မဟာပညာ

အဲးခိုး

မြန်မာလူမှုရေးဟာ တစ်စုတစ်စည်းတည်း ပြန်ရောက်ဖို့. … ကောင်းမွန်သောအချင်းချင်း သင့်မြတ်ရေးအတွက် အရှင်တို့မဖြစ်မနေ ဆောင်ရွက်လုပ်ကိုင်ရမယ်။ အရေးကြီးတဲ့အရေးကို အရေးမစိုက်ကြဘဲ ဖြစ်နေ (ရှိနေ) ရင် အရှင်တို့ မြန်မာပြည်ဟာ စရိုက်ကြမ်းတဲ့ ဥပဒေမဲ့ပြုမူချက် မူဝါဒရှင်တွေ များစွာဖြစ်လာမှာပါပဲ … 

အတွဲ(၁၁)၊ အမှတ်(၃၇)၊ မြန်မာသက္ကရာဇ် ၁၃၈၄၊ နတ်တော်လပြည့်ကျော် ၂ ၊ ၉ – ၁၂- ၂ဝ၂၂၊ မြန်မာသံတော်ဆင့် (The Myanmar Herald) မှ ကောက်နုတ်ဖော်ပြခြင်းဖြစ်သည်။

(ယခင်တစ်ပတ်မှအဆက်) 

သတိပြုစရာအချက်များ

လူဆိုတာ ကြွယ်ဝချမ်းသာရေးကို မလိုလားတဲ့သတ္တဝါတွေ မဟုတ်ကြပါ။ လူတန်းစားတူညီတဲ့ သာတူညီမျှရှိတဲ့ အလေ့အကျင့်နဲ့ ကိုယ်ကျိုးစွန့်တဲ့အလေ့ အထရှိတဲ့လူသားတွေပါ။ ဒီလို အကြောင်းအရာတွေဟာ လူသားတွေရဲ့ မူလရည်ရွယ်ချက် ခေတ်စနစ်ပါလို့ ဒီခေတ်ကြီးမှာ ဘယ်လိုပြောပြော၊ ကိုယ်တွေ့အားဖြင့် ဘယ်သူမှ လိုက်လျောကျင့်သုံး ဆောက်တည်လိုကြတဲ့ ဆန္ဒတွေမရှိကြပါ။ လူ့အဖွဲ့အစည်းကို သဘောတရားမဲ့၊ ဝါဒမဲ့ခြင်းကိုသာ အလေးထားချင်ကြတယ်။ အမျိုးသားရေးဝါဒကို ကြိုးစားကာကွယ် ထိန်းသိမ်းရမယ်လို့ပြောရင် ယုံကြည်မှုမရှိကြဘဲ ကဲ့ရဲ့ပြစ်တင်လို့ မဆုံးအောင် ပါပဲ။ ဒီသဘောတရားမျိုးဟာ မြန်မာ့နိုင်ငံရေးလောကနဲ့ မြန်မာ့လူမှုလောကမှာ အများဆုံးမြင်တွေ့ရပါတယ်။ အဲဒီ အတွေးအမြင်တွေကြောင့် မြန်မာဟာ သင့်တင့်လျောက်ပတ်တဲ့ဘဝ မရောက်ကြဘဲ လူတစ်စုသား (လူတစ်စုစား) ထိန်းချုပ်ထားတဲ့ နိုင်ငံရေးလောက ရောက်ခဲ့ရတယ်။ သတိပြုပေါ့ ပြည်သူတို့ရယ်။ 

ကမ္ဘာသိ လူသိဖြစ်လာမည် 

မြန်မာပြည်ဟာ သဘာဝအရင်းအမြစ်တွေလည်း တဖြည်းဖြည်း ရှားပါးလာနေကြပြီ။ အခွင့်ကောင်းယူနိုင်တဲ့ တိုင်းပြည်တွေကလည်း နိုင်ငံပိုင်နက်ထဲမှာ ဝင်လာပြီး အခွင့်အလမ်းကောင်းတွေကို ယူကြလို့ အကြောက်အရွံ့မဲ့ပါပဲ။ လိုချင်တဲ့အတိုင်းရနေတော့ မြန်မာ့စီးပွားရေးဟာ ခေါင်းပုံဖြတ်ခွင့်ပေးတဲ့ အခွင့်အလမ်းတွေ ပေးနေသလိုမျိုးပဲ ၂၀၁၅ မှ ၂ဝ၂ဝ ပြည့်နှစ်တိုင်အောင် တွေ့မြင်ရတယ်။ တချို့အရပ်ဒေသတွေမှာ (ဒေသအချို့) မှာ စိတ်ကြိုက်ခြယ်လှယ်နိုင်တဲ့ အဆင့်အထိ ရောက်သွားတယ်။

နိုင်ငံတော်အတွင်းမှာရှိတဲ့ ဒေသန္တရအရေးကို စုပေါင်းကာကွယ်ရမယ် ဆိုတာကို မသိသလိုလုပ်လို့ ပြင်ပတိုင်းပြည်ကလာတဲ့ အခွင့်ကောင်း ယူချင်တဲ့သူတွေနဲ့ စားကွက်တွေ ဖန်တီးဖော်ဆောင်ပေးကြတယ်။ ဒီကြားမှာ ဘာသာရေးအောင်ပွဲ ဆင်ယင်နေတဲ့သူတွေအတွက် အစိုးရအဖွဲ့အစည်းကိုယ်တိုင်က အခွင့်အရေး ပေးထားတဲ့အတိုင်းပဲ အားမနာတမ်း အခွင့်အရေးတွေ ယူဆောင်ကြတယ်။ နိုင်ငံရေးဈေးကွက်ကို မျက်စိကျနေတဲ့ သူတို့တွေက ငွေရင်းနဲ့ရနိုင်တဲ့ နည်းပညာနဲ့ အစိုးရကို ချည်းကပ်ထားတယ်။ အစိုးရအဖွဲ့အစည်းတွေကလည်း ကြောက်မက်ဖွယ် (ကြောက်မက်စရာ) ဖြစ်တဲ့သူတို့ရဲ့ ချဉ်းကပ်မှုကို မသိမမြင်ကြတော့ နောက်ဆုံးတော့ အရှင်တို့ မြန်မာပြည်ဟာ သမားရိုးကျ ဒီမိုကရေစီကို လိုလားတဲ့ဘဝကို စွန့်လွှတ်ခဲ့ရတဲ့ အခြေအနေအထိ ရောက်ခဲ့ရတယ်။

ယခု ဖော်ပြခဲ့တဲ့ အချက်တွေဟာ ဒီအချိန်မှာ လူတိုင်းလက်မခံနိုင်ပါဘူး။ သို့သော် နောင်တစ်ချိန်မှာ ကမ္ဘာသိ လူသိ ဖြစ်လာမှာပါပဲ။ 

ကစားကွက်ကြီးဒဏ် 

ခေတ်ကာလ အခြေအနေဟာ လည်မျို ညှစ်ထားနိုင်ရေး အတွက်ကို ကြည့်ပြီး ဖြစ်နိုင်သည့်နည်းလမ်းတွေနဲ့ အရာရာတိုင်းကို (လိုချင်တိုင်းကို) စီးပွားရေးမျက်နှာ ဖွင့်ထားကြတယ်။ ပဋိပက္ခတွေကလည်း ကြာလေ ထုထည်ကြီးလေတော့ ပြဿနာပေါင်းစုံလာနေတယ်။ မြန်မာပြည် အခြေအနေကတော့ အဆိုးဆုံးပါပဲ။ ရှည်ကြာသည့် နိုင်ငံရေး ကစားကွက်တွေဟာ နိုင်ငံတိုင်းလိုလို ဖြစ်လာတယ်။

ကိုယ့်ကိုယ်ကို ကာကွယ်တဲ့ တိုင်းပြည်တွေက နိုင်ငံရေးကစားကွက်ကြီးတဲ့ နိုင်ငံတွေရဲ့ဒဏ်ကို ခံစားလာကြရတယ်။ ဘယ်လို ခံစားနေကြရသလဲဆိုရင် ခုခံ တိုက်ခိုက်နေတဲ့အုပ်စုကို ကူညီထောက်ပံ့ အားပေးအားမြှောက်တဲ့ ဒဏ်၊ အတိုင်းအဆမရှိ ငွေထောက်ပံ့ပေးတဲ့ ဒဏ်၊ လူ့အခွင့်အရေးကို အကြောင်းပြပြီး နည်းပေါင်းစုံ စွက်ဖက်စေတဲ့ဒဏ်အပြင် ဒီမိုကရေစီနိုင်ငံရေးကို ဖယ်ရှားဖို့ ကြိုးစားစေတဲ့ဒဏ်နဲ့ ဒါတွေမကဘဲ ယုတ်စွအဆုံး အခြေခံကျတဲ့ အမျိုးသားအကျိုး စီးပွားကာကွယ်ရေးကို ရှုပ်ထွေးအောင် ဖျက်ဆီးစေတဲ့ဒဏ်ပါ ခံစားလာကြရတယ်။ ဒီလို အမျိုးသားရေးအပေါ် ခေါင်းပုံဖြတ် အသုံးချလာနိုင်တာကြောင့် နိုင်ငံတိုင်းလိုလိုဟာ အမျိုးသားရေး အကျိုးတွေ တဖြည်းဖြည်းနဲ့ စွန့်လွှတ်လာခဲ့ကြရတယ်။ မြန်မာပြည် အနေနဲ့ကတော့ တားမနိုင် ဆီးမရလောက်အောင်ပါပဲ။

