Day: ဇွန် 10, 2024
။ အအိုတိုက် ။
![](https://mahar.asia/wp-content/uploads/2022/08/297060272_417848137042693_3522025147828185819_n.jpeg)
။ အသက်ကြီးရင့်
အိုစာပင့်လျှင်
အိုရင့်ရမှာ ဓမ္မတာ။
။ အသက်မရင့်
အိုလာဆင့်ကြောင့်
အိုရင့်တော့မှာ များမကြာ။
။ အသက်ရင့်ရင့်
အိုကြီးပင့်က
အိုရင့်ရမှာ သူသူငါ။
။ အအိုအအို
ဘယ်သူ့ကိုယ်မှ
မအိုရဘူး မရပါ
မနာရဘူး မရပါ
မသေရဘူး မရပါ။
။ သူသူငါငါ
အိုထဲပါရ
နာထဲပါရ
သေထဲပါရ
ခန္ဓာရသူ ဖြစ်ရမှာ။
။ အိုနာသေခြင်း
လွတ်ကင်းလိုက
ငြိမ်းသတ်တတ်စေ ကိလေသာ
ငြှိမ်းရပ်တတ်စေ ကိုယ်တဏှာ။
တောမှီရဟန်း
(၂၃.၅.၂၀၂၄) ရက်နေ့ ညချမ်းချိန်။
။ စိန်ရတုလွန်မြောက်ခြင်း ။
![](https://mahar.asia/wp-content/uploads/2024/06/FB_IMG_1717958239313.jpg)
~~~~~~~~~~~~~~~~~~
။ သည်ခေတ်မှာ
အသက်(၆၀) ကျော်ကြတဲ့သူတွေ
နေကြရတဲ့သူတွေ
နည်းလာနေကြသလားပါပဲ။
။ ၁၉၆၀ ပြည့်နှစ်
ဇူလိုင်လ(၁၄) ရက်နေ့
ညနေ(၅:၁၅) နာရီအချိန်မှာ
မွေးဖွားလာခဲ့လို့
၂၀၂၄ ခုနှစ်
ဇူလိုင်လ(၁၄) ရက်နေ့
ညနေ(၅:၁၅) နာရီအချိန်မှာ
သက်တော်(၆၄)နှစ်ပြည့်မယ်။
။ မကြာမီ
မွေးဖွားတဲ့ရက်
မွေးတဲ့နေ့ရောက်တော့မယ်။
။ အသက်(၆၀) ကျော်
ရှိလာတဲ့လူတစ်ယောက်ဟာ
လူငယ်လူရွယ်လိုတော့
သန်သန်မာမာမရှိတော့ပါဘူး။
။ ရုပ်ခန္ဓာကိုယ်တွေက
(အင်ဂျင်ပါဝါကျနေသလို)
အစစအရာရာ
အကုန်လုံးနီးပါး
ဆုတ်ရော့လာနေတယ်။
။ အသားအရေတွေ
အကြောအခြင်တွေ
အရိုးတွေ
သွေးတွေ
လေတွေ
ဆီးတွေဝမ်းတွေ
တစ်ကိုယ်လုံးနီးပါး
အသုံးပြုဖို့
အသုံးမတည့်တော့ဘဲ
သည်ခန္ဓာကိုယ်ကို
ထိန်းသိမ်းပြုပြင်
စောင့်ကြပ်နေရတာနဲ့ပဲ
အတော်လေးပင်ပန်းနေတာကို
သိသာလာရုံမက
ငယ်ငယ်က
စွဲစွဲမြဲမြဲ
စွဲလမ်းတပ်မက်နေခဲ့ကြတဲ့
အလွန်အမင်း
နှစ်သက်မြတ်နိုးတနာဖြစ်တဲ့
ခန္ဓာကိုယ်ရဲ့အလှအပတွေဟာ
စိတ်ပျက်စရာတွေဖြစ်လို့
ဝိပဿနာရှုဖို့တောင်မှ
အသုံးကျမှုနည်းနေတာကို
သတိထားမိလေပေါ့။
။ တစ်ခါတလေတော့
မပေါ့မပါးတွေဖြစ်
အပေါ့အပါးသွားနေတာတောင်မှ
ကိုယ်လက်လေးလံတွေဖြစ်လို့
ပြုပြီးကိစ္စကြီးငယ်တွေ
ဟိုမေ့သည်မေ့တွေဖြစ်ပြီး
ရုပ်ဖြစ်သလို
စိတ်ဖြစ်သလိုနဲ့ပဲ
ကျေနပ်ခဲ့ရတယ်။
။ ခါတိုင်းလို
စိတ်ဖြစ်တိုင်း
ရုပ်နိုင်ပြီး
ခုတော့
ရုပ်လည်းမနိုင်
စိတ်လည်းမိုင်မိုင်ပါပဲ။
။ ငယ်ရွယ်တုန်းကလိုမျိုး
စိတ်ဟာမခိုင်မြဲနိုင်ဘဲ
နာတတ်လာပြီးတော့
စိတ်ဓာတ်ကျတာတွေ
စိတ်အားငယ်တာတွေ
ဖြစ်တတ်သလိုပါပဲ။
။ အကြောင်းအရာ
တစ်မျိုးမျိုးနဲ့
တိုက်ဆိုင်မှုဖြစ်နေရင်
တွေးလို့, ခံစားလို့ကို
မဆုံးနိုင်ဘဲ ဖြစ်နေတယ်။
။ ဒါကြောင့်
အသက်ကြီးလာပြီးဆိုရင်
ရောဂါတွေများလာမယ်
ဝေဒနာတွေများလာမယ်
ရှုပ်ထွေးမှုတွေများလာမယ်
သံယောဇဉ်တွေများလာမယ်
အခက်အခဲတွေ များပြားလာမယ်
ကုန်ကုန်ပြောရရင်
ဒုက္ခသက်သက်ပါပဲ။
။ ငယ်ငယ်က
သင်ခဲ့တဲ့ပညာ
ရခဲ့တဲ့ဥစ္စာ
စုခဲ့တဲ့အရာရာတွေအားလုံးဟာ
စစ်မှန်တာတစ်ခုမှမဟုတ်ပါဘူး
ဆိုတာကို
သိမြင်နားလည်လာတယ်။
။ ပြောချင်တာကတော့
သင်အသက်(၆၀) ကျော်
နေခဲ့ရမယ်ဆိုရင်
ကုသိုလ်တစ်မျိုးလေးနဲ့
မပျော်မိပါစေနဲ့။
။ ဈာနင်တရား
မဂ်တရား
ဖိုလ်တရားတွေကို
သိမြင်နိုင်တဲ့
သမာဓိရှိအောင်
ဉာဏ်ရှိအောင်
နေတတ်ဖို့ပါပဲ။
။ ဒါကြောင့်
စိန်ရတုမွေးနေ့အလွန်
ဒုတိယစိန်ရတုမွေးနေ့ရဲ့
အကြိုကာလတစ်လျှောက်
တုတ်ကောက်တစ်ချောင်းတော့
အဖော်လေးပြုရတော့မည်လားပါပဲ။
တောမှီရဟန်း
(၆.၅.၂၀၂၄) ရက်နေ့။