မဟာပညာ
။နွေအစ
တန်ခူးလ
မြူမှုန်ခ
နွေသစ်စ
သတိရ
မဆုံကြ
သည်လ တန်ခူးပွဲ။
။ ပန်းလှလှ
ခူးပေးကြ
ပန်ပေးကြ
ရေမြမြ
ဖက်ဖြန်းကြ
ကြည်နူးကြ
ပျော်ရွှင်ရ
သည်လ တန်ခူးပဲ။
။ တစ်နှစ်မှာ
တစ်ခါကျ
သင်္ကြန်လ
ဆုံနေကြ
တူသွားကြ
ရေမဏ္ဍပ်
ကကြ သည်လပဲ။
။ ခုတော့
တမ်းတမ်းတ
သတိရ
အောက်မေ့ကြ
တသသ
လွန်းကြင်ရ
ခွဲကြ သည်လပဲ။
လွမ်းကြ သည်လပဲ။
ကိုရင် ဖိုးခွေး ( မန်းမြေ )
(၁.၄.၂၀၂၂) ရက်နေ့ညနေခင်း။)
။ လူ့ဘဝသက်တမ်းလေးက
အချိန်အကြာကြီးမရကြပါဘူး
အလွန်ဆုံး နှစ်တစ်ရာပေါ့။
။ နှစ်တစ်ရာထဲမှာပဲ
အခက်အလက်
အချက်အလက်
အမျိုးစုံ
အကြောင်းစုံ
အကြောင်းဆုံ
အကျိုးဆုံပါပဲ။
။ ဖြစ်တော့လည်း အမျိုးမျိုး
မဖြစ်တာလည်း အဖုံဖုံရှိတော့
စိတ်ဓာတ်တွေကျ
စိတ်ငယ် စိတ်ကုန်
စိတ်လေ စိတ်လေး
အတွေး အဆွေး
စုံလင်လို့ပါပဲ။
။ မသင့်မမြတ်
မမျှမတ
မညီမညွတ်
ဒေါသ
အာဃာတ
ပဋိပက္ခ
ဝိရောဓိတရား
ချစ်ကြမုန်းကြ
တိုက်ကြခိုက်ကြ
ပါဏ အတိ ပါတတွေ
ဝိသေသထားကြပြီး
လူနေကမ္ဘာကြီးဟာ
တစ်ဖက်သတ်
ကျစောင်းနေကြပါပြီလားပါပဲ။
။ လူအချင်းချင်း
လှည့်ပတ်ခြင်းက
မကင်းနိုင်ကြတဲ့လောကမို့လား
သောကဖြစ်ခြင်းက
အပြင်းအထန်
အကျည်းတန် အကျဉ်းတန်ပါပဲ။
။ သည်တော့
မိမိရရ
ကြိုးပမ်းကြတဲ့
ဓမ္မခန်မရှိကြတော့
တိတိကျကျ
တိတိပပအချက်တွေ
အကြောင်းမဲ့စွာ
ရက်စက်ကြလို့
လူသားကမ္ဘာမတူတော့။
။ ဒါကြောင့်
အဲဒါကြောင့်
ကြောင့်ကြစိုက်ရ
လူ့ဘဝကို
ဒေါသစိတ်တွေ ပြေပါစေ
မေတ္တစိတ်တွေ လှပါစေလို့
ဝဋ်ပြေ ဝဋ်ခွေ ရပ်ပါစေ။
တောမှီရဟန်း
(၃၀.၃.၂၀၂၂) ရက်နေ့ညနေခင်း။)
။ မပြေလည်တော့
တစ်ခုခု ပြေလည်မယ်လား
ယတြာတွေချေ မပြေ။
။ အဆင်မပြေတော့
တစ်ခုခု အဆင်ပြေမယ်လား
ကုသိုလ်တွေပြု မပြေ။
။ လာဘ်တွေစန်းတွေပိတ်တော့