နိုင်ငံရေးအဖျက်ကျွမ်းကျင်တဲ့ ရှုပ်ထွေးမူဒဏ်ဟာ တဖြည်းဖြည်း ဆိုက်ရောက်လာတဲ့ ကမ္ဘာကြီးဟာ အနာဂတ်ကာလ အဓိပ္ပာယ်မဲ့စွာ အချည်းနှီး ဖြစ်ကြတော့ မည်လားဆိုတာကို တွေးမိပါလေရဲ့။ 

နိုင်ငံရေးနိမိတ်သစ်

အရှင်တို့နေထိုင်တဲ့ ကမ္ဘာကြီးဟာ ကမ္ဘာကြီးတစ်ပြင်လုံး စစ်တလင်းပြင်ကြီး ဖြစ်လာအောင် ပုံစံသစ် စစ်ပွဲတွေ ကြိုးစားနေကြပြီလားဆိုတာကို တွေးမိကြမှာပါ။ စာရေးဆရာတစ်ဦးက “စစ်ပွဲ ဆိုသည်မှာ မည်သည့်အရာနှင့်မျှ နှိုင်းယှဉ်၍မရသော သာမန်ထူးခြားသည့် လူသတ်ပွဲကြီးဖြစ်သည်” ဟု ‘George Friedman’s The Next 100 Year’ ဆိုထားခဲ့တာ မြင်ရတယ်။ ခေတ်သစ်ကာလမှာ အကယ်၍ ကမ္ဘာ့စစ်ပွဲကြီးများ ဖြစ်လာခဲ့ရင် လူ့အဖွဲ့အစည်းတွေဟာ စစ်အောင်နိုင်ရေးအတွက် ဘယ်လောက်များ သေကျေပျက်စီး ကြရမည်လဲဆိုတာကို ဆန်းသစ် တီထွင်ထားကြတဲ့ အဏုမြူလက်နက်ကို ကြည့်ရင်သိနိုင်ပါတယ်။ အာကာသထဲ စစ်ရေးလှုပ်ရှားပိုင်ခွင့်ရချင်တဲ့ နိုင်ငံတွေက ကြိုတင် ပြင်ဆင်ထားကြတယ်။

စစ်ပွဲရဲ့အရေးကြီးတဲ့ အကျိုးသက်ရောက်မှု ငြိမ်းချမ်းရေး သဘောတူစာချုပ်တွေကိုလည်း လေးစားလိုက်နာမှု မပြုချင်ကြဘဲ အကျိုးစီးပွားရရေးအတွက်ကိုပဲ အရေးစိုက်ကြမယ်။ လူမှုရေးတွေဟာ တဖြည်းဖြည်း မတည်ငြိမ်ကြတော့ဘဲ မိသားစုနေထိုင် မှုပုံစံအဖုံဖုံ ပေါ်ပေါက်လာနိုင်ပြီး ယဉ်ကျေးမှုတန်ဖိုးထားတဲ့ စိတ်ဓာတ်တွေ ပျောက်ကွယ်သွားကြမယ်။ အချင်းချင်း သဘောတရားတွေ တင်းမာကြမယ်။ ယဉ်ကျေးမှုဓလေ့ထုံးစံ ထိန်းသိမ်းကာကွယ် စောင့်ရှောက်ထားနိုင်သူတွေကို ရန်သူကြီးလို မြင်ကြမယ်။

ယုတ်စွအဆုံး ကြမ်းကြုတ်သူကို မိတ်ဆွေ၊ သစ္စာဖောက်သူကို ကယ်တင်ရှင်ကြီးပမာ အားထားကြမယ်လို့ ဆိုတဲ့အကြောင်း မဖြစ်သေးတဲ့နိုင်ငံရေး နိမိတ်သစ်တွေ ကြိုတင်ခန့်မှန်း ထားကြတယ်။ 

နောက်နှစ်ပေါင်း ၅ဝဝ ထက် 

၂ဝ၇ဝ ပြည့်နှစ်ကာလကြရင် ရွှေခေတ်ကြီး ဖြစ်မယ်ဆိုတဲ့ ရည်ရွယ်ချက် ထားတဲ့နိုင်ငံက ခေတ်မီစမ်းသပ်မှုတွေ၊ ချုပ်ကိုင်မှုတွေ၊ ခြေလှမ်းကျဲကျဲနဲ့ ကြိုးစားနေကြတယ်။ လူ့အဖွဲ့အစည်းနဲ့ ပတ်သက်တဲ့ ယဉ်ကျေးမှုအလွှာသစ် တစ်မျိုး ဖြစ်အောင်လည်း ဆွဲဆောင်မှုအပြည့်နဲ့ တက်တက်ကြွကြွ လှုပ်ရှားနေကြတယ်။ ဒီမိုကရေစီ ကမ္ဘာ့နိုင်ငံရေးဖြစ်ဖို့ (ကမ္ဘာဆန်သည့် နိုင်ငံရေးဖြစ်ဖို့) ပြိုင်ဆိုင်မှု အပြည့်နဲ့ တီထွင်ဖန်တီးထားတယ်။ ယုံကြည် အားကိုးထိုက်တဲ့ နိုင်ငံရေးဖြစ်တယ်ဆိုပြီး တရားမမျှတတဲ့ တက်ကြွမှုတွေ ယှဉ်ပြိုင်စေတယ်။ ထိခိုက်နစ်နာမှုတွေ မြန်ဆန်လာတယ်။ ဆိုးကျိုးရတဲ့ ကြိုးပမ်းချက်ဖြစ်တယ်လို့ ပြောလို့လည်းမရဘဲ ဆိုးသွမ်းတဲ့ နိုင်ငံရေးဂယက်ကို အမျိုးမျိုးလှုံ့ဆော်စေတယ်။

နိုင်ငံရေး ကိုယ်ကျိုး စီးပွားဆန်လာတဲ့ ဒီခေတ်အခြေအနေကို အရှင်တို့ မြန်မာတွေ သတိမထားဘဲရှိနေ (ဖြစ်နေ) ရင် အကျမျိုးစုံနဲ့ ခံစားကြရမှာပါပဲ။ ပိတ်ဆို့တား မြစ်မှုပေါင်းစုံလာတဲ့ မြန်မာပြည်ဟာ အတင်းအကျပ် ပြစ်မှုဒဏ်တွေ ပိုပြီးတော့ များလာတယ်။ နိုင်ငံရေးကြောင့် စီးပွားရေးပိတ်ဆို့ခံရတဲ့ အရှင်တို့တိုင်းပြည်ဟာ ထိခိုက်ဆုံးရှုံးမှု ကြီးမားနေပါပြီ။ အထူးသဖြင့် မြန်မာ့နိုင်ငံရေးကို ကမ္ဘာ့နိုင်ငံရေးလို ယှဉ်လို( သွားလို) သော ဆန္ဒကြောင့် မြန်မာဟာ ကမ္ဘာပေါ်မှာ အထိအနာဆုံးပါပဲ။

ဒါကြောင့် ရွှေခေတ်ကြီးကို မြန်မာတွေ မျှော်မှန်းချက်များ ရှိခဲ့မယ်ဆိုရင် နောက် (နောင်) နှစ်ပေါင်း ၅ဝဝ ထက်ကပဲ မျှော်မှန်းပါပေတော့။ သို့သော် မျှော်ရည်မှန်းသလိုတော့ မုချ ဖြစ်ချင်မှ (ရချင်မှ) ဖြစ်မယ်လို့ပဲ ဆိုပါရစေ။ 

‘ကမ္ဘာမကျေ၊ မြန်မာပြေ တို့ဘိုးဘွား အမွေစစ်မို့ ချစ်မြတ်နိုးပေ’ ဆိုတဲ့ နိုင်ငံတော်သီချင်း (အမျိုးသားသီချင်း) ကို သတိရတိုင်း သီဆိုဖြစ်ခဲ့တဲ့ (ရွတ်ဆိုဖြစ်ခဲ့တဲ့) အရှင်တို့တွေဟာ သည်နေ့ (ယနေ့၊ ဒီနေ့) အတွက် နက်ဖြန် (မနက်ဖြန်) ကို တို့ဘိုးဘွားအမွေစစ်မို့ မြတ်နိုးခဲ့တဲ့ နိုင်ငံချစ်စိတ်တွေဟာ အရှင်တို့ မြန်မာ့လူမှုရေးဟာ တစ်စုတစ်စည်းတည်း ပြန်ရောက်ဖို့ ဘယ်လိုများ သင့်မြတ်ရေး ဖြစ်အောင် လုပ်ကြမည်လဲဆိုတာကို စဉ်းစားခဲ့တဲ့ စဉ်းစားချက်တွေ အမျိုးမျိုး အထွေထွေပါပဲ။

ကောင်းမွန်သော မြန်မာဖြစ်ရေးနဲ့ ကောင်းမွန်သော အချင်းချင်း သင့်မြတ်ရေးအတွက် အရှင်တို့ မဖြစ်မနေ ဆောင်ရွက်လုပ်ကိုင်ရမယ်။ အရေးကြီးတဲ့ အရေးကို အရေးမစိုက်ကြဘဲ ဖြစ်နေ (ရှိနေ) ရင် အရှင်တို့ မြန်မာပြည်ဟာ စရိုက်ကြမ်းတဲ့ ဥပဒေမဲ့ပြုမူချက် မူဝါဒရှင်တွေများစွာ ဖြစ်လာမှာပါပဲ။ ဒါကြောင့် ဒီဆောင်းပါးရဲ့ သုံးသပ်ချက် အချုပ်ဟာ တို့ဘိုးဘွားအမွေစစ်ကို တို့တစ်တွေ ဘယ်လိုချစ်မြတ်နိုးကြမည်လဲ ဆိုတာကိုပဲ သတိပေးရေးသားရတာပါ။ စာရှုသူများ တို့ဘိုးဘွားရဲ့ အမွေစစ်ကို ချစ်မြတ်နိုးတတ်ပါစေ။

