Category: စကားလက်ဆောင်

။ တခါတလေတော့
ကိုယ့်ကိုယ်ကိုတော့
သူဌေးသူကြွယ်ပေါ့။

။ တခါတလေတော့
ကိုယ့်ထိုက်နှင့်ကိုယ့်ကံလေးတော့
မယုံချင်သလိုပဲပေါ့။

။ တခါတလေတော့
ဟိုနေ့လေးလိုမဖြစ်တော့
ဒီနေ့လည်း ဟိုနေ့လေးလိုမဖြစ်တော့
ဘဝရဲ့အကျပ်အတည်းက
သည်နေ့နဲ့ဟိုနေ့နဲ့မတူတာက
မဆန်းပါဘူးလို့ပါပဲ။

။ ဒါပေမဲ့
မခက်ခဲတဲ့အခက်အခဲကို
ခက်ခဲခဲ့တဲ့ခုလိုအချိန်မှာ
ရှေ့ဆက်ရမယ့် ဘဝဆက်တွေ
အသက်ကမနိုင်တော့သလိုပါပဲ။

။ တစ်နေ့တာအတွက်
တစ်ရွေ့စာအသက်နဲ့
တစ်မေ့စာမဖြစ်ဖို့
ဘဝမှာ ပန်းလေးလိုပဲ
လှပါ့မည်လားပါပဲ။

နေဘုန်းသစ်
(၂၉.၁၁.၂၀၂၁) ရက်နေ့။

။ ရင်ကျိုးတာ
ကြိုးနဲ့ချည်ထားမရဘူး။

။ ကြိုးပြတ်သွားရင်
ပြန်ချည်ကြည့်ပါ
ပြန်ပြီးမပြတ်ဘူး။

။ ကြိုးခိုင်ရင်
မပြတ်တတ်ပါဘူး။

။ ဒီကြိုးကို
ဖြည်လို့မတတ်တော့ဘူးလား?။

အဲးခိုး (၁၈.၁၁.၂၀၂၁) ရက်နေ့။

အကြံပြုချက်

။ လူ့ဘဝမှာ အသက် ၆၀ ကျော်ပြီးဆိုရင် ကျန်နေတဲ့ အသက်ကျန်အချိန်ကို တန်ဖိုးထားပြီး ဘယ်လိုနေထိုင်သင့်တယ်ဆိုပြီးတော့ စာတွေမှာ အကြံဉာဏ်တွေပေးထားကြပါတယ်။

ဖြတ်သန်းသင့်သလဲ?

။ ဘယ်လိုနေထိုင်ဖြတ်သန်းသင့်သလဲ?ဆိုတဲ့အပြုသဘောဆောင်တဲ့အကြံပေးချက်တွေအထဲက
၁) ခလေးဘဝကို ပြန်ပြီးတော့အမှတ်ရပါ၊
၂) ခလေးတွေနဲ့ပေါင်းသင်းလုပ်ပါ၊
၃) ခလေးပုံပြင်တွေ များများဖတ်ပါ၊
၄) ခလေးတွေရဲ့စကားကိုနားထောင်ပေးပါ၊
၅) ခလေးတွေလို ပျှော်ပျှော်နေပါ၊
၆) ခလေးတွေနဲ့ပျှော်ပျော်ရွှင်ရွှင်နေပါ၊ ကစားပါ ဆိုပြီး အကြံပေးထားချက် ၆ ချက်နဲ့ အဆိုပြုထားတာတွေ တွေ့ရပါတယ်။

လက်လွှတ်ရ

။ အဲဒီအချက် ၆ ချက်ထဲက မိမိအနေနဲ့လက်ခံနိုင်တဲ့အချက်တွေပါဝင်နေပါလားပါပဲ။ အရှင်တို့ရဟန်းအနေနဲ့ကတော့ လက်လွှတ်ရတဲ့အချက်သက်သက်ပါပဲ။

အားဆေး

။ နောက်ပြီးတော့
၁) အသုံးမပြုအသုံးမလိုတော့တဲ့ပစ္စည်းတွေ၊
၂) ကျန်းမာရေးနဲ့မညီညွတ်တဲ့အကျင့်ဆိုးတွေ၊
၃) ပေါင်းသင်းလို့မကောင်းသူတွေ၊
၄) စိတ်ခုစရာအကြောင်းအရာတွေ၊
၅) အတိတ်ကအယူအဆတွေ၊
၆) စိတ်ဆင်းရဲစရာအကြောင်းအရာတွေကို စွန့်လွှတ်ပစ်ပယ်ရပါတယ်ဆိုပြီးတော့ အကြံပြုချက်ပေးထားပါတယ်။ ဒီအကြံပြုချက် ၆ ချက်ကိုတော့ အရှင်အတွက်အားဆေးပါပဲ။

