ရိုက်နှက်စေတာထက် ခွင့်လွှတ်ပေးလိုက်တာက ပိုကောင်းတယ်။
ဖြစ်နိုင်မယ့် နိုင်ငံရေးစနစ်
တစ်ချိန်က အရှင်တို့တိုင်းပြည်မှာ အုပ်ချုပ်မင်းပြုတဲ့သူတွေရဲ့ နိုင်ငံရေးလမ်းစဉ် ဟာ VIOLENCE ရှိတယ်။ NON-VIOLENCE မရှိပါ။ အဲဒီလမ်းစဉ်နဲ့ လူတွေကို အုပ်ချုပ်မှ လက်နက်ချ အရှုံးပေးကြမယ်အထင်နဲ့ အကြမ်းဖက်မှုမျိုးစုံနဲ့ သုံးပြီး မြန်မာပြည် တစ်နံတစ်လျား တိုက်ပွဲတွေ ဆင်နွှဲကြတယ်။ သူတို့တွေ အောင်မြင်တယ်အထင်နဲ့ နေ့စဉ် အများ ဆင်းရဲမှုတွေ ပြုလုပ်ကြတယ် ဆိုတာကို မသုံးသပ်ဘဲ လက်ငင်း အောင်မြင်မှုတိုက်ပွဲ ဆိုပြီး ကြွေးကြော်မှု ပြုကြတယ်။
မိမိဂုဏ်သိက္ခာကို မထိန်းကျောင်းနိုင်တဲ့ အဲဒီအောင်မြင်မှုမျိုးကို လက်ရုံးအားကိုးတဲ့ သတ္တဝါတစ်ကောင်လို ဖြစ်နေတယ် ဆိုတာကို မသိလိုက်ဘူး။ နောက်ဆုံး ရေရှည်အကျိုးကို မခံစားလိုက်ရဘဲ ငုပ်လျှိုးသွားရတဲ့ နိုင်ငံရေးဖြစ်စဉ်တွေ မြန်မာပြည်မှာ အကြိမ်ကြိမ်အခါခါ ဖြစ်ပေါ်ခဲ့ဖူးတယ်။ ဘယ်နိုင်ငံရေးမဆို NON-VIOLENCE မရှိရင် မအောင်မြင်ပါဘူး။ နိုင်ငံရေးလမ်းစဉ်အားလုံးဟာ စောစောစီးစီး မချီးမွမ်းရပါ။ အချိန်စောင့်ဖို့ လိုတယ်။ အချိန် ကောင်းရတဲ့ နိုင်ငံရေးဟာ တန်ဖိုးရှိတယ်။ နိုင်ငံရေးလုပ်ရင် မိမိကိုယ်မိမိ သူရဲကောင်းတစ်ဦး လို မသတ်မှတ်ရပါ။ သတ္တိရှိသူ၊ ထက်မြက်သူ၊ သာလွန်သူတစ်ယောက်လိုသာ နေရမယ်။ ခွင့်လွှတ်ခြင်းတရားနဲ့ ပတ်သက်ရင် ဟန်ဆောင်မှု ကင်းကင်းနဲ့ ရှင်းရှင်းခွင့်လွှတ်ရမယ်။
အရှင်တို့တိုင်းပြည်ဟာ ကောင်းတာတွေ အမျိုးမျိုး လိုအပ်နေတယ်။ ရေရှည် တိုင်းပြည်အကျိုးကို မဖြစ်နိုင်တဲ့ အုပ်ချုပ်မှုစနစ်မျိုးနဲ့ သွားလို့ မဖြစ်ပါ။ ဆူလွယ်နပ်လွယ်တဲ့ ရက်တိုအကျိုးစီးပွားဟာ အလုပ်မဖြစ်နိုင်တဲ့ နိုင်ငံရေးစနစ်ပါ။ စုပေါင်းလုပ်လို့ရတဲ့ စိတ်နဲ့ ဒီတိုင်းပြည်ကို မတည်ဆောက်နိုင်ရင် အမှားအယွင်းတွေနဲ့၊ ဒဏ်ရာကြီးတွေနဲ့ ရှိနေမှာပါပဲ။ အချင်းချင်း အငြင်းပွားမှုရှိတဲ့နိုင်ငံရေးဟာ မေ့မရတဲ့ (မမေ့နိုင်တဲ့) သမိုင်းဆိုးတွေ၊ မှတ်တမ်း တွေ ရှိထားတယ်။ မြန်မာလူထုတစ်ရပ်လုံး အကျိုးစီးပွားဖြစ်မယ့် နိုင်ငံရေးမူဝါဒလမ်းစဉ်ကို ဖြစ်နိုင်မယ့် နိုင်ငံရေးစနစ်နဲ့ မုချ ချမှတ်ရမယ်။