အဲးခိုး
(၁၈-၁၁-၂၀၂၁)

စာရေးသူကိုယ်ရေး 

ဆောင်းပါးရှင် “အဲးခိုး” သည် ကရင်ပြည်နယ် ဘားအံမြို့ တောင်ကလေး ပရိယတ္တိ ပဋိပတ္တိကျောင်းတိုက် မဟာနာယကဆရာတော် နိုင်ငံတော် ဗဟိုသံဃဝန်ဆောင် အဂ္ဂမဟာသဒ္ဓမ္မ ဇောတိကဓဇ မဟာမင်္ဂလဓမ္မ ဇောတိကဓဇ (သီရိပျံချီဘွဲ့ရ) ဒေါက်တာ ဘဒ္ဒန္တပညာသာမိ တောင်ကလေး ဆရာတော်ဘုရား ဖြစ်ပြီး သက်တော် ၆၂ နှစ်၊ သိက္ခာတော် ၄၂ ဝါ ရှိပြီဖြစ်ပါသည်။

တို့ဘိုးဘွားအမွေစစ်မို့ (၉) – မဟာပညာ (mahar.asia)

တို့ဘိုးဘွားအမွေစစ်မို့ (၈) – မဟာပညာ (mahar.asia)

တို့ဘိုးဘွားအမွေစစ်မို့ (၇) – မဟာပညာ (mahar.asia)

တို့ဘိုးဘွားအမွေစစ်မို့ (၆) – မဟာပညာ (mahar.asia)

တို့ဘိုးဘွားအမွေစစ်မို့ (၅) – မဟာပညာ (mahar.asia)

တို့ဘိုးဘွားအမွေစစ်မို့ (၄) – မဟာပညာ (mahar.asia)

တို့ဘိုးဘွားအမွေစစ်မို့ (၃) – မဟာပညာ (mahar.asia)

တို့ဘိုးဘွားအမွေစစ်မို့ (၂) – မဟာပညာ (mahar.asia)

တို့ဘိုးဘွားအမွေစစ်မို့ (၁) – မဟာပညာ (mahar.asia)

အဲးခိုး

နိုင်ငံရေးအာဏာကြောင့် တိုင်းပြည်မှာရှိတဲ့ အမျိုးသားရေး စည်းရုံးရေးကိစ္စတွေ အစည်းပြေသောဝါးပမာလို ဖြစ်နေကြပါပြီ။ အမျိုးသားလွတ်မြောက်ရေးအတွက် အားတက်စွာ ကြိုးစားအားထုတ်လာခဲ့ကြတဲ့ မိဘဘိုးဘွားတို့ခေတ်ကို ပြန်ပြီးကြည့်လိုက် …

အတွဲ(၁၁)၊ အမှတ်(၃၆)၊ မြန်မာသက္ကရာဇ် ၁၃၈၄၊ နတ်တော်လဆန်း ၁၀ ၊ ၂ – ၁၂- ၂ဝ၂၂၊ မြန်မာသံတော်ဆင့် (The Myanmar Herald) မှ ကောက်နုတ်ဖော်ပြခြင်းဖြစ်သည်။

(ယခင်တစ်ပတ်မှအဆက်) 

တစ်မျိုးသားလုံးဆင်ခြင် 

အရှင်တို့တိုင်းပြည်ဟာ ဒီမိုကရေစီနိုင်ငံရေးစနစ် တက်ကြွလှုပ်ရှားမှုကြောင့် မဖော်ကျူးနိုင်တဲ့ စနစ်မဲ့နိုင်ငံရေးစနစ်တွေ သံသရာလည်ခဲ့တာ ကြာနေပါပြီ။ အစဉ်အဆက် အာဏာထိန်းကျောင်းကြတဲ့ အုပ်စုတွေရဲ့ ခေါင်းပုံဖြတ် သုံးစွဲနေကြတဲ့ နိုင်ငံရေးအာဏာကြောင့် တိုင်းပြည်မှာရှိတဲ့ အမျိုးသားရေး စည်းရုံးရေးကိစ္စတွေ အစည်းပြေသော ဝါးပမာလို ဖြစ်နေကြပါပြီ။ အမျိုးသား လွတ်မြောက်ရေးအတွက် အားတက်စွာ ကြိုးစားအားထုတ် လာခဲ့ကြတဲ့ မိဘဘိုးဘွားတို့ခေတ်ကို ပြန်ပြီးကြည့်လိုက်ရင် အဓိပ္ပာယ်ပိုပြီးနက်ရှိုင်း နေပါသေးတယ်။

အရှင်တို့တွေဟာ အသုံးမကျတဲ့ နိုင်ငံရေးဖော်ကျူးမှုကြောင့် မုန်းတီးစိတ်တွေနဲ့ အရှုံးအမျိုးမျိုး ရင်ဆိုင်ကြရတယ်။ ရင်ဆိုင်သွားဖို့ ဒီပြဿနာကို ဘယ်တရားခံတွေက မွေးထုတ်ပေးလိုက်ကြသလဲဆိုတာ ပြည်သူတွေ ပြန်ပြီးစဉ်းစားကြဖို့ လိုပြီ။

အရေးကြီးတဲ့ အောင်မြင်မှု ရည်ရွယ်ချက်ရှိတဲ့အလုပ်ကို မလုပ်ကိုင်နိုင်ကြဘဲ အရင်းအမြစ်မဲ့တဲ့ အချေအတင် အကွပ်အဖျက် ပြုကြတာဟာ မြန်မာတစ်မျိုးသားလုံး ဆင်ခြင်ရမယ် မဟုတ်လား။

ရိုးစင်းလွယ်ကူသော စည်းရုံးရေးနည်း

ကမ္ဘာကြီးဟာ လူဦးရေတွေပေါက်ကွဲ မြင့်တက်လာသလိုပဲ မြန်မာ့လူဦးရေဟာလည်း တိုးပွားနှုန်း မြင့်တက်လာနေတယ်။ သဘာဝအရင်းအမြစ်တွေ ရှားပါးလာတာရယ်၊ ပတ်ဝန်းကျင်ပျက်စီးမှုတွေ အမျိုးမျိုးကြုံတွေ့လာရမှုကြောင့် စားနပ်ရိက္ခာတွေ၊ စွမ်းအင်နဲ့ အခြားကုန်ပစ္စည်းတွေ ပိုမိုပြီးသုံးစွဲလာရလို့ ကမ္ဘာကြီးဟာ ပူနွေးလာရာကစပြီး ပူပြင်းမှုတွေ ကြုံတွေ့လာခဲ့ရတယ်။

ဒီအန္တရာယ် စိုးရိမ်ဖွယ် (စရာ) အမျိုးမျိုးကြားက အရှင်တို့ မြန်မာတွေဟာအချင်းချင်း သဘောထား ကွဲလွဲမှုတွေ မရှိ (မဖြစ်) သင့်ပါဘူး။ အရှင်တို့တွေဟာ အစွန်းရောက် ပြောဆိုကြမှုတွေ သတိထားရမယ်။ နောင် ဖြစ်ပေါ်လာမည့် အကျိုးဆက်တွေကို စဉ်းစားထားရမယ်။ လေ့ကျင့်ထားရမယ်။

လူ့ဘဝသမိုင်းဆိုတာ အလှည့်အပြောင်း မနှေးပါဘူး။ အဖြစ်အပျက်တစ်ခု အကြောင်းကို ပြန်ပြီးတွေးကြည့်လိုက်ရင်ပဲ ဘယ်လိုဖြစ်ပျက် ပြောင်းလဲသွားခဲ့ကြသလဲ ဆိုတာကို မြန်ဆန်ပါတယ်။ ဒါကြောင့် တို့မြန်မာတွေ ရိုးစင်းလွယ်ကူသော စည်းရုံးရေးနည်းကို ပြန်ပြီးစဉ်းစား ကြည့်သင့်ကြတယ် မဟုတ်လား။ 

လူတန်းစားကွာဟမှု

ကမ္ဘာပေါ်မှာ လူနေမှုစနစ် ပြောင်းလဲလာတာကြောင့် နိုင်ငံတိုင်းလိုလိုက မိမိတို့ရဲ့ တိုင်းပြည်လူနေမှု အဆင့်အတန်းစနစ်ကို ဘယ်လိုပြုလုပ်ကြမည်လဲ ဆိုတာကို စဉ်းစားလာနေကြပါပြီ။

လူမှုအဖွဲ့အစည်းဆိုတာ ပညာရေးအဆင့်အတန်း မြင့်တက်လာရင် မြင့်တက်လာတဲ့အတိုင်း လူနေမှုပုံစံတွေမှာလည်း အမျိုးမျိုးကွဲပြား လာနေကြမှာပါပဲ။ စက်မှုထွန်းကားလေ ပိုကွဲပြားလာလေပါပဲ။ လူတန်းစား တစ်ဖက်နဲ့တစ်ဖက် အဆင့်အတန်း မတူညီကြရင် အဲဒီကွာဟမှုကြောင့် လူဦးရေအရွှေ့အပြောင်း ဖြစ်ပေါ်လာတာပါပဲ။

ယနေ့လူဦးရေ အရွှေ့အပြောင်းတွေ ပေါ်လာလို့ ကိုယ်ကျင့်တရား ကောင်းမွန်ပြီး စည်းရုံးမှုရှိသော လူနေမှုစနစ် ဖြစ်ပေါ်ဖို့ဟာ ဘယ်လောက်ကြာနေကြဦးမည်လဲ ဆိုတာကို စဉ်းစားကြည့်ရင် မြင်နိုင်ပါတယ်။