ရှိပြီးသားအချက်

။ တစ်ခါ မှတ်ရမဲ့ အချက် ၆ချက်ဆိုပြီး အကြံပြုထားပါသေးတယ်။
၁) သက်သောင့်သက်သာနေပါ၊
၂) မိသားစုပေါ်ချစ်ခင်ပါ၊
၃) အကောင်းမြင်တတ်သူဖြစ်ပါစေ၊
၄) သာမာန်ကိစ္စလက်သင့်ခံတတ်ပါစေ၊
၅) မိတ်ဆွေများများဖွဲ့ပါ၊
၆) သိပ္ပံနည်းကျကျစားသောက်ပါလို့ အဆိုပြုအကြံပေးထားပြန်တော့ အမှတ်စဉ် ၁,၂,၆, အချက်ကတော့ အရှင်အတွက် ရှိပြီးသားပါပဲ။

မလွယ်ကူနိုင်

။ ပြီးတော့ ရတနာ ၆ ပါးအဖြစ် သတ်မှတ်ပေးထားပါသေးတယ်။
၁) အိမ်ထောင်ဖက်ကြင်ဖော်ရှိနေခြင်း၊
၂) နေဖို့နေအိမ်ရှိခြင်း၊
၃) အိုစာမင်းစာရှိခြင်း၊
၄) ကျန်းကျန်းမာမာရှိခြင်း၊
၅) ဥပဓိရုပ်သန့်ပြန်၍စိတ်မှန်ခြင်း၊
၆) နေ့စဉ်ပြုံးပြုံးရွှင်ရွှင်ရှိခြင်းဆိုတဲ့ အကြံပြုချက်ထဲက အမှတ်စဉ် ၁ ကတော့ ရဟန်းတွေအတွက် မသက်ဆိုင်တော့ခြင်းပါပဲ။ အခြား ၅ ချက်ကတော့ ပြည့်စုံဖို့ လူတွေအားလုံးအတွက် လွယ်ကူကြမယ်မထင်မိပါဘူး။

အလွန်တန်ဖိုးထားပါ

။ ပြီးတော့ မိတ်ဆွေသူငယ်ချင်းများနဲ့ဆက်ဆံတဲ့အခါမှာ ရှောင်ကြဉ်ဖို့အချက်တွေလည်း သတိပေးထားပြန်ပါတယ်။ လေ့လာကြည့်ကြရအောင်ပါ။
၁) မကြွားဝါမိစေနဲ့၊
၂) မိတ်ဆွေရဲ့အတွင်းရေးကိစ္စကို လေးစားလျှို့ဝှက်ပေးပါ၊
၃) နေရာတကာဝင်မစွက်ဖက်ပါနဲ့၊
၄ ငွေကြေးအရှုပ်အရှင်းမဖြစ်မိပါစေနဲ့၊
၅) အလွယ်တကူအထင်အမြင်မလွဲမိပါစေနဲ့ဆိုပြီး အပြုသဘောဆောင်တဲ့ဒီအကြံပြုချက်တွေဟာ အလွန်တန်ဖိုးရှိပါတယ်မဟုတ်လား။

မိဘဖြစ်သူတွေအတွက်

။ နောက်ပြီးတော့ သားသမီးမျာနဲ့ ဆက်ဆံတဲ့အခါမှာ ဒီလိုလေးတွေလည်း သတိထားစေတာတွေပါလို့ အကြံပြုချက်ပေးထားပါသေးတယ်။
၁) အားမကိုးမိပါစေနဲ့။
ကြီးမြတ်လေးစားထိုက်သောမိဘဂုဏ်သိက္ခာကိုထိခိုက်မခံမိပါစေနဲ့။
၂) ဝင်မရှုပ်မိစေနဲ့။
သားသမီးတွေအရွယ်ရောက်လာတဲ့အခါသူတို့လုပ်ငန်းသူ့တို့စိတ်သဘောနဲ့သူထားလိုက်ပါ။ မိမိနဲ့သဘောထားချင်းအမြဲတူချင်မှ တူနိုင်မညယ်။ မတူလည်းမစိုးရိပ်ပါစေနဲ့၊ သူတို့လည်းသူတို့နည်းသူတို့ဟန်နဲ့ ဖြေရှင်းနိုင်တာကိုယုံကြည်စိတ်ချပေးပါ။
၃) လက်ဖြန့်မတောင်းမိစေနဲ့။
မိဘကသားသမီးကို ငွေပေးရတာကထုံးစံဖြစ်ပဲမဲ့၊ သားသမီးဆီကငွေပြန်တောင်းဖို့တော့ ခက်ခဲတတ်ပါတယ်။
၄) အနှောင့်အယှက်မပေးမိစေနဲ့။
အလုပ်ချိန်အတွင်း တတ်နိုင်သလောက် ဖုန်းမဆက်မိပါစေနဲ့။ သားသမီးအလုပ်ကိစ္စကို အနှောက်အယှက်ပေးသလိုဖြစ်တတ်တယ်။ သားသမီးတွေနဲ့ စကားပြောဆက်သွယ်နိုင်မယ့် အချိန်တခုကို သဘောတူညီမူရယူပြီး သတ်မှတ်ဆက်သွယ်သင့်ပါတယ်။
၅) ဘောင်မကျော်မိစေနဲ့။
မြေးမြစ်တွေရဲ့ ပညာရေးဟာမိဘရဲ့ တာဝန်ဖြစ်ပြီး အဖိုးအဖွားတွေဝင်ရောက်တာဝန်မယူသင့်၊ ( တာဝန်မယူပါနဲ့)
၆) ပင်ပင်ပန်းပန်းငွေဆက်မရှာသင့်။
ငွေတန်ဖိုးရှိချင်ရှိပေမဲ့၊ အိုမင်းလာတဲ့အခါ ငွေကတန်ဖိုးမရှိ အသက်ရှည်ဖို့ကတန်ဖိုးပိုရှိတယ်ဆိုတဲ့ ဒီအကြံပြုချက်ဟာ အားလုံးအမှန်ဖြစ်တာကြောင့် အရှင်အတွက် အဲဒီလိုမျိုးနေထိုင်ကြတဲ့မိဘတွေကိုပဲ နှစ်သက်ပါတယ်။