လာဘ်ရွှင်စန်းတွေဝင်အောင်
တစ်ခုခု
ဥုံခံဖွတွေ ဂါထာရွတ်လည်း
လာဘ်မရွှင်
စန်းမထ။
။ တစ်ခုခုလိုမယ် အထင်နဲ့
ဖွားသီလပြု
ရသေ့ပြု
သူတော်သူမြတ်ပြုကြလည်း
ဘာဆိုဘာမှ မလာ
နေ့ညဗလာနယ်။
။ နောက်ပိတ်ဆုံး
ဘိုးတော်မယ်တော်
နတ်မေး
လူမေး
အကြားအမြင်မေး
အကုန်တွေ မေးလည်း
အဆင်ကို မပြေ။
။ ဒီနေ့တော့
အဆင်ပြေသွားတာက
ကိုယ့်အိမ် ကိုယ်နေ
ကိုယ့်အလုပ် ကိုယ်လုပ်
သူ့အလုပ် သူလုပ်
မရှုပ်ဘဲ နေလိုက်တာကိုပဲ
အဆင်ကိုပြေ
အဆင်ကိုပြေပေါ့
ခင်ခင်ကြော့ရယ်။
(မည်သူ့ကိုမှ မရည်ရွယ်ပါ။)
ကိုအောင်ဖေ
(၂၄.၃.၂၀၂၂) ရက်နေ့နံနက်။)
။ အကြင်နာတရားနဲ့မေတ္တာတရားဟာ လူတိုင်းရဲ့အသိထဲကဖြစ်ကြတဲ့တရားတွေပါ။ အကြင်နာတရားပိုရင် ပိုပြီးခံစားရသလိုပဲ မေတ္တာတရားပိုလာခဲ့ရင်လည်း ပိိုပိုပြီးခံစားကြရမှာပါပဲမဟုတ်လား။
။ အဲဒီတော့ အကြင်နာဟာ အပေါ်စီးရတဲ့အချိန်မှာ မေ့တတ်ကြပြီး ၊ မေတ္တာဟာတန်းညှိတဲ့အခါမှာ ပိုပိုပြီးတော့ သိသာပါတယ်မဟုတ်လား။ ဒါကြောင့် အပေါ်စီးသမားဟာ အကြင်နာမပိုတတ်သလို အဆင့်အတန်းခွဲခြားတတ်တဲ့သူဟာ မေတ္တာမဲ့ကြတာပါပဲ။
။ သတိမထားတဲ့သူဟာ လူတိုင်းမှာအကြင်နာတရားရှိကြတယ်လို့ပဲ ထင်နေကြတာပါ။ တကယ်တော့ အကြင်နာတရားဟာ လူတိုင်းမရှိကြပါဘူး။ ရှည်ရှည်ဝေးဝေးမကြည့်ပါနဲ့။ ကိုယ့်ကိုယ်ကိုယ်သတ်သေတဲ့သူဟာ သူ့မှာအကြင်နာတရား မရှိလို့ဘဲမဟုတ်ဘူးလား။
။ မေတ္တာတရားလည်းကြည့်ပါ။ မေတ္တာလောကမှာ ဘယ်အဆင့်အတန်းကိုမှ မခွဲခြားကြပါဘူး။ ဒါပေမဲ့ မေတ္တာမဲ့လာကြတဲ့အခါ ရင်ဝယ်ပိုက်ထွေးထားကြတဲ့သားသမီးတွေကိုတောင်မှ စွန့်ပစ်နိုင်ကြပါလေရဲ့မဟုတ်လား။
။ ဒါကြောင့် ယနေ့ အကြင်နာပိုကြတဲ့သူတွေ၊ မေတ္တာပိုကြတဲ့သူတွေကို မေးလိုတာက အခြား( တစ်ခြား) မဟုတ်ပါ။ မိမိတို့နှလုံးအိမ်ထဲက