ဆန်းသစ်တီထွင် 

ကိုယ်ကျင့်တရားကောင်းမွန်ပြီး စည်းလုံးသော လူနေမှုစနစ်တစ်ခု ဖြစ်လာဖို့ အရှင်တို့ မြန်မာတွေ ကြိုးစားရဦးမယ်။ လက်ရှိ ပင်ကိုရှိရင်းစွဲဖြစ်တဲ့ အခွင့်သာမှုနဲ့ဆိုင်တဲ့ လူနေမှုစနစ်ဟာ မလုံလောက်သေးပါဘူး။

ဘာသာရေး အဆုံးအမထက် ဥပဒေပညတ်အဆုံးအမက ပိုလိုက်နာရမယ့် လူနေမှုစနစ်ကို အရှင်တို့ ကျင့်သုံးကြရဦးမယ်။ ဒီခေတ်မှာ စစ်အေးခေတ်သာဆိုနေကြပေမယ့် နိုင်ငံရေးအရ မုန်တိုင်းထန်နေပါတယ်။ တရွေ့ရွေ့ပြောင်းလဲလာတဲ့ နိုင်ငံရေး ဖြစ်စဉ်တွေဟာ ကာကွယ်နေကြတဲ့လှုပ်ရှားမှုတွေ အမျိုးမျိုးတွေ့ရတယ်။ ရပိုင်ခွင့်တွေ တောင်းဆိုကြတယ်။ ပြောင်းလဲမှုကို လိုချင်ကြတယ်။

ဓလေ့ထုံးစံအတိုင်း ဖြစ်ပေါ်နေတဲ့ လူမှုရေးပုံစံတွေကို ထားပစ်လိုက်ကြဖို့ အာရုံထားကြတယ်။ ရိုးရာဓလေ့ တန်ဖိုးရှိ အခြေခံကျတဲ့ ယဉ်ကျေးမှုကို ဆန်းသစ်တီထွင်လိုကြတယ်။ နည်းပညာတွေကို အခြေခံကနေ ဖယ်ရှားပြီး နည်းလမ်းသစ်တွေ ရှာဖွေချင်ကြတယ်။ အရာဝတ္ထုတိုင်းကို ဆင်ခြင် သုံးသပ်တာမဟုတ်တဲ့ ပညာရပ်တွေကို ပြင်းပြင်းထန်ထန် သင်ယူနေကြတယ်။ သဘာဝအတိုင်းရှိတဲ့ လျှို့ဝှက်နက်နဲမှုတွေ၊ နူးညံ့သိမ်မွေ့မှုနဲ့ နက်နဲခက်ခဲသော အဓိပ္ပာယ်ရှိသော ဘာသာစကားတွေကို အလေးမထားဘဲ ကြဉ်ဖယ်ထားချင်ကြတယ်ဆိုတဲ့ အချက်တွေ တွေ့မြင်လာခဲ့ရတယ်။

ကိုယ်ကျင့်ကောင်းသော မြန်မာလူမှုစနစ်

တကယ်တော့ လူဆိုတာ ဒိဋ္ဌ (လက်ငင်း) အကျိုးကို ကြည့်တဲ့ စဉ်းစားချက်ကိုပဲ (စဉ်းစားဉာဏ်ကိုပဲ) သိအောင်လုပ်ကြရမယ်။ အဓိပ္ပာယ်မရှိတဲ့ အကျိုးအကြောင်းတရားတွေကို ဆင်ခြင်သုံးသပ်ပြီး ဖယ်ထုတ်တတ်ရမယ်။ ယနေ့အကျိုးမရှိတဲ့ အဓိပ္ပာယ်မဲ့မှုတွေကို စံနှုန်းထားပြီး တိုက်ခိုက်ကြတာဟာ မြန်မာတွေ ရဲရဲဝံ့ဝံ့ဆုံးဖြတ်ရတော့မယ်။ မြန်မာတွေဟာ ဦးတည်ချက်ပြောင်းလဲမှုကို သည်းခံနိုင်အောင် အင်အားရှိရမယ်။ ယှဉ်ပြိုင်မှုအတွက် တွန်းအားပေးတဲ့အရာတွေကို (အင်အားတွေကို) ကိုယ်တွေ့ ဆောင်ရွက်တတ်ရမယ်။ အကြင်နာတရားကင်းမဲ့ကြလို့ အကျိုးကျေးဇူးမရှိတဲ့ ပြိုကွဲမယ့်ပုံရိပ်ကို ဖြေရှင်းတတ်အောင် အားထုတ်ရမယ်။ နိုင်ငံရေးဘဝကို ပုံဖော်ပေးနိုင်တဲ့ နည်းစနစ်ကောင်းကို စဉ်းစားပုံနည်းလမ်းတွေ လက်တွေ့ ကျရမယ်။

ယနေ့မြန်မာတွေဟာ ချစ်ခြင်း၊ မုန်းခြင်း၊ ကျိုးကြောင်း ဆင်ခြင်ခြင်းဆိုတဲ့ နေ့စဉ်လူနေမှုစရိုက်အချက် ၃ ချက်နဲ့ မြန်မာ့လူနေမှုစနစ် အသစ်ဖြစ်အောင် ဆုံးဖြတ်ရတော့မယ်။ ၂၁ ရာစုနှစ် လူ့အဖွဲ့အစည်းအသစ်ဟာ ကိုယ်ကျင့်သိက္ခာကောင်းသော လူမှုစနစ် ဖြစ်တာကြောင့် အရှင်တို့မြန်မာတွေလည်း အချင်းချင်းဖြစ်ပွားကြတဲ့ ပဋိပက္ခတွေကို ကိုယ်ကျင့်ကောင်းသော မြန်မာလူမှုစနစ်ကို ကျင့်သုံးဆောက်တည် ကြရတော့မယ်။

ကမ္ဘာ့ပထမဒေသ 

အရှင်တို့မြန်မာလူမှုစနစ်ဟာ ချွတ်ယွင်းမှု အလွန်များပြားလာတာကြောင့် တဖြည်းဖြည်းနဲ့ ပြီးပြည့်စုံမှုမရှိတဲ့ အခြေအနေတွေဘက်ကို ရောက်လာတယ်။ ကိုယ်ပိုင်ယဉ်ကျေးမှု အနုပညာအပေါ်မှာလည်း အာရုံစူးစိုက်မှု လျော့နည်းလာကြတယ်။ မတည်ငြိမ်တဲ့ အခြေအနေတွေလည်း အမျိုးမျိုးဖြစ်လာကြတယ်။

ကမ္ဘာပေါ်မှာ အသက်ရှည်စွာ၊ အနာမဲ့ရေး၊ ရန်ဘေးကင်းတဲ့ ဒေသကြီး ၅ ခုရှိပါတယ်။ အဲဒီဒေသကြီး ၅ ခုထဲက ပထမဒေသကြီးဖြစ်တဲ့ ပစိဖိတ်မြစ်ဝှမ်းဒေသဟာ အရှင်တို့ မြန်မာနိုင်ငံလည်း ပါဝင်ပါတယ်။ ဒီဒေသကို မှီခိုနေထိုင်ကြတဲ့သူတွေဟာ ပဋိပက္ခနည်းပါးကြပြီး ကိုယ်စိတ်ချမ်းသာစွာနဲ့ စည်းလုံးညီညွတ်ကြတယ်။ ခုတော့ ဒီဒေသကိုအ နိုင်ကျင့်စိုးမိုးရေးဝါဒသားတွေက စစ်ပွဲနဲ့ ထိပ်တိုက်ရင်ဆိုင်ဖို့ အမျိုးမျိုး လှည့်ကွက်တွေ လုပ်နေကြတယ်။ ဒီဒေသကို ထိန်းချုပ်ရေးအတွက် ဒေသထဲမှာရှိတဲ့ ပဋိပက္ခဖြစ်ပွားနိုင်တဲ့ နိုင်ငံရေးမီးတွေကိုလည်း တစ်စတစ်စ စတင်ပြီး ရှို့တယ်။ စီးပွားရေးက တစ်မျိုး၊ ထိန်းချုပ်ရေးက တစ်သွယ်၊ အနိုင်ကျင့်ရေးဝါဒမှိုင်းက တစ်သီးနဲ့ ပြဿနာရပ်ဝန်းကြီး ဖြစ်လာအောင် ကြိုးစားနေကြတယ်။

ကမ္ဘာပေါ်မှာ အသက်ရှည်စွာ၊ အနာမဲ့ရေး၊ ရန်ဘေးကင်းတဲ့ ဒေသကြီး ၅ ခုရှိပါတယ်။ အဲဒီဒေသကြီး ၅ ခုထဲက ပထမဒေသကြီးဖြစ်တဲ့ ပစိဖိတ်မြစ်ဝှမ်းဒေသဟာ အရှင်တို့ မြန်မာနိုင်ငံလည်း ပါဝင်ပါတယ်။ ဒီဒေသကို မှီခိုနေထိုင်ကြတဲ့သူတွေဟာ ပဋိပက္ခနည်းပါးကြပြီး ကိုယ်စိတ်ချမ်းသာစွာနဲ့ စည်းလုံးညီညွတ်ကြတယ်။ ခုတော့ ဒီဒေသကိုအ နိုင်ကျင့်စိုးမိုးရေးဝါဒသားတွေက စစ်ပွဲနဲ့ ထိပ်တိုက်ရင်ဆိုင်ဖို့ အမျိုးမျိုး လှည့်ကွက်တွေ လုပ်နေကြတယ်။ ဒီဒေသကို ထိန်းချုပ်ရေးအတွက် ဒေသထဲမှာရှိတဲ့ ပဋိပက္ခဖြစ်ပွားနိုင်တဲ့ နိုင်ငံရေးမီးတွေကိုလည်း တစ်စတစ်စ စတင်ပြီး ရှို့တယ်။ စီးပွားရေးက တစ်မျိုး၊ ထိန်းချုပ်ရေးက တစ်သွယ်၊ အနိုင်ကျင့်ရေးဝါဒမှိုင်းက တစ်သီးနဲ့ ပြဿနာရပ်ဝန်းကြီး ဖြစ်လာအောင် ကြိုးစားနေကြတယ်။

ဒီဒေသကို သူတို့တွေ ထိန်းချုပ်နိုင်သွားရင် ဒေသတွင်းမှာရှိတဲ့ နိုင်ငံတိုင်းရဲ့ လူမှုရေး၊ စီးပွားရေးတွေအားလုံးဟာ သူတို့လက်ထဲမှာ ရပ်တည်ရတော့မယ်။ ဒီအတွက် ဒီအကွက်ကို အရှင်တို့မြန်မာပြည်အတွက်က ဘယ်လိုရင်ဆိုင်ဖြေရှင်းကြမည်လဲ ဆိုတာကို ကြိုတင်သိထား သင့်တယ်မဟုတ်လား။ ခုတိုင်းပဲ မညီမညွတ်ကြဘဲ (မရိုသေကြဘဲ၊ မလေးစားကြဘဲ) ဖြစ်နေကြရင် အနှောင့်အယှက်တွေ ပိုပြီးတော့ ဖြစ်လာတော့မယ်ဆိုတာကို ကြိုတင်ပြင်ဆင်ထားရမယ် မဟုတ်လား။ 

အန္တရာယ်ခေါင်းလောင်းသံ

ကမ္ဘာပေါ်မှာ နိုင်ငံရေးသြဇာချဲ့ကားကြတဲ့ အုပ်စုတွေဟာ သူတစ်ပါး ပြည်တွင်းရေးနိုင်ငံရေး အခြေအနေတွေကို ကြည့်ပြီး သူတို့ရဲ့ နိုင်ငံရေးကျားကွက်တွေပါအောင် အမြဲတမ်းရွေ့နေကြတယ်။ အထူးသဖြင့် အန္တရာယ်များစွာ ကျရောက်နိုင်မယ့် တိုင်းပြည်တွေကို သူတို့တွေ ပိုပြီးအာရုံရောက်ကြတယ်။

နိုင်ငံရေး ပါဝါရဖို့ အလုပ်ရှုပ်နေတဲ့ တိုင်းပြည်တွေ ထဲမှာတော့ ကမ္ဘာပေါ်မှာ ဘယ်တိုင်းပြည်ကလည်း ဆိုတာကိုတော့ သိထားဖို့ပါပဲ။ အရှင်တို့တိုင်းပြည် ပြည်တွင်းရေးဟာ သူတို့အင်အား လျော့နည်းလာနိုင်တာကို ကြည့်ပြီး သူတို့တွေ သွေးလန့်နေကြတယ်။ ပြည်တွင်းထဲမှာ နိုင်ငံရေးအင်ပါယာ တည်ဆောက်နိုင်ဖို့အတွက် နည်းလမ်းတွေအမျိုးမျိုးနဲ့ အကြောင်းပြုပြီးတော့ အထွေထွေအုံကြွမှုကြီးတွေ ဖန်တီးတယ်။

တိုင်းပြည်ထဲမှာရှိတဲ့နိုင်ငံရေး အားနည်းချက်တွေကို အကြံကောင်း ဉာဏ်ကောင်းတွေ မပေးကြဘဲ အားနည်းမှုကိုကြည့်ပြီး အခွင့်ကောင်းယူကြတယ်။ ဒီထက် အခွင့်ကောင်းပိုရမည်လားဆိုတဲ့ နိုင်ငံရေးလှုပ်ရှားသူအချို့က GDP ဒေါ်လာ ၆၆ဝ ဘီလီယံကျော်မှာ ပိုင်ဆိုင်ထားကြတဲ့တိုင်းပြည်ထဲကို ပြေးဝင်ပြီး မိမိနေထိုင်ကြီးလာခဲ့တဲ့ တိုင်းပြည်ကို သူတို့ရဲ့နိုင်ငံရေးအာဏာ ပြန်လည်ကြီးထွားလာဖို့အတွက် သွားရောက်ပြီး အခြေချနေတာကို တွေ့ရတော့ မြန်မာ့နိုင်ငံရေးအန္တရာယ် ခေါင်းလောင်းသံဟာ ရည်ရွယ်ချက်ရှိရှိနဲ့ တိုင်းပြည်ရဲ့ အကျိုးစီးပွား ပျက်သုဉ်းရေးကို အာရုံစူးစိုက် ခြေလှမ်းနေကြပြီဆိုတာကို ဒီအတွက် မြန်မာအစိုးရ သိထားသင့်တဲ့ အချက်ပါပဲ မဟုတ်ပါလား။ 

နယ်စပ်စည်းမျဉ်း သတ်မှတ်ရေး 

အရှင်တို့ မြန်မာနိုင်ငံရဲ့ နယ်စပ်စည်းမျဉ်းဟာ ယနေ့ယခုအချိန်မှာ အလွန်အရေးကြီးလာနေပါပြီ။ ပြည်တွင်းနိုင်ငံရေး မငြိမ်မသက်အောင် လှုပ်ရှားကြတဲ့သူတွေက နိုင်ငံရေးကို ကိုယ်တိုင်အမြတ်တွေထုတ်ပြီး အကြမ်းဖက်လွှမ်းမိုးနိုင်မယ့် နည်းလမ်းတွေ တိုးချဲ့နေကြတာကို တွေ့ရတယ်။ အရှင်တို့တွေဟာ တစ်သီးတခြားနေတတ်မှုနဲ့ အမြင်ကျဉ်းမြောင်းမှုကို ပြင်ရမယ်။ အရပ်မျက်နှာ အမျိုးမျိုးကို ဖြာထွက်နိုင်တဲ့ တိုင်းပြည်တွေရဲ့ အပြုအမူကို သေသေချာချာ သိထားရမယ်။ အရှင်တို့တိုင်းပြည်ကို အတွင်းကျကျ အုပ်စိုးနိုင်သည့် အစိုးရမျိုး ထွက်ပေါ်လာအောင် လုပ်ရမယ်။

ယနေ့ကမ္ဘာပေါ်မှာ ကမ္ဘာ့စီးပွားရေးအင်အားကြီး အဆင့်ရောက်တဲ့ တိုင်းပြည်တွေရဲ့ နိုင်ငံရေးရည်မှန်းချက်ဟာ တိုင်းပြည်နိုင်ငံတွေကို သိမ်းဆည်းရေးမဟုတ်ပါ။ နယ်ချဲ့ရေးလည်း မဟုတ်ပေမယ့် ပိုပြီးသတိထားရတယ်။ ပဋိပက္ခဖန်တီးနိုင်တဲ့ အခွင့်အရေးတွေဟာ ပြည်တွင်းရေးကိုပုံဖော်တဲ့ နိုင်ငံရေးဖြစ်လို့ သွေးကွဲဖြစ်စဉ်အကြောင်းကို လေးလေးနက်နက် သိထားရမယ်။ ကမ္ဘာ့လူဦးရေရဲ့ လေးပုံတစ်ပုံရှိတဲ့ နိုင်ငံကြီးဘေးမှာ နေထိုင်ကြတဲ့ အရှင်တို့ဟာ လူမှုရေးနဲ့ နိုင်ငံရေးပြဿနာတွေ ဘယ်လောက်အထိ ရှုပ်ထွေးလာနေကြပြီလဲဆိုတာကို အားလုံးအသိပါပဲ။

အရှင်တို့ရဲ့ အားနည်းချက်ကို အခွင့်ကောင်းယူနိုင်မယ့် တိုင်းပြည်ဟာ အရှင်တို့ရဲ့ အိမ်နီးနားချင်း တိုင်းပြည်ကြီးတွေပါပဲ။ ဒါကြောင့် အရှင်တို့ရဲ့ ကျော်ဖြတ်သွားရမယ့် နိုင်ငံရေးခရီးကို လွတ်လပ်စွာဖြတ်ကျော်တတ်ဖို့ တိုင်းပြည်ရဲ့နယ်စပ်စည်းမျဉ်းကို သေချာစွာ သတ်မှတ်ထားရတော့မယ်။ 

ကြွယ်ဝလာရေးအတွက် 

ကမ္ဘာ့အပြည်ပြည်ဆိုင်ရာ နိုင်ငံရေး မြင်ကွင်းဟာ ပဋိပက္ခရပ်ဝန်းကြီး မဖြစ်အောင် ကြိုးစားကြပေမယ့် ရာခိုင်နှုန်း အပြည့်အဝ မအောင်မြင်နိုင်ပါဘူး။ အခွင့်အရေးယူချင်ကြတဲ့သူတွေက အမျိုးမျိုးစွန့်စားကြမှာပါပဲ။ အင်အားကြီးတဲ့ တိုင်းပြည်ကြီးတွေက အရင်းကြီးလေ ပိုချမ်းသာချင်လေမှာပဲ။ ပိုကြွယ်ဝလိုကြတဲ့ ရည်ရွယ်ချက်ကြောင့် အထီးကျန်စေနိုင်တဲ့ အပြုအမူတွေ ရှောင်ရှားရမှာပဲ။ သို့သော် အခွင့်ကောင်းရစရာ ဖြစ်ရင်တော့ အားမနာတမ်း အကုန်သိမ်းကျုံး ယူမှာပါပဲ။

ယနေ့ နယ်စည်းမခိုင်မာတဲ့ တိုင်းပြည်တွေကိုကြည့်လိုက်ရင် စီးပွားရေး၊ လူမှုရေး အမျိုးမျိုး အခက်အခဲတွေ ရင်ဆိုင်နေကြရတယ်။ သစ္စာရှိခြင်းကို ငွေကြေးဖြင့် ဝယ်လိုကြတဲ့သူတွေက အတင်းအကျပ် လှည့်ပတ်ပြီး လုပ်ကိုင်နေတဲ့ အလုပ်တွေ တွေ့ရတယ်။ လုံလောက်တဲ့ ငွေကြေးတွေမရှိဘဲ အတင်းအကျပ် လုပ်သားတွေကို ခိုင်းစားတယ်။ လူတန်းစားအလွှာတွေကလည်း ဆင်းရဲမှုက ပိုများလာတယ်။ နိုင်ငံရေးဘက်မှာလည်း မတည်မငြိမ်တွေဖြစ်ကြပြီး ယနေ့ မြန်မာပြည် တွေ့ကြုံနေရတဲ့ အခက်အခဲလိုမျိုးလိုပဲ ဖြစ်လာကြတာကို တွေ့ရတယ်။

ရှင်းရှင်းပြောရရင် အရှင်တို့ မြန်မာပြည်ဟာ အတွင်းအပြင် နိုင်ငံတော်အုပ်ချုပ်ရေးနည်းစနစ် လက်တွေ့ကျကျ လိုက်နာကျင့်သုံးခြင်း (ကျင့်သုံးမှု) မပြုနိုင်လေသမျှ ကာလပတ်လုံး သူတစ်ပါးကို အပြစ်ပုံလို့ အချင်းချင်းကို အပြစ်ပုံချလို့ ပြီးဆုံးနိုင်ကြမှာ မဟုတ်။ ဒါကြောင့် မြန်မာဟာ ကြွယ်ဝလာရေးအတွက် ဖန်တီးပေးနိုင်မယ့် နိုင်ငံရေးစနစ်ကောင်းရှိဖို့ လိုအပ်နေပါပြီဆိုတာကို တွေ့ရပါတယ်။

(ဆက်ရန်)

တို့ဘိုးဘွားအမွေစစ်မို့ (၈) – မဟာပညာ (mahar.asia)

တို့ဘိုးဘွားအမွေစစ်မို့ (၇) – မဟာပညာ (mahar.asia)

တို့ဘိုးဘွားအမွေစစ်မို့ (၆) – မဟာပညာ (mahar.asia)

တို့ဘိုးဘွားအမွေစစ်မို့ (၅) – မဟာပညာ (mahar.asia)

တို့ဘိုးဘွားအမွေစစ်မို့ (၄) – မဟာပညာ (mahar.asia)

တို့ဘိုးဘွားအမွေစစ်မို့ (၃) – မဟာပညာ (mahar.asia)

တို့ဘိုးဘွားအမွေစစ်မို့ (၂) – မဟာပညာ (mahar.asia)

တို့ဘိုးဘွားအမွေစစ်မို့ (၁) – မဟာပညာ (mahar.asia)

အဲးခိုး

အမျိုးသားရေးအတွက် သို့မဟုတ် မိမိတစ်မျိုးသားလုံး ဥပဒေအာဏာလွှမ်းမိုးမှု ရှိဖို့အတွက် မိမိတို့အပေါ်မှာ ဘယ်လောက်များ မှားခွင့်ရှိကြမည်လဲ(မလဲ)။ လူတိုင်းအပေါ် မှားယွင်းနိုင်ခွင့်ရှိကြောင်း ဘယ်နိုင်ငံရေးအာဏာက ညွှန်ပြနေကြပါသလဲဆိုတာကို ပြန်တွေးကြပါ … မြန်မာတွေအချင်းချင်း ခေါင်းပုံဖြတ်တဲ့ နိုင်ငံရေးသုံးစွဲခြင်းကို အဆုံးသတ်ကြဖို့ တောင်းဆိုပါတယ် …

အတွဲ(၁၁)၊ အမှတ်(၃၅)၊ မြန်မာသက္ကရာဇ် ၁၃၈၄၊ နတ်တော်လဆန်း ၃ ၊ ၂၅ – ၁၁- ၂ဝ၂၂၊ မြန်မာသံတော်ဆင့် (The Myanmar Herald) မှ ကောက်နုတ်ဖော်ပြခြင်းဖြစ်သည်။

(ယခင်တစ်ပတ်မှအဆက်) 

မြန်မာအတွက် အာဆီယံအချက်

ဒီနေ့ ကမ္ဘာကြီးဟာ အကျိုးကို ထိခိုက်စေမယ့် မဟာဗျူဟာမြောက်တဲ့ ခြိမ်းခြောက်မှုနိုင်ငံရေးနည်းလမ်းတွေ နိဂုံးမချုပ်နိုင်ကြသေးပါဘူး။ ကမ္ဘာကြီး တစ်ခုလုံးမှာရှိကြတဲ့ နိုင်ငံတိုင်းရဲ့အခြေအနေဟာလည်း တည်တည်ငြိမ်ငြိမ် လွတ်လွတ်လပ်လပ် မရပ်တည်နိုင်ကြသေးပါဘူး။ ပြောတော့သာ အောင်မြင် နေကြတယ်လို့ ပြောနေကြတယ်။ တကယ်တော့ ချွတ်ခြုံကျနေတဲ့ သူတို့ရဲ့ အနိမ့်ရောက်အကြောင်းတွေ ကမ္ဘာမှာရှိကြတဲ့ လူတွေမသိအောင် နည်းပေါင်းစုံနဲ့ ဟန်ဆောင်နေကြတယ်။

အရှည်အဝေးမကြည့်ကြပါနဲ့၊ ယနေ့ ထိပ်တန်းရောက်နေတဲ့ တိုင်းပြည် (နိုင်ငံ) တွေကိုပဲ ကြည့်လိုက်ကြပါ။ သူတို့ပြဿနာဟာ အတောမသတ်နိုင်ကြဘဲ ဖုံးဖိရေးနည်းပေါင်းစုံနဲ့ ရင်ဆိုင်ဖြေရှင်းနေခဲ့ကြရတယ်။ မြန်မာပြည်လည်းပဲ အချင်းချင်းဆန့်ကျင် တိုက်ခိုက်နေကြမှုတွေ ပိုပြီးတော့ ဆက်လာနေတယ်။ ကိုယ်ကျိုးအတွက် နိုင်ငံရေးစစ်ပွဲတွေ အသုံးပြုကြတယ်။

တိုင်းပြည်ဟာ ကြောက်စရာဖြစ်တဲ့ အကျပ်အတည်းတွေ အမျိုးမျိုးအဖုံဖုံ ဖြစ်လာတယ်။ ကြီးမားသော ပြည်တွင်းရေးကိစ္စတွေ မငြိမ်မသက် ခုလိုဖြစ်နေတဲ့အချိန်မှာ အာဆီယံဒေသအတွင်း (ဒေသထဲ) မှာရှိကြတဲ့ အိမ်နီးချင်းတိုင်းပြည်တွေကလည်း မြန်မာပြည်ကို ပြည်တွင်းရေး ဝင်ရောက်စွက်ဖက်လိုကြတဲ့ ဆန္ဒတွေ တွေ့မြင်ရတယ်။ အိမ်နီးနားချင်း တိုင်းပြည်ကောင်း အင်္ဂါရပ်နဲ့မညီမညွတ် ဖြစ်လာကြတယ်။ ဒီရှုထောင့်ဟာ မြန်မာအတွက် အာဆီယံအချက်ပါပဲ။ 

မုန်းမာန်မကြိုးထားကြ 

ဒီခေတ်ကြီးဟာ စည်းရုံးလှုပ်ရှားမှု အားနည်းတဲ့ တိုင်းပြည်ဟာ ပိုပြီးတော့ အားနည်းကြမယ်။ နိုင်ငံရေးကို အခြေခံတဲ့ မူဝါဒတွေ မတည်ငြိမ်ကြတဲ့ တိုင်းပြည်ဟာလည်း တဖြည်းဖြည်း အဆုံးစွန် ထိခိုက်လာလိမ့်မယ်။ မြန်မာပြည် ဘယ်လိုထိခိုက်လာနေပြီလဲဆိုတာကို လူတိုင်းအသိပါပဲ။

မြန်မာအချင်းချင်း ပဋိပက္ခကြီးထွားလေလေ ဘာသာရေးခေါင်းဆောင်တွေ အုပ်ချုပ်တဲ့ အင်ပါယာအဖွဲ့အစည်းတွေက နိုင်ငံရေးအာဏာကို အမျိုးမျိုးလုပ်ကြံ ဖန်တီးကြမှာပါပဲ။ တိုင်းပြည်ထဲမှာ ကြီးကျယ်တဲ့ ပဋိပက္ခစစ်ပွဲငယ်တွေဟာ လက်ရှိအစိုးရ နပန်းလုံးနေကြရပြီ မဟုတ်လား။ ဒီစစ်ပွဲငယ်တွေကို အခြေခံထားတဲ့ ပဋိပက္ခဟာ တစ်နေ့နေ့ တစ်ချိန်ချိန်မှာ အဆက်မပြတ် ဆင်နွှဲခဲ့ရမယ့် စစ်ပွဲငယ်တွေ ဖြစ်လာနိုင်တယ်။ ဒီပဋိပက္ခတွေ ချုပ်ငြိမ်း သွားစေဖို့ စိတ်ကြိုက်ရွေးချယ်နိုင်ခွင့်ရှိတဲ့ နိုင်ငံရေးမူဝါဒ (စနစ်) ကို လွတ်လပ်စွာ ရွေးချယ်ခွင့်ပေးရမယ်။ အကယ်၍ နိုင်ငံရေးမူဝါဒစနစ်ကို ရွေးချယ်ခွင့်မပေးနိုင်ရင် (မပေးနိုင်ပါက) ပဋိပက္ခကျော်လွှားနိုင်တဲ့ အခြေအနေတွေရှိမှာ မဟုတ်ပါဘူး။

ဒီကိစ္စအတွက် ယခင်အစိုးရအဖွဲ့ အစည်းတွေကို အကြံပေး ဉာဏ်ပေးပြုခဲ့ပေမယ့် အရေးမစိုက်ကြဘဲ အကြံပြု ဉာဏ်ပေးသူ (အရှင်တို့ကို) တွေကို မုန်းမာန်မကြိုး ထားကြတယ်။ 

ပြဿနာရပ်ဝန်းမကူးသွားဖို့ 

တိုင်းပြည်တစ်ပြည်ဟာ အမျိုးသားအင်အားကြီးမားရေးက အဓိကပါပဲ။

အမျိုးသားအင်အား (ပါဝါ) မကြီးမားတဲ့ တိုင်းပြည် (နိုင်ငံ) ဟာ ကြီးကျယ်ခမ်းနားတဲ့ မဟာဗျူဟာမြောက်တဲ့ တိုင်းပြည်ကြီးတစ်ပြည် ဖြစ်မလာနိုင်ပါဘူး။ ပကတိအတိုင်းမဟုတ်တဲ့ အတင်းအကြပ်အားထုတ် ကြိုးစားနေတဲ့အလုပ်ဟာ အဲဒီသဘောတရားတွေနဲ့ သာယာနေကြရင် တစ်နေ့တစ်ချိန်မှာ အမှန်တရား ပျောက်ဆုံးသွားမှာပါပဲ။ ဒါကြောင့် နိုင်ငံရေးဆိုတာ အတင်းအကြပ် မသာယာရပါ။ မလုပ်ကိုင်ရပါ။ ရှုထောင့်အမျိုးမျိုး သုံးသပ်ပြီးမှ လုပ်တတ်ရမယ်လို့ နိုင်ငံရေး ဘိုးအေကြီးတွေက အဆုံးအမပေးခဲ့ကြတယ်။

စစ်ပွဲငယ်တွေနဲ့ လူမှုစီးပွားရေး အတွက် ရုန်းကန်လှုပ်ရှားနေကြရတဲ့ ယနေ့ မြန်မာပြည်အစိုးရဟာ (၂၀၂၁ ခုနှစ်၊ အိမ်စောင့်အစိုးရ။) ပဋိပက္ခဖြစ်လာတဲ့ စစ်ပွဲငယ်တွေကို ဘယ်လိုအားထုတ်ပြီး ဖြေရှင်းကြမည်လဲဆိုတာကို ပထဝီနိုင်ငံရေးနဲ့ ယဉ်ကျေးမှုအခြေအနေတွေကို လေ့လာကြတဲ့သူတွေက ကြည့်နေကြတယ်။ မြင့်တက်လာတဲ့ ပဋိပက္ခတစ်ခုဟာ ဖြေရှင်းချက်မရှိရင် အဲဒီ ပဋိပက္ခဟာ ပြဿနာရပ်ဝန်းဘက်ကို ကူးသွားမှာပါပဲ။ ဒါကြောင့် နိုင်ငံရေးပဋိပက္ခကို ဖြေရှင်းချက်လုပ်တဲ့အခါ အခြေတည်သွားခဲ့တဲ့ ပြဿနာအရပ်ရပ်ရဲ့အကြောင်းကို စစ်ကိုလိုလားချက် ပြဿနာမရောက်အောင် ဖြေရှင်းပေးနိုင်ရမယ်။ 

နိုင်စားဖို့အကွက်မဆင်မိရန် 

မြန်မာပြည်တွင်းမှာ မွေးဖွားလာခဲ့ကြတဲ့သူတွေဟာ စစ်ပွဲတွေရဲ့ကြားမှာ မွေးဖွားလာခဲ့ကြတဲ့သူတွေ အတော်လေးများနေကြပြီ။ စစ်ပွဲတွင်းမွေးဖွားလာခဲ့ ကြရတဲ့သူတွေဟာ စစ်ကိုမုန်းမိကြမှာပါပဲ။ ဒါမှမဟုတ် မကျေနပ်မှုအပေါ် စစ်တိုက်ခိုက်မှုကို အကြောက်အရွံ့မဲ့ ရှိကြမယ်ဆိုတာ ဓမ္မတာပါပဲ။ သူတို့ရဲ့ ဘဝဟာ ကျေနပ်စရာမရလို့ လုံခြုံမှုမရှိတဲ့ စိုးရိမ်စိတ်တွေ သူတို့တွေ့ဖြစ်ကြမှာပါပဲ။ သူတို့တွေရဲ့ ပြင်းပြတဲ့ သူတို့ရဲ့ ဆန္ဒအခက်အခဲတွေကို သူတို့ပိုင်ဆိုင်လိုကြတဲ့ တစ်ခုတည်းသော ဖက်ဒရယ်ပြည်ထောင်စုကြီးကို အဓိပ္ပာယ်မဲ့အောင်တော့ ခြိမ်းခြောက် ဖျက်ဆီးလို့တော့ မရနိုင်ပါ။ ဒါကြောင့် စစ်အတွင်း မွေးဖွားလာခဲ့ကြတဲ့ သူတွေရဲ့အတွေးဟာ ရှင်းရှင်းနဲ့လင်းလင်းပဲ ပြောရရင် နိုင်စားဖို့အတွက် လိမ်လည်မှုကို မနှစ်သက်ကြတာတော့ အမှန်ပါပဲ။

မြန်မာပြည်အလယ်ပိုင်းဒေသ အခြေအနေ 

မြန်မာပြည် အလယ်ပိုင်းဒေသဟာ ယခင်ကာလက စစ်ရဲ့အနိဋ္ဌာရုံတွေ များများစားစား မခံစားခဲ့ကြရပါဘူး။ ခုတော့ ပဋိပက္ခရပ်ဝန်း ကြီးထွားလာတော့ ပြဿနာတွေအမျိုးမျိုး ဦးတည်နေကြတယ်။ ဒီပြဿနာကို အလျင်အမြန် ဖြေရှင်းသင့်တယ်။ ကြည့်တော့ ဘာမှမဟုတ်ဘူး။ စစ်ပေမယ့် အချိန်ကြာမြင့်လာရင် နယ်မြေပိုင်ဆိုင်မှု တစ်နည်း အုပ်ချုပ်ရေးပိုင်ဆိုင်မှု တစ်ခုခုဖြစ်လာနိုင်လေမည်လား ဆိုတာကို မြင်မိပါတယ်။

လူမှုရေး သဘောသဘာဝအရ အဲဒီဒေသမှာ နေထိုင်ကြတဲ့ ပြည်သူတွေဟာ ဖြူစင်ရိုးသားစွာနဲ့ပဲ မဟာဗျူဟာရှိရှိ သတ်သတ်မှတ်မှတ် နေထိုင်ကြပါတယ်။ ဗိုလ်ကျစိုးမိုးရေး ခြိမ်းခြောက်မှုတွေလည်း အအုပ်အစိုးမခံခဲ့ရပါဘူး။ စဉ်ဆက်မပြတ် ငြိမ်သက်အေးချမ်းစွာ နေထိုင်လာခဲ့ကြရတယ်။ ခုတော့ ကြီးထွားလာတဲ့ ပဋိပက္ခကြောင့် စစ်ပွဲငယ်တွေ ခံစားလာခဲ့ကြရတယ်။ နိုင်ငံရေးအရ အင်ပါယာတစ်ခုခုများ ထူထောင်မယ့်အစီအစဉ်တွေ တစ်စိတ်တစ်ပိုင်းများဖြစ်လာအောင် ကြံစည်အားထုတ်နေကြပြီလား ဆိုတာကို နိုင်ငံရေး သုံးသပ်ကြတဲ့သူတွေက သံသယအဖြစ် ထင်လာကြတယ်။ 

နာကြည်းဒေါသစိတ် 

အခုတော့ တဖြည်းဖြည်းနဲ့ ရေးကြီးခွင်ကျယ်လာတဲ့အသံတွေ ထွက်လာတော့ တိုက်ခိုက်မှုနဲ့ ဆက်နွှယ်နေတဲ့ အကြောင်းတွေကို ကြည့်လိုက်ရင်ပဲ ကြိုတင်ထားတဲ့ နိုင်ငံရေးမဟာဗျူဟာ ရည်မှန်းချက်တွေပါနေတာကို တွေ့ရတယ်။

စနစ်တကျ နိုင်ငံရေးအရသာ တောင်းဆိုမှုပြုလာခဲ့ရင် အရှင်တို့ရဲ့ မြန်မာပြည်ဟာ ပြည်နယ်သစ် နယ်မြေတွေ ထွက်ပေါ်လာခဲ့ကြဦးမယ်။ အရေးမယူ ဂရုမစိုက်ကြတဲ့ သူတွေကတော့ အလွန်ကျယ်ပြန့်တဲ့ ဒီအကြောင်းအရာတွေကို စဉ်စားခဲ့ကြမှာမဟုတ်ပါဘူး။

တရားဥပဒေစိုးမိုးရေးလုပ်ခြင်းဟာ ရှုံးနိမ့်မှုကို လက်ခံတဲ့သူတွေအတွက် ပြဿနာမရှိဘူးလို့ ထင်ကြပေမယ့် ရှုံးရသူတွေရဲ့ ရည်မှန်းချက်မှာ ဘေးဖယ်ထားလို့မရပါ။ ပြဿနာတစ်ခုရဲ့ အဆုံးအဖြတ်ဟာ လွယ်ကူမယ်မဟုတ်လို့ ကြားဝင်စွက်ဖက်မှုတွေ အရှိန်လျော့ဖို့ လိုပါတယ်။ တစ်နည်းအားဖြင့် ကျိုးကြောင်းချင့်ချိန် ဆောင်ရွက်လုပ်ကိုင်တတ်ဖို့ လိုပါတယ်။ ပြဿနာရဲ့အဆုံးအဖြတ်ကို မသုံးစွဲတတ်တဲ့သူဟာ ညီမျှမှုမရှိတဲ့ အင်အားနည်းပါးကြတဲ့သူတွေရဲ့ နစ်နာချက် ပဋိပက္ခတွေ ဖြစ်လာမှာပါပဲ။ ဒါကြောင့် နိုင်ငံရေးပြဿနာကို နိုင်ငံရေးနည်းနဲ့ ဖြေရှင်းကြမယ်ဆိုလာခဲ့ကြတဲ့ (ပြောလာခဲ့ကြတဲ့) အပြောသမားတွေရဲ့ လုပ်ရပ်ကြီးဟာ ယခု (အခု) မြန်မာပြည်ကြီးဟာ ဘယ်လိုများ ဖြစ်လာခဲ့ကြပြီလဲဆိုတာကို အားလုံး မြင်တွေ့ရတဲ့အတိုင်းပါပဲ။ ပြဿနာပျက်ယွင်းမှု အဆက်တွေဟာ ထိန်းမနိုင်သိမ်းမရ ဖြစ်လာခဲ့တယ်။ နောက်ဆုံးတော့ တစ်နိုင်ငံလုံး နာကြည်း ဒေါသစိတ်တွေ ရကြတယ်မဟုတ်လား။ 

နက်နက်ရှိုင်းရှိုင်း ကြိုးစားရင် 

ညီမျှမှုမရှိတဲ့ ဒီကမ္ဘာကြီးဟာ အင်အားနည်းပါးကြတဲ့ သူတွေမှာ အင်အားကြီးမားကြတဲ့ သူတွေရဲ့ ဖိနှိပ်မှုကို ခံရစမြဲပါပဲဆိုတဲ့ စကားပြောဆိုနေကြတယ်။ အဲဒီစကားဟာ နိုင်ငံရေးအတွေးနဲ့ ပြောခဲ့တဲ့စကား မဟုတ်ပါ။ ဝိရောဓိ (ဆန့်ကျင်ဘက်) ဖြစ်အောင် မွေးထုတ်တဲ့စကားပါပဲ။ အရှင်တို့တွေဟာ ညီမျှမှုမရှိမှုကို မနှစ်သက်သလို အင်အားကြီးမားတဲ့ သူတွေကိုလည်း မဖိနှိပ်ပါဘူး။ အင်အားကြီးမားပြီး ဖိနှိပ်တတ်သူကိုလည်း အရှင်တို့မှာ အရှုံးပေးလိုက်မှာလည်း မဟုတ်ဘူးဆိုတဲ့ သိန္နိဋ္ဌာန်အတွေးတော့ အမြဲရှိကြတဲ့သူတွေပါ။ မညီမျှတဲ့ခံစားမှုဟာ ဆင်းရဲမှုကို ကျော်လွှားနိုင်တာ မဟုတ်လို့ အဲဒီညွှန်ပြချက်ဟာ (ကို) အရှင်တို့အားလုံး တော်လှန်ကြရမှာပါပဲ။ မတရားသဖြင့် တော်လှန်ခြင်းဟာ လူတိုင်းရဲ့တာဝန်ပါပဲ။ မှားယွင်းမှုကို လက်မခံတဲ့သူဟာ သီးသန့်ဘေးဖယ်ထားလို့ မရပါ။ နားကြည်းချက်တွေ၊ ကြောက်လန့်မှုတွေ ဘယ်လောက်ပေးပေး တော်လှန်ရေးကို နက်နက်ရှိုင်းရှိုင်းနဲ့ ကြိုးစားကြရင် ကြောက်မက်ဖွယ် (စရာ) ဖြစ်တဲ့ အခက်အခဲတွေ ကျော်လွှားသွားမှာပါပဲ။

နမော်နမဲ့ မနေဖို့ 

အမျိုးသားရေးအတွက် သို့မဟုတ် မိမိတစ်မျိုးသားလုံး ဥပဒေအာဏာ လွှမ်းမိုးမှု ရှိဖို့အတွက် မိမိတို့အပေါ်မှာ ဘယ်လောက်များ မှားခွင့်ရှိကြမည်လဲ (မလဲ)။ လူတိုင်းအပေါ် မှားယွင်းနိုင်ခွင့်ရှိကြောင်း ဘယ်နိုင်ငံရေးအာဏာက ညွှန်ပြနေကြပါသလဲဆိုတာကို ပြန်တွေးကြပါ။ မှားယွင်းမှုကို အဓိကထားတဲ့ အနိုင်ပိုင်းမှုဟာ ကမ္ဘာပေါ်မှာ လက်လျှော့ကြရတဲ့ သမိုင်းချည်းပဲရှိကြပါတယ်။ အရှင်တို့ဟာ မိမိကိုယ်ကို ပို၍ (ပိုပြီး) ဂရုစိုက်ဖို့လိုပါတယ်။ နမော်နမဲ့နိုင်ချင်တဲ့သူကို စွမ်းဆောင်ရည် ကျဆင်းမှုဖြစ်အောင် လုပ်ဆောင်တတ်ရမယ်။ (မည်သူမျှ မထိခိုက်အောင် လုပ်တတ်ရမယ်)။ ရေရှည်အကျိုးရှိတဲ့ ကြီးပွားတိုးတက်ချမ်းသာမှုကို အစဉ်အမြဲ နှလုံးသွင်းတတ်ရမယ်။ ဆင်းရဲမှုကို ကျော်လွှားနိုင်ဖို့ စိတ်ပိုင်းဆိုင်ရာခံစားမှုကို လျော့နည်းအောင် မိမိကိုယ်ကို ထိန်းညှိနိုင်သော (နိုင်တဲ့) အရည်အသွေး ရှိရမယ်။ နိုင်ငံရေးပဋိပက္ခ ဖြစ်လာအောင် ဆွဲသွင်း အသုံးပြုခံရတဲ့သူ မဖြစ်အောင် နေတတ်ရမယ်။ မျက်နှာပျက်စရာ နိုင်ငံရေးကို ပြောင်းလဲတတ်အောင် လုပ်တတ်ရမယ်။ အကူအညီမဲ့သွားကြတဲ့ အသိုင်းအဝိုင်းကို ဝိုင်းဖွဲ့ပြီး ကူညီအားထုတ်ပေးနိုင်ရမယ်။ ဒေါသအကျိုးဆက်ပါတဲ့ တုံ့ပြန်မှုကို စက်ဆုပ်ရွံ့ရှာရမယ်။

အဆုံးသတ်ဖို့ တောင်းဆို 

မြန်မာ့နိုင်ငံရေး ဖြစ်ပျက်ပုံတွေဟာ ဘယ်နိုင်ငံရေးစနစ်ကို ပစ်မှတ်ထား ခဲ့ကြသလဲဆိုတာကို ပြည်သူတွေသိကြပြီလား။ (သိကြရဲ့လား)။ နိုင်ငံရေးအစွန်းရောက် ဝါဒီသမားတွေကို နိဂုံးချုပ်ပစ်ဖို့ ပစ်မှတ်ထား ကြတာလား။ ဒါမှမဟုတ် အမျိုးသားရေးအင်အားရှိတဲ့ အကြောင်းကို ပစ်မှတ်ထားပြီး နိုင်ငံရေးပြောင်းလဲအောင် လုပ်နေကြတာလားဆိုတဲ့ စဉ်းစားချက်တွေကို အရှင်တို့ကိုပေးနေတဲ့ နိုင်ငံရေးဖြစ်လာခဲ့ပါပြီ။

ကမ္ဘာပေါ်မှာ မြန်မာတွေဟာ စုစည်းနိုင်တဲ့ အရည်အချင်း မရှိခြင်းကစပြီး ဖြစ်နေကြရင် မြန်မာဟာ လက်တွေ့ (ကိုယ်တွေ့) အရ တစ်နေ့နေ့ တစ်ချိန်ချိန်မှာ ယခင်ကထက် ပိုပြီးတော့ စိတ်ဝမ်းတွေကွဲလာကြမယ်။ အကျိုးမဲ့တဲ့ ပုံပျက်ချက်တွေ၊ သိက္ခာမဲ့တဲ့ဖြစ်ခြင်းတွေ၊ အမုန်းပွားတဲ့ အကြမ်းဖက်မှုတွေ၊ အကျိုးစီးပွား ပျက်စီးတဲ့ စိန်ခေါ်မှုတွေ တစ်နေ့နေ့မှာ ဖော်ကျူးခြင်းခံရတော့မယ် မဟုတ်လား။ ဒီအတွက် မြန်မာတွေအချင်းချင်း ခေါင်းပုံဖြတ်တဲ့ နိုင်ငံရေးသုံးစွဲခြင်းကို အဆုံးသတ်ကြဖို့ တောင်းဆိုပါတယ်။

(ဆက်ရန်)

တို့ဘိုးဘွားအမွေစစ်မို့ (၇) – မဟာပညာ (mahar.asia)

တို့ဘိုးဘွားအမွေစစ်မို့ (၆) – မဟာပညာ (mahar.asia)

တို့ဘိုးဘွားအမွေစစ်မို့ (၅) – မဟာပညာ (mahar.asia)

တို့ဘိုးဘွားအမွေစစ်မို့ (၄) – မဟာပညာ (mahar.asia)

တို့ဘိုးဘွားအမွေစစ်မို့ (၃) – မဟာပညာ (mahar.asia)

တို့ဘိုးဘွားအမွေစစ်မို့ (၂) – မဟာပညာ (mahar.asia)

တို့ဘိုးဘွားအမွေစစ်မို့ (၁) – မဟာပညာ (mahar.asia)