နိဂုံး

။ အသက် ၆၀ ပြည့်ပြီးသူတိုင်းအတွက်ဆိုပေမယ့် မပြည့်ကြသေးတဲ့သူတွေအတွက်လည်း အကျုံးဝင်ပါတယ်။ ဒါကြောင့် အသက်ကြီးကြီးငယ်ငယ်အားလုံး ဆင်ခြင်နိုင်ကြဖို့ ရေးဖြစ်ပါတယ်။

အဲးခိုး (၁၁.၁၁.၂၀၂၁) ရက်နေ့။

(အမှာ > ပီကင်းကအမေကြီးရဲ့ဆုံးမစကားအားဆီလျှော်အောင်ဘာသာပြန်ဆိုထားသူကို မှီငြမ်းပြုပါတယ်။)

။ မမေ့နေရာ
မေ့သောခါမှာ
မေတ္တာခြားခြင်းပဲ။

။ မတွေ့သောခါ
အောက်မေ့ခါသာ
ခါခါသတိရခြင်းပဲ။

။ မမေ့နေရာ
ကမ္ဘာ့ရွာမှာ
ဆရာ့နေရာ အရိပ်ပဲ။

နေဘုန်းသစ်
( ၂၄.၁၉.၂၀၂၁) ရက်နေ့။

။ ငတ်ခဲ့သော ဆွမ်းတစ်နပ် ။
~~~~~~~~~~~~~~~~~~~
။ ၁၉၈၈ ခုနှစ်
မြန်မာပြည် အရေးအခင်းပြီးစီးသွားသောအခါ
သူသူငါငါ
အပြင်ကမ္ဘာနဲ့ထိတွေ့သွားကြတဲ့အချိန်က
ဤအရှင်သည်လည်း
အမိမြန်မာပြည်အတွက်
ကွန်ပျူတာနည်းပညာနဲ့
ပါဠိ+သက္ကတဘာသာစာပေအတွက်
နည်းပညာဆည်းပူးဖို့
အမိတိုင်းပြည်ကနေ
တစ်ပါးတည်းထွက်ခွာသွားပါတယ်။

။ သက်တော်က မကြီးသေး
ဝါတော်လည်း မကြီးသေး
၂၈ နှစ်ဆိုတဲ့အရွယ်လေးပေါ့။

။အိမ်နီးနားချင်း
တိုင်းပြည်တပြည်ရောက်တော့
ရှေ့ဆက်မယ့်ခရီးမကြွသေးမီ
အမှီအခိုကင်းကင်းနဲ့
ကိုယ်စိတ်တင်းပြီး
အာရှနိုင်ငံရဲ့
တစ်ချိန်ကမြို့ကြီးတစ်မြို့ရဲ့အလယ်မှာ
နံနက်စာအတွက်
နံနက်ခင်းဆွမ်းခံဝင်ခဲ့ပါတယ်။

။ မိုးလင်းအရုဏ်ဦးချိန်မှစပြီး
အလင်းသစ်သစ်
နံနက်အချိန်တိုင်အောင်
ဆွမ်းခံလှည့်လည်ကြွခဲ့ပေမယ့်
လောင်းသူမတွေ့
လှူသူမရှိ
လမ်းဆုံ လမ်းဆုံး
အကုန်လုံးကြွရောက်ခဲ့ပေမယ့်
ထိုနေ့ ဆွမ်းမရ
အငတ်ကြီးငတ်ခဲ့ရသော
ပြင်ပနိုင်ငံတစ်ခုရောက်ခဲ့တဲ့
ဘဝရဲ့အလှဒဿနကို
ယနေ့တိုင်အောင်
မမေ့နိုင်ပါပဲ။

။ မြင်ရတဲ့
ဓာတ်ပုံကအတိုင်းပါပဲ
ပိန်ညောင်ကိုင်းတဲ့
ရဟန်းတစ်ပါးရဲ့ဘဝအကိုင်းက
အပိုင်းကိန်း မရိုင်းခဲ့ပေမယ့်
ရင်ထဲကအပိုင်းပိုင်းပါပဲ။

။ သည်နေ့တော့
ထိုနေ့ကအကြောင်းကို
ပြန်ပြောင်းပြောမိလေတိုင်း