ပြည်ထောင်စုတိုင်းပြည်တစ်ပြည်
အရှင်တို့ဟာ တိုင်းပြည်အကျိုးကို သက်သက်မျှ တာဝန်ယူရန် ဆန္ဒရှိကြတယ်။ နက်ရှိုင်းတဲ့ သတ္တိထူးတွေ အပြည့်အဝရှိတယ်။ ယုံကြည်မှု ခံယူချက်တွေ ထာဝရပါပဲ။ သို့သော် နိုင်ငံရေးအားနည်းတဲ့ မြန်မာတိုင်းပြည်ကို ပိုမိုကောင်းမွန်တဲ့ နိုင်ငံရေးမူဝါဒ မဖန်တီးနိုင်တာဟာ စာရွက်ပေါ်မှာ ကျင့်သုံးတဲ့ နိုင်ငံရေးမူဝါဒကြောင့်လို့ မြင်တယ်။ အရှင်တို့ရဲ့ နိုင်ငံရေးဟာ မြို့ကြီးတွေမှာ တည်ဆောက်ထားတဲ့ အဆောက်အအုံတွေ မဟုတ်ပါ။ တောရတွေမှာ တည်ဆောက်ထားတဲ့တဲ မဟုတ်ပါ။ လူတန်းစားမြင့်လာအောင် စုရုံးဖွဲ့စည်း ထားတဲ့ လူမှုအကျိုးပြုတဲ့ အဖွဲ့အစည်းမဟုတ်ပါ။ အရှင်တို့တိုင်းပြည်ဟာ ပြည်ထောင်စု တိုင်းပြည်တစ်ပြည်ပါ။ ပြည်ထောင်စုစနစ်၊ ပြည်ထောင်စုအသိ၊ ပြည်ထောင်စု လူမှုအဖွဲ့ အစည်းတွေ. ဖြစ်ပါတယ်။
ကျင့်ဝတ်ဝတ္တရားနဲ့ သက်ဆိုင်တဲ့ ပညာရပ်
များသောအားဖြင့် လူမှုအဖွဲ့အစည်းတွေဟာ နိုင်ငံ၊ လူမျိုး၊ ဘာသာ စတဲ့ သီးခြား ဖြစ်နေတဲ့ပုံစံနဲ့ ဖွဲ့စည်းစုစည်းထားကြတယ်။ သီးခြားစီ စုစည်းဖွဲ့စည်းတဲ့စနစ်ဟာ အတ္တ ဖက်တွယ်တဲ့ စနစ်မျိုးတွေပါ။ ဒီစနစ်မျိုးလို တည်ထောင်တဲ့တိုင်းပြည်ဟာ မကြာခဏဆိုသလို မကောင်းကျိုးများ၊ ခံစားတွေ့ကြုံနေရတယ်။ မနေမနားဘဲ ကွဲပျက်ကြတယ်။ အရှင်တို့ဟာ လူ့သမိုင်းကို တစ်လျှောက်လုံး လေ့လာရမယ်။ အဆက်မပြတ် ဖြစ်စဉ်ဖြစ်ရပ်များကို လေ့လာ ရမယ်။ လူတို့ရဲ့ သဘောသဘာဝအကြောင်းကို အကုန်အစင်မသိရင် “လူမှုဘဝနိုင်ငံရေး လမ်းစဉ်ကို သိနိုင်မှာ မဟုတ်ပါ။ နိုင်ငံရေးဆက်စပ်ပုံအမျိုးမျိုးကို သိလိုရင် လူမှုဘဝ ဖြစ်စဉ်ဖြစ်ရပ်ကို လေ့လာပါက မြင်နိုင်ပါတယ်။ လူတွေ ကြိုးစားအားထုတ်တဲ့ နိုင်ငံရေးဟာ လူမှုဘာသာရပ်ပညာရေးပါပဲ။ လူမှုဘာသာရပ်ပညာဟာ ကျင့်ဝတ်ဝတ္တရားနဲ့ သက်ဆိုင်တဲ့ ပညာရပ်ဖြစ်တယ်။
ဒါကြောင့် တိုင်းပြည်တစ်ပြည်မှာ
(၁) အချင်းချင်း ချစ်ဖွယ်စကား ပြောခြင်း၊
(၂) ပြန်လည်ပြင်ဆင် သုံးသပ်ခြင်း
(၃) နားလည်မှု ရှိခြင်း၊
(၄) အပေးအယူထားရှိခြင်း
ရှိမှပဲ နိုင်ငံနဲ့ ပြည်သူလူထု ကြီးပွားချမ်းသာတိုးတက်မယ်။
ဒုက္ခပေါင်းစုံရောက်ကြ
ကမ္ဘာပေါ်မှာ လက်နက်ဖျက်သိမ်းရေးကို ကြိုးစားကြပေမယ့် လျှော့ချကြရန် ဆန္ဒမရှိပါ။ လက်နက်အမျိုးမျိုးသာ တိုးတက်တီထွင်စမ်းသပ် ထုတ်လုပ်ကြတယ်။ ဒီပုံဒီနည်း အတိုင်းပဲ လူမှုဘာသာ နိုင်ငံရေးပညာရပ်များကို အကြမ်းဖက်မှုမရှိအောင် မတားဆီး မပိတ်ပင်နိုင်လေသမျှကာလပတ်လုံး နိုင်ငံရေးအုပ်ချုပ်မှုစနစ်ဟာ တာဝန်မကျေသော၊ အသက် ဘေးမကင်းသော နိုင်ငံရေးစနစ်ပဲ ရမယ်၊ ဖြစ်မယ်။ ယနေ့ လူ့ဘုံအလယ်မှာ ဘယ်နိုင်ငံရေး စနစ်က ကောင်းတယ်၊ ဆိုးတယ် ဆိုတာကို လူတွေက ရွေးချယ်နေကြတယ်။ ခေတ်အဆက် ဆက်က ဆင်းသက်လာတဲ့ နိုင်ငံရေးစနစ်ကို (မိမိတို့ကြိုက်နှစ်သက်တဲ့ နိုင်ငံရေးကို) မိမိတို့ တိုင်းပြည်နဲ့ လူမျိုးအတွက် ကာကွယ်ထိန်းသိမ်းစောင့်ရှောက်နိုင်ရန် သင်ယူမှတ်သားကြတယ်။ အချို့ နိုင်ငံရေးစနစ်ကြောင့် တိုင်းပြည်မှာ အဆိပ်အတောက်တွေဖြစ်ပြီး အမျိုးမျိုး ဒုက္ခရောက် ခဲ့ကြတယ်။ အချို့သော တိုင်းပြည်က ခေတ်ကာလအဆက်ဆက် မိဘဘိုးဘွားများ လက်ခံ အတည်ပြုထားတဲ့ ဘုရင်အုပ်စိုးတဲ့စနစ်နဲ့ နေကြတယ်။ ပုဂ္ဂိုလ်ကိုးကွယ်တဲ့စနစ်၊ အကြောက် တရား သက်သက် နေထိုင်ရတဲ့စနစ်၊ ကျွန်သားပမာ အလုပ်လုပ်ရသောစနစ်၊ လုပ်အားပေး ရသော စနစ်ပေါင်းစုံနဲ့ လူသားတွေရဲ့ စုရုံးစုဖွဲ့ အုပ်ချုပ်တဲ့စနစ်တွေအကြောင်းကို လူမှုဘဝ နိုင်ငံရေးသမိုင်းကို လေ့လာကြည့်မိသောအခါ လူတွေရဲ့ ပြင်းထန်တဲ့ ဒေါသအကြောင်းတွေ ကို စိတ်ပျက်ဖွယ်ရာများ မြင်တွေ့ရတယ်။ နေနိုင်တဲ့နည်းနဲ့ နေလို့ရတဲ့ လောကကို စုစည်း ဖွဲ့စည်းတဲ့စနစ်ကြောင့် ဒုက္ခတွေပေါင်းစုံ ရောက်ကြတယ်။
လူ့ဂုဏ်ရည်
လူတွေဟာ စားဝတ်နေရေးအတွက်နဲ့ ရုန်းကန်နေကြတယ်။စားဝတ်နေရေးကြောင့် ကိုယ်ကျိုးဖက်မှုတွေ ကြီးထွားတယ်။ ကြီးထွားတဲ့ကြီးပွားမှုဟာ အများအသုံးဝင်တဲ့ ကောင်း ကျိုး မဟုတ်လေတော့ ဖက်တွယ်သူကပဲ နိမ့်ကျသွားတယ်။ လူတွေဟာ နိမ့်ကျတဲ့အလုပ်ကို ဘာကြောင့် ပျော်ပျော်ကြီး လုပ်နိုင်ကြရတာလဲ။ အဲဒီအလုပ်ကို လုပ်လို့ ဂုဏ်ရည်ထူးတွေ အမျိုးမျိုး ရလာကြပါသလား။ လူ့ကျင့်ဝတ်နဲ့ ဆိုင်တဲ့ဂုဏ်ကို လက်လွတ်စပယ် လုပ်လာရင် အန္တရာယ်ကြီးမားပါသလား။ စဉ်းစားစေချင်ပါတယ်။ လူ့ဂုဏ်ရည်ဖြစ်တဲ့ မေတ္တာတရားနဲ့ လူမှုဘဝ လောကကို ဖွံ့ဖြိုးအောင် လုပ်ပေးနိုင်တဲ့ နိုင်ငံရေးရည်ရွယ်ချက်မျိုး မြန်မာပြည်မှာ မဖြစ်မနေ တည်ထောင်ပေးရမယ်။
အစစ်အမှန်အလုပ်
မြန်မာပြည် လူမှုရေးလောကကိုလည်း –
(၁) စိတ်စေတနာ ကောင်းခြင်း၊
(၂) လူကျင့်ဝတ် ထိန်းသိမ်းခြင်း၊
(၃) စိတ်စင်ကြယ်ခြင်း၊
(၄) အသိပညာ ဖွံ့ဖြိုးတိုးတက်ခြင်း
လေးမျိုးနဲ့ အလေ့အကျင့် ဓလေ့ထားပေးရမယ်။
လွယ်ကူသော လိုက်နာခြင်းမျိုး၊ ဒါမှမဟုတ် လွယ်ကူစွာ ကျင့်ကြံနိုင်သော အကျင့် သိက္ခာမျိုး စောင့်ထိန်းတတ်ရန် လူထုကို နိုင်ငံရေးလမ်းစဉ်ကောင်း ချမှတ်ပေးနိုင်ရမယ်။
အရှင်တို့တိုင်းပြည်ဟာ ပရိယာယ်ပါတဲ့နိုင်ငံရေးနဲ့ တည်ဆောက်ထားတဲ့ တိုင်းပြည်မဟုတ်ပါ။ ပရိယာယ်များတဲ့ခေါင်းဆောင်ကိုလည်း မယုံကြည်ပါ။ ထိမ်ဝှက်ထားတဲ့ နိုင်ငံရေး အကြောင်းအရာတွေကိုလည်း မယုံကြည်ပါ။ အလွန်ဆိုးရွားတဲ့သူကို နိုင်ငံ့ခေါင်းဆောင် မထားပါ။ အသိအမှတ်မပြုပါ။ မိုက်မဲတဲ့စိတ်ဓာတ်ရှိသူ၊ သို့မဟုတ် တိုင်းပြည်နဲ့ မတန်တဲ့သူကို ဘယ်တော့မှ အစိုးရ မဖြစ်ရပါ။ အဲဒီလိုမျိုးသာ အစိုးရဖြစ်လာခဲ့ရင် သူတို့ရဲ့ ပူးပေါင်း ဆောင်ရွက်မှုလုပ်ငန်းဟာ အရှင်တို့ရဲ့တရား ဖြစ်လာပြီ။ အဲဒီတရားကို မတရားခြင်းနဲ့ မဆန့်ကျင်ဘဲ တရားသဖြင့်နဲ့ ဆန့်ကျင်မှုများ လုပ်ရမယ်။ ညီညွတ်မှုအတွက် အသက်နဲ့ လဲရမယ်ဆိုရင်လည်း လဲရမှာပဲ။ အတွက်အားလုံးနဲ့ အမြင့်ဆုံးစွန့်လွှတ်ဖို့ မိမိမှာ အဆင်သင့် (အရန်သင့်) ဖြစ်အောင်နေရမယ်။ အသက်နဲ့ ပေးဆပ်ရခြင်းအလုပ်ဟာ အောင်မြင်ခြင်း အစစ်အမှန် အလုပ်ပါ။
ဒါကြောင့် အရှင်တို့ဟာ –
(၁) NON-VIOLENCE ကို သတိကြီးစွာ လက်ကိုင်ထားပြီး
(၂) NON-CO-OPERATION နဲ့ စောင့်ထိန်းမှု လုပ်ရမယ်။
အရှင်တို့ ခံယူချက်ကို အနိုင်ယူတဲ့သူများ သိဖို့ပဲ လိုပါတယ်။
ဒီနည်း ဒီပုံနဲ့ တိုင်းပြည်၊ လူမျိုး အများသူငါအကျိုးကