲ။
နိဗ္ဗာန်ရောက်မှ ငြိမ်းတယ်။
( မဟာစည်ဆရာတော်ဘုရားကြီး)
Categories
။ အတ္တာနံ ဥပမံကတွာ ။
~~~~~~~~~~~~~~~~
။ ကိုယ်နှင့်လည်းစာ
သတ္တဝါကို
ကြင်နာလှစေ
သူ့အသက်ကို ချစ်ပါလေ။
( ရှင်မဟာရဋ္ဌသာရ)
(၅.၈.၂၀၂၅) ရက်နေ့။
~~~~~~~~~~~~~~~~~~~~
( မင်္ဂလာ လာခုဂ်ခါင်.စူး )
။ လှပကြည်ဖြူ
စိတ်ရင်းဖြူကြ
ချည်ဖြူမင်္ဂလာ ဝါခေါင်လ။
။ မြတ်မေတ္တာနေ့
မြတ်ဓလေ့မို့
ပျော်မွေ့မင်္ဂလာ ဝါခေါင်လ။
။ ဘေးကင်းရန်ကွာ
စိတ်ချမ်းသာစေ
သူငါဆုပေး ဝါခေါင်လ။
။ ကရင့်မျိုးနွယ်
လှမျိုးကြွယ်သည်
တင့်တယ်ပေါင်းစည်း ဝါခေါင်လ။
( ဝါခေါင်လပြည့် ကရင်အမျိုးသား ချည်ဖြူဖွဲ့မင်္ဂလာနေ့သို့ ရည်စူးဖွဲ့ဆိုပါသည်။)
တောင်ကလေးဆရာတော်
(၃.၈.၂၀၂၅) ရက်နေ့ ။
Categories
စုအိအိသွန်း
Categories
အိမြခြယ်
အိမြခြယ်
သည်နာမည်
ဂုဏ်တင့်လှပါတယ်။
တောင်ကလေးဆရာတော်
(၂၇.၇.၂၀၂၅) ရက်နေ့။
Categories
။ ကျောင်းတော်မြတ်သို့ ။
။သဘာဝကျကျ
နေကြရသည်
ချမ်းမြပါသော ကျောင်းတော်မြတ်။
။ ကိုယ်စိတ်ဣန္ဒြေ
သိမ်မွေ့ပေသည်
အမွေရကြ ကျောင်းတော်မြတ်။
။ မြတ်စွာဗုဒ္ဓ
ပရိယတ်တည်
ဓမ္မသိကြ ကျောင်းတော်မြတ်။
။ ကြည်နူးအေးရိပ်
တိတ်ဆိတ်ပါသည်
တည်ကြည်အေးမြ ကျောင်းတော်မြတ်။
။ ဤကျောင်းတော်မြတ်
ရောက်ခဲ့ကြသည်
သတိရအောက်မေ့ ကျောင်းတော်မြတ်။
တောမှီရဟန်း
(၃၁.၇.၂၀၂၅) ရက်နေ့။
Categories
။ သတိရလိုက်ပါ ။
။ သတိရလိုက်ပါ ။
~~~~~~~~~~~~~~
။ နေရတဲ့အချိန်လေးမှာ
ဝန်လေးတဲ့တာဝန်တွေနဲ့
မယူမိဖို့ပါပဲ။
။ ဝန်လေးလံတဲ့သူဟာ
ထမ်းရွက်ရတဲ့ဝန်ကြောင့်
မသက်သာရပါဘူး။
။ အသက်ကလေးရှင်နေစဉ်မှာ
အေးအေးဆေးဆေးနဲ့
တာဝန်သိတတ်တဲ့
အဖော်ကောင်းနဲ့
နေကြရဖို့တွေးမိကြမှာပါ။
။ အတူတူနေကြတဲ့
တစ်အိမ်တည်းကအဖော်တွေ
တစ်မိသားစုတည်းကအဖော်တွေ
ဝန်လေးလေးနဲ့
ဖေးမလက်တွဲရတာ
စိတ်ဒဏ်ရာတွေများနေကြပြီလားပါပဲ။
။ ဘဝဆိုတာ
မေတ်တာ တရားနဲ့
မလုံလောက်ပါဘူး
သစ္စာတရားနဲ့လည်း
မဖြေဖျောက်နိုင်ကြပါဘူး
အကြင်နာတရားတွေနဲ့လည်း
အကုန်မပြည့်စုံနိုင်ကြပါဘူးလေ။
။ ရိုးရိုးရှင်းရှင်းနဲ့
သူတစ်ပါးတွေနဲ့ ကင်းကင်းလေးနဲ့
ကိုယ့်အားနဲ့ကိုယ်နဲ့
စိတ်အလင်းသစ်သစ်လေးနဲ့ပဲ
နေသွားဖို့ပါပဲလေ
နေရဖို့ပါပဲလေ။
ဦးအောင်ဖေ
(၂.၆.၂၀၂၅) ရက်နေ့။
Categories
။ အတတ်ပညာ သိစေရာ ။
။ အတတ်ပညာ သိစေရာ ။
~~~~~~~~~~~~~~~~~~~
။ ပညာရှိက ပြောတယ်…
. တိုင်းပြည်အတွက်
အရေးကြီးတဲ့ကိစ္စ။
. သေခြင်းနဲ့ရှင်ခြင်းတို့ရဲ့
ရပ်ဝန်း။
. ရှင်သန်ကျန်ရစ်ခြင်းရဲ့
လမ်းတစ်လမ်း။
. စေ့စပ်သေချာစွာ တွေးခေါ်ရမယ့်
အကြောင်းတစ်ရပ်။
။ နှိုင်းယှဉ်သုံးသပ်ဖို့နဲ့
အခြေအနေကို စိစစ်အကဲဖြတ်ဖို့
သေသေချာချာ တွေးဆကြည့်ရမယ့်
အခြေခံအချက် ငါးခု ရှိတယ်။
၁) လမ်းစဉ်၊
၂) ပတ်ဝန်းကျင်၊
၃) နေရာ၊
၄) အမိန့်အာဏာ၊
၅) စည်းကမ်းနည်းလမ်း။
။ ၁) လမ်းစဉ်က
လူသားကို
အုပ်ချုပ်သူနဲ့
တစ်စိတ်တစ်သဘော
ဖြစ်စေတယ်။
နေအတူ သေအတူ ဖြစ်စေတယ်။
ဘယ်သော်မှ
ရှောင်ပြေးပုန်းတာမျိုး မဖြစ်ဘူး။
။ ၂) ပတ်ဝန်းကျင်က
သူ့အချင်းအရာနဲ့သူ
အအေးနဲ့အပူ
ရာသီစက်ဝန်း လှည့်ပတ်နေမှုပါပဲ။
။ ၃) နေရာက
နိမ့်မြင့်နဲ့အကျယ်အဝန်း
အနီးနဲ့အဝေး
စိုးရိမ်မှုနဲ့မစိုးရိမ်မှု
ဟင်းလင်းပြင်နဲ့ ကန့်သတ်မှုမြေသား
အသက်ရှင်ခြင်းနဲ့သေခြင်းတို့ပါပဲ။
။ ၄) အမိန့်အာဏာဆိုတာက
ဉာဏ်ပညာ
သစ္စာ
ကရုဏာ
ရဲစွမ်းသတ္တိ
တိကျပြတ်သားခြင်းပါပဲ။
။ ၅) စည်းကမ်းနည်းလမ်းဆိုတာက
စည်းလုံးရေး
ဆင့်ကဲတာဝန်ယူရေး
ဝတ္တရားခံယူတတ်မှုနဲ့
အသုံးအဆောင်များ
ထိန်းသိမ်းရေးတွေပါပဲ။
။ ဒီအချက်ငါးရပ်ကို
သိတယ်
သိမယ်
နားလည်မယ်
သိကြမယ်ဆိုရင်
ဆုတ်ယုတ်နစ်နာခြင်း မရှိပါ။
( ငယ်ငယ်က ကူးယူခဲ့ဖူးတဲ့မှတ်စု။)
တောင်ကလေးဆရာတော်
(၃.၃.၂၀၂၅) ရက်နေ့။
Categories
။ ကိုယ်တွေ့ဇရာ ။
။ ကိုယ်တွေ့ဇရာ ။
~~~~~~~~~~~~~
နိဒါန်း
။ ဇရာဆိုသော ဝေါဟာရကို ပိဋကတ်စာပေမှာ တွေ့ရှိမှုအကြိမ်ပေါင်း(၈၆၆)ရှိကြောင်း သိရှိရပါသည်။ အဘိဓာန်စကားအရ ဇရာကို ဆွေးမြေ့အိုမင်းရင့်ရော်ခြင်း၊အိုခြင်း၊အိုမင်းခြင်း၊ယွင်းယိုခြင်းဟု ဖွင့်ဆိုပါသည်။ သတ္တဝါတိုင်း၏တောင့်တသောဆန္ဒအမှန်က “ ငါတို့သည် ဇရာသဘောမရှိကြကုန်မူ ကောင်းလေစွ၊ဇရာသည် ငါတို့ထံမရောက်လာမူ ( မလာမူကား) ကောင်းလေစွ” ဟု ဇရာကိုတင်ပြခဲ့သောကျမ်းစာတို့က ပြခဲ့သည်။
ပြထားပါသည်
။ ဇရာသုတ္တနိဒ္ဒေသမှာ ” ဤအသက်သည် နည်းပါး၏၊တိုတောင်း၏၊အနှစ်တစ်ရာအတွင်း၌လည်း သေတတ်၏။အကယ်၍အနှစ်တစ်ရာအတွင်းကိုလွန်၍ အသက်ရှည်စေသော်( စေကာမူ)ထိုသို့အသက်တစ်ရာလွန်၍ အသက်ရှည်ငြားသော်လည်း ထိုသူသည် အိုသဖြင့်လည်း သေရ၏” ဟုပြထားပါသည်။
ခံစားတွေ့မြင်
။ ဤအရှင်ကိုယ်သည် အသက်(၆၀) ပြည့်နှစ်ရောက်သောအခါ ထင်ရှားသောခန္ဓာငါးပါးပြောင်းလဲမှုများကို သိရသည်။ ခန္ဓာငါးပါးသည် သဘာဝကျကျပြောင်းလဲနေသည်ကို အထင်အရှားခံစားရသည်။ မည်သို့မည်ပုံခံစားသိမြင်ရသည်ဆိုသည်မှာ ခန္ဓာငါးပါး၏ ဇရာပိုငျးပွောငျးလဲပုဲသညျ သိသာထင်ရှားစွာ ခံစားတွေ့မြင်ရသည်။
သိရသည်
။ ရင့်ရော်မှုဇရာနှင့်ပတ်သက်၍ စာပေကျမ်းဂန်ထဲကပြထားသည့်အတိုင်း ” သွား,ခြေသည်းလက်သည်းတို၏ကျိုးသည့်အဖြစ်၊ဆံပင်,မွေးညင်းတို့သည်ဖြူသည့်အဖြစ်၊အရေတွန့်သည့်အဖြစ်၊အသက်အရွယ်ဆုတ်ယုတ်လာခြင်းအဖြစ်” အထင်အရှားသိလာသည့်အပြင် မိမိရုပ်ခန္ဓာသည် ရင့်ရော်မှုများ အမျိုးမျိုးပြသည်။ ခံစားရသည်။ သိရသည်။
ပွင့်လင်းစွာ
။ ယင်းအဖြစ်မျိုးကို ခံစားသိမြင်ကြသူများ ရှိ,မရှိ၊တူ,မတူ အသက်အရွယ်ဖြစ်လာကြသူများကို မေးကြည့်သောအခါ အသက်ရရှိသူတိုင်းက ဇရာအကြောင်းကို ကိုယ်တွေ့သိမြင်ခံစားရသည့်အကြောင်းကို ပွင့်လင်းစွာ ရှင်းပြကြပါသည်။
ဝေဖန်ထားသည်
။ အနောက်နိုင်ငံသားအချို့လည်း ဇရာကို တင်ပြခဲကြသည်။ အရာဝတ္ထုမှန်သမျှ မကောင်းသဖြင့်ပြောင်းလဲကြောင်း၊သုခချမ်းသာအတွက်လည်း မကောင်းသဖြင့်ပြောင်းလဲကြောင်း၊ပေါက်ဖွားလာမှုမှန်သမျှအိုမင်းရင့်ရော်မှု၊သေဆုံးမှုတို့၏အကြောင်းဖြစ်ကြောင်း၊ဒုက္ခဖြင့်ချီတက်လေသမျှ အဘယ်မည်သောချမ်းသာမှုများ ရှိနိုင်အံ့ ‘ စသည်ဖြင့်ဝေဖန်ထားသည်ကိုတွေ့ရပါသည်။
အထင်အရှားသိမြင်
။ မှန်ပါသည် ၊ သတ္တဝါမှန်သမျှ ရုပ်ခန္ဓကိုယ်သည် အနာရောဂါဖြစ်လာရေးအတွက်သာ ရှိနေ၏။ ခန္ဓာကြီးသည် အနာရောဂါပေါက်ဖွားလာရာ မြေလွှာများနှင့်တူ၏။ ခန္ဓာငါးပါးသည် ဆင်းရဲခြင်းအစုအပုံဖြစ်သည်မှတစ်ပါး အခြားအဘယ်မှမဟုတ်ပါပြီ, ဆိုသည်ကို မိမိကိုယ်မိမိ အထင်အရှားသိမြင်ခဲ့ရသည်။
သံဝေဂဉာဏ်
။ နှစ်သက်ဖွယ်အာရုံနှင့်ပတ်သက်လျှင်လည်း ပွင့်လာသောပန်းများပမာသာဖြစ်၏။သည်အကြောင်းအရာကို ကိုယ်ပိုင်တွေ့မြင်ခံစားသိလာရသောအခါ ထိပါးပုတ်ခတ်မှုများ၊နာကျင်စွာခံစားရမှုများနှင့် မိမိ၏အသက်တည်ရှိရာကာလအပိုင်းအခြားကို ရှင်ပြီး၊ရှင်နေဆဲ၊ရှင်လတ္တံ့ခန္ဓာအကြောင်းကို သိုမှီးသိမ်းဆည်းထားရခြင်း မဖြစ်နိုင်မှုကို သိမြင်လာ၍ ခန္ဓာငါးပါးဆင်းရဲခြင်းကို သံဝေဂဉာဏ်မြဲစွာယူထားခဲ့ပါသည်။
မတောင့်တ
။ ရင့်ရော်မှုဇရာ၏သဘာဝကျကျဖောက်ပြန်ပြောင်းလဲပုံကို မျက်စိဖြင့်မမြင်ရသော်လည်း ကိုယ်ပိုင်ဆင်ခြင်သောဉာဏ်
ဖြင့် သိနိုင်ကြ၏။ ရေလေတို့ကြောင့်ပျက်စီးသောသစ်ရွက်တို့သည် ပျက်စီးရာလမ်းကြောင်း ထင်ရှားစွာမြင်ရသကဲ့သို့ ခန္ဓာကိုယ် ဣန္ဒြေကြီးရင့်ရော်လာမှုသည် သိသာစွာသိမြင်လာခဲ့ရသည်။ ထင်ရှားစွာရင့်ရော်မှု၊ကွယ်ဝှက်စွာရင့်ရော်မှု သိမြင်လာခဲ့ရသောကြောင့် မိမိသည် ခန္ဓာအဖန်ဖန်ရရှိနေခြင်းကို မတောင့်တမိပြီ။
ရေးသားခဲ့
။ အရှင်သည် ယခုအသက်(၆၅) နှစ်ရောက်လာသောအခါ အရှင်ခန္ဓာသည် အဝိ
စိဇရာ( အကြားမရှိသောဇရာ) နှင့် သဝိစိဇရာ( အကြားရှိသောဇရာ) တို့၏သဘောကို အထင်အရှားပိုမြင်လာခဲ့ရ၏။ ယခုစာရိုက်နေသောအချိန်သည် မိမိ၏ရုပ်ဇရာဖြစ်တည်မျိးကို သိသာထင်ရှားစွာ ဝေဒနာခံစားနေရ၏။ ဖြစ်တတ်သောဇရာကို ကိုယ်တိုင်ခံစားသိမြင်လာခဲ့သည်ကြောင့် ငြိမ်သက်သွာဆင်ခြင်ပွားများလျက် စာလုံးဖြစ်လာအောင် ရေးခဲ့လေ၏။
သတိပြန်ထား
။ ဇရာ၏လက္ခဏာသည်
၁) ခန္ဓာငါးပါး၏ ရင့်ကျက်ခြင်းလက္ခဏာ၊
၂) သေ့ခြင်းသို့ ရှေးရှုခြင်းလက္ခဏာ၊
၃) အရွယ်ကိုဖျက်ဆီးခြင်း အခြင်းအရာသာရှိသည်ကြောင့် သိမြင်ထားပါသည်။ မနေ့က အသက်(၁၈) နှစ်သားအရွယ်ကဓာတ်ပုံကိုပြန်တွေ့မိ၍ မိမိပုံသည် ချစ်မြတ်နိုးဖွယ်ရာပါတည်းဟု နှလုံးသွင်းမိပြီး ‘ အော် ပုံပြောင်းနေပါပြီပေါ့လား’ ဟူ၍ သတိပြန်ထားမိနေသည်။
ဇရာဒုက္ခ
။ ဇရာသည် ဒုက္ခ၏အကြောင်းရင်းဖြစ်သောတရား၊ကိုယ်,စိတ်ဆင်းရဲခြင်း၏ အကြောင်းရင်းတရားဖြစ်သည်။ မိမိသည် လှည်းအိုကြီးပမာကဲ့သို့ အင်အားနည်းလာသည်။ မတ်တတ်ရပ်ဖို့ ၊ လမ်းလျှောက်ဖို့အတွက် ကြီးစွာသောဒုက္ခဖြစ်လာသည်။ တပည့်ဒါယကာ သို့မဟုတ် သားသမီးများက မိမိ၏စကားကိုမမှတ်မသား အရေးမထားလာပြန်သော် စိတ်ဆင်းရဲခြင်း စေတသိကဒုက္ခဖြစ်လာရ၏။ ကိုယ်ဆင်းရဲ စိတ်ဆင်းရဲခြင်းသည် ” ဇရာဒုက္ခ” ဟူ၍သိထားရမည်ဖြစ်၏။
ဇရာဟူသမျှ
။ အရှင်သည် ကိုယ်လက်အင်္ဂါများ သိသိသာသာလျော့ကျလာနေသည်မှာ ပိုထင်ရှားသည်။ ဣန္ဒြေအမျိုးမျိုးဖောက်ပြန်လာနေသည်ကြောင့် အရွယ်၊သတိ ချို့ယွင်းပျက်ပြားလာနေကြောင်းကို သိလာရသည်။ မေ့တတ်လာကြောင်းကို သိလာသည်။ နောက်ဆုံး၌ ဇရာဟူသမျှ ” ဒုက္ခ” ဖြစ်နေတော့၏။
။ နိဂုံး
ငါ ဟူသော (မာန)
ငါ၏ဥစ္စာဟူသော (တဏှာ)
ငါ၏အတ္တ(ဒိဋ္ဌိ) ဟူသော အတွေးစိတ်ဟူသမျှမှာ ရုပ်၊ဝေဒနာ၊သညာ၊သင်္ခါရ၊ဝိညာဏ်တို့ကို စွဲလမ်းမှီတွယ်ပြီးဖြစ်ပေါ်လာသည့် အတွေးတို့သည်သာ ဖြစ်သည်။ စင်စစ် ဇရာကို ယိုးမယ်ဖွဲ့၍ မရပါကြောင်း သိထားနေပါပြီ။
တောင်ကလေးဆရာတော်
(၂.၃.၂၀၂၅) ရက်နေ့။