တိမ်ယံက မိုးသားတွေ
ရွာချနေသလိုပါပဲ ဒါယကာတို့ရေ။

တောင်ကလေးဆရာတော်
(၆.၁၀.၂၀၂၁) ရက်နေ့နံနက်။

Original Post: Facebook, Instagram

။ တစ်ခုခုတော့
အကြောင်းရှိပြီ
ပင်ပန်းနေခြင်းလားပါပဲ။

။ တစ်မှုမှုတော့
အကြောင်းပြုပြီ
အကျိုးစုတွေလားပါပဲ။

။ တစ်ယုတယနဲ့
စုထားတဲ့အေးစုတွေ
သည်နေ့ငြိမ်သက်ခြင်းပါပဲ။

တောမှီရဟန်း
(၁၅.၁၀.၂၀၂၁) ရက်နေ့။

။ တစိစိ
တစာစာ
သံကလေး မသာသာလည်း
သူအိမ်လေးနဲ့သူပါပဲ။

။ ” မြကျေးငှက်
အုန်းလက်ဖျားက
လက်သမား စာမောင်နှံ
သိုက်ဆောက်ကြပျံ။
စူလို့သာညံ
……………..
မိုးစိုစို ခိုအောင်းတဲ့
ကောင်းတယ်ကွယ့်လေး”
ကလေးတေးကို
ငယ်ငယ်က စာသင်ကျောင်းမှာ
ဆိုခဲ့ကြတာပေါ့။

။ ကဗျာဆို
မမှန်တော့
နားဝင်ပီယံမဖြစ်ပေါ့။
ခုတော့ စာဘူးအိမ်မြင်ရပြန်တော့
စာကျက်ချိန်ရောက်ရင်
စာငှက်အိမ်ပြန်လာရင်
စာကျက်လို့ပျော်။

။ အိမ်ရှေ့ကအုန်းပင်ထက်
စာငှက်လေးအသံဆက်ရင်
ကိုယ်နဲ့လည်းစာတွေကျက်လို့
စာငှက်လိုပဲ။

။ ကိုင်း ဒီနေ့တော့
စာဘူးတောင်းမှာနားမည်လား
စာဘူးအိမ်မှာ အိပ်မည်လား
စာတွေကျက်ဖို့ ထပါတော့။

ကိုရင်ဖိုးခွေး( မန်းမြေ)
(၉.၁၀.၂၀၂၁) ရက်နေ့။

။ သူတစ်ပါးက အဖက်မလုပ်လည်း ဝမ်းမနည်းပါနှင့်။
။ တစ်ယောက်တည်း နေရရင်လည်း ဝမ်းမနည်းပါနှင့်။
။ ကြီးကျယ်ခမ်းနားထည်ဝါစွာ နေထိုင်ရလည်း ဝမ်းမသာပါနှင့်။
။ မိမိကို အမြဲတမ်းအနိုင်ကျင့်လည်း ဝမ်းမနာပါနှင့်။
။ မိမိကို အမြဲတမ်းအားပေးသူလည်း ဝမ်းမမြောက်နှင့်။
။ လူ့ဘဝလေးနေရချိန်မှာ အေးအေးမြမြရှိဖို့က အဓိကပါ။
။ ပူပူလောင်လောင် မနေရပါစေနှင့်။
။ အကြင်နာဆိုတာလည်း ထာဝရမဟုတ်ဘူး။
။ မေတ္တာဆိုတာလည်း လက်ဆောင်တွေပါပဲ။
။ မြတ်နိုးမှုဆိုတာလည်း ဆိတ်သုဉ်းခြင်းပါပဲ။
။ ချစ်ခြင်းမေတ္တာလည်း ကုန်ခန်းသွားတတ်တာပါပဲ။
။ ဒီနေ့တော့ တစ်ယောက်တည်းပဲ နေကြည့်လိုက်။

တောင်ကလေးဆရာတော်
(၂၇.၉.၂၀၂၀) ရက်နေ့နံနက်။