၁) အကြင်နာတရားပိုလာရင်
၂) မေတ္တာတရားပိုလာခဲ့ရင် ဘာတွေများ အခြား(ဒိပြင်) ဖြစ်လာကြပါသေးသလဲ? လို့ ပဲ မေးပါရစေ။
တောင်ကလေးဆရာတော်
(၂၂.၃.၂၀၂၂) ရက်နေ့။
။ မနေ့က
တနေ့က
တပည့်ရဟန်းတပါး
သိက္ခာချပြီး
လူပြုလိုက်ပါပြီဆိုတဲ့
သူ့သတင်းကိုကြားကြားချင်းပါပဲ
ရုတ်တရက် မနောဓာတ်က
တစ်ခဏမျှ
ကမ္ဘာကြီးက
တစ်ဖက်ကျစောင်းသွားသလိုပဲ
ခံစားရမိပါလေရဲ့။
။ ရှင်သာမဏေတစ်ပါးဖြစ်ဖို့
မခဲယဉ်းပေမယ့်
ရှင်သာမဏေတစ်ပါးမြဲဖို့
ခုခေတ်ကာလမှာ
ပိုလိုများခက်ခဲလေမလားပါပဲ။
။ သည်ထက်သည်ထက်မက
ပိုပိုပြီးခက်ခဲတာက
ရဟန်းတစ်ပါးမြဲဖို့
ရဟန်းတစ်ပါးသာသနာတော်မှာ
ပျော်ပိုက်ဖို့က
ပိုပိုများခဲယဉ်းလေပြီလားပါပဲ။
။ တပည့်ဖြစ်သူကတော့
သာသနာ့ဝန်ထမ်းဘဝမှ
လူ့ဘဝဝန်ထမ်းလောကသို့
ရောက်နေပြီးဆိုတော့
သာသနာ့ဝန်ထမ်းကာလက
ဒါယကာတွေရဲ့ငြိုငြင်မှုဒဏ်တွေတော့
လွတ်ကျွတ်သွားပြီပေါ့။
။ သာသနာ့ဝန်ထမ်းချိန်က
ပရိယတ္တိပညာရေးကတစ်ဖက်
ပဋိပတ်အကျင့်ရေးကတစ်ဖက်
ပဋိပက္ခခွဲခြားဆက်ဆံခံရတာက
တစ်ဖက်သတ်ဆိုတော့
လောကီရေးစွက်ဖက်ခံစားရတာလည်း
အာပတ်ဖြေလို့ မပြီးနိုင်လောက်အောင်ပါပဲ။
။ လူထွက်လူပြုသွားပြန်တော့လည်း
အများကြားမှာ မျက်နှာငယ်လေးနဲ့
မဝံ့မရဲလူအများကြားမှာ
အဲဒီအဖြစ် ဖြစ်ရတာလည်း
ခံစားဖူးမှ သိကြတာပါ။
။ မိဘဆွေမျိုး
ရဟန်းအမ
ရဟန်းဒါယကာတွေကတော့
နှမြောတသရပေါ့။
။ မိဘနှစ်ပါးရဲ့ရင်လွှာမှာတော့
ရွာဦးကျောင်းမှာ
ဆွမ်းတော်ခံယူဖို့
ဆွမ်းခံကြွရောက်လာကြတဲ့
သံဃာအတန်းကိုကိုကြည့်နေရင်းနဲ့ပဲ
ရင်ထဲမှာမိုးတွေရွာပေါ့။
။ ဪမိဘဆိုတာ
သားသမီးဝတ်ရှိကြပေမို့
သားသမီးတွေအတွက်
သူတော်ကောင်းအမွေကိုပဲ
ဝတ္တရားကျေချင်ကြတယ်မဟုတ်လား?
ခုတော့ သားရဟန်းက
မနေ့က
တနေ့က
ဟိုနေ့ကပဲ
လူပြုခဲ့ပြီဆိုတော့
ကြည်ညိုရပါသော
စေတနာအရင်းခံစိတ်တွေက
မိဘနှစ်ပါးအဖို့ အပူမီးဗျာပါကြွယ်ပေါ့။
။ ဒီနေ့လည်း
မမျှော်လင့်ပဲ
သီလရှင်တစ်ပါးကလည်း
လူပြုဖို့လာလျှောက်ကြားသောအခါ
ဘုရားသာသနာကို
သီလရှင်လည်း မမြဲ
ဖိုးသူတော်လည်း မမြဲ
ရသေ့တွေလည်း မမြဲ
သာမဏေတွေလည်း မမြဲ
ရဟန်းတွေလည်း မမြဲကြတော့ရင်
သာသနာ့ရွှေရောင်နေ့
တစ်နေ့နေ့
တမြေ့မြေ့ပဲ
တမ်းတရမယ့်နေ့တွေပဲ
ဖြစ်ကြရလေမလားပါပဲ။
။ သည်နေ့တော့
ရင်ဝယ်မမြေ့
မချမ်းမြေ့ဘူး
ဘယ်နေ့ သာသနာလင်းတော့မယ်။
( ဓာတ်ပုံကို ယူသုံးပါသည်။ ခွင့်ပြုပါရန်။)
တောမှီရဟန်း
(၂၁.၃.၂၀၂၂) ရက်နေ့နံနက်။)
။ လူတစ်ယောက်ရဲ့မာနဟာ
ပြိုင်ဆိုင်မှ သိနိုင်တာပါ။
။ ငှက်တစ်ကောင်ရဲ့မာနဟာ
ပျံသန်းမှ သိနိုင်တာပါ။
။ ပညာရှိတစ်ဦးရဲ့မာနဟာ
အခက်အခဲရှိမှ သိမြင်နိုင်တာပါ။
။ လူမိုက်တစ်ယောက်ရဲ့မာနဟာ
လိမ္မာတဲ့အချိန်မှ သိမြင်နိုင်တာပါ။
။ အကျင့်ပျက်ယွင်းကြသူတွေရဲ့မာနဟာ
ဆုတ်ယုတ်ပျက်စီးချိန်မှ သိမြင်နိုင်တာပါ။
။ သူကောင်းတွေရဲ့မာနဟာ
တရားထူးရတဲ့အချိန်မှ သိမြင်ရတာပါ။
။ မိမိထားတဲ့ကိုယ်ပိုင်မာနဟာ
ဆင်းရဲဒုက္ခရောက်မှ သိမြင်နိုင်တာပါ။
တောင်ကလေးဆရာတော်
(၂၀.၃.၂၀၂၂) ရက်နေ့နံနက်။)
။ တစ်နေ့မှ မမေ့ဘဲ
ရင်ထဲက အလှဖြာပေါ့
ပျော်မွေ့ခဲ့ အမေ့ရွာလေ
ပျော်စရာ့ ဓလေ့ရွာရယ်
ငယ်ငယ်လေးက နေလာခဲ့တာ။
။ အင်းပတ်လည်ဝိုင်းဝိုင်းစက်
ပါရမီတံတားအလှနဲ့ပါ
ညို့ဆိုင်းဆိုင်း ဇွဲကပင်နဲ့
ပင်စပါးစိမ်းလန်းဖြာလို့
ပျော်ရပေါ့ ငယ်ကရွာ။
။ သုံးရာသီ သုံးပန်လှ
သာယာတဲ့ ဇာတိရွာ
သည်နွေဦးမှာ
လာလည်ပါ ဆွေသဟာများ
အေးမြမေတ္တာ ချစ်ကြည်ပါတယ်
ခါတစ်ခေါက်လာစေချင်တာ
တို့လှာကမြင်ရွာပေါ့။
ဘုန်းသစ်ထူး
(၁၈.၃.၂၀၂၂ ရက်နေ့။)
(ကာရံမဲ့ ကဗျာပါ။)
။ ရိုးတံမဲ့ချိန်ကို
ဘယ်သစ်ပင်မှမဖြစ်ချင်ပါဘူး။
အဖိုးတန်မဲ့ချိန်ကို
ဘယ်သူတွေမှမဖြစ်ချင်ပါဘူး။
သို့သော်
အချိန်စေ့တော့
မဲ့ရာမဲ့ပေါ့ သူငယ်ချင်း။
။ လောကမှာ
အတွယ်အတာ
ခင်ရာမင်ရာ
ချစ်စရာတွေအားလုံးဟာ
အချိန်အခါကို
သူမလွန်ဆန်နိုင်ကြပါဘူးလေ။
။ တကယ်တော့
ဒီအကြောင်းလေးတွေဟာ
ရင်မနောရှိသူတိုင်း
အသိဉာဏ်ရှိသူတိုင်းရဲ့
သိရှိခံစားချက်ဝေဒနာတွေပါပဲ။
။ အလှည့်ကျအချိန်
အကွက်ကျအချိန်
တမ်းတမက်မောနေကြပေမယ့်
ကြွေချိန်ရောက်တော့
သူ့သဘောပါပဲ မဟုတ်လား။
။ ခုတော့
နွေဦးအစမှာ
လေတွေတဖြေးဖြေးဖြတ်ကာသွားတော့
တောစက သစ်ပင်အလှတွေက
ရိုးတံမဲ့ချိန်ပေါ့။
။ ခုချိန်မှာ
ဒီချိန်ခါမှာ
သည်နေရာတွေမှာ
ဖိုး တန် မဲ့
အကျိုးတန်ပျက်ချိန်လေးပေါ့။
။ ဒါကြောင့်
အဦးအမွန်အစ
ရာသီစက်ဝန်းဟာ
နွေဦးသစ်စချိန်။
ကြွေဦးဖြစ်စ သည်အချိန်ကို
လေရူးသုန်သုန်
ဖူးငုံမပွင့်နိုင်သေးတဲ့
သည်အချိန်လေးကို
အဝေးသို့သာ
သည်နွေဦးကို တမ်းတမိပြီ။
အဲးခိုး( ၁၈.၃.၂၀၁၉) ရက်နေ့နံနက်ချိန်။
(ကာရံမဲ့ စမ်းသပ်လက်ရာ။)
။အရွယ်ငယ်
ပိန်ညောင်ကိုင်း
ခါးကုန်းကိုင်း
ထူထိုင်းထိုင်းပါ။
။အူရိုင်းရိုင်း
မူကိုင်းကိုင်းလို့
ရိုင်းပျတတ်ပါ။
။ အထင်သေး
အမြင်သေးကြ
ခွေးကလေး
အနှိုင်းခံရ
ဝမ်းနည်းတတ်ပါ။
။ စော်ကားသူ
အများက
နည်းပေါင်းစုံ
ဆဲဆိုကြလည်း
မတုံ့ပြန်ပါ။
။ သည်းခံခြင်း
ချစ်မေတ္တာ
ရင်လွှာဝယ်အမြဲထား
ဘုရားသာသနာတွက်မို့
အမျိုးသားဘာသာတွက်မို့
အသက်ငယ်
အကိုင်းလေး
အရိုင်းလေး
ရိုင်းပျပါတယ်
ခုတော့ ……..။
အဲးခိုး
(၁၈.၃.၂၀၂၂) ရက်နေ့နံနက်။)
။ အသက်ရခြင်းအတူတူ ချမ်းသာခြင်းမတူနိုင်ပါ။
။ အသိရှိခြင်းအတူတူ အသိဉာဏ်ရခြင်းမတူနိုင်ပါ။
။ ပညာတတ်ခြင်းအတူတူ ပညာရခြင်းမတူနိုင်ပါ။
။ လာဘ်ရခြင်းအတူတူ လာဘ်ရမှုမတူနိုင်ပါ။
။ ချမ်းသာခြင်းအတူတူ ခြင်းသာရခြင်းမတူနိုင်ပါ။
။ မေတ္တာရခြင်းအတူတူ မေတ္တာခံယူခြင်းမတူနိုင်ပါ။
။ လှပခြင်းအတူတူ လှနေခြင်းမတူနိုင်ပါ။
။ မြတ်နိုးမှုအတူတူ မြတ်နိုးခြင်းမတူနိုင်ပါ။
။ ငြိမ်းချမ်းခြင်းအတူတူ ငြိမ်းအေးမှုမတူညီနိုင်ပါ။
။ သည်နေ့ အခက်အခဲခြင်းအတူတူ ခံစားရခြင်းမတူညီနိုင်ပါဆိုတဲ့တရားကို ဆင်ခြင်အောက်မေ့ပြီး နှလုံးသွင်းတတ်ပါစေ။
တောင်ကလေးဆရာတော်
(၁၈.၃.၂၀၂၂) ရက်နေ့နံနက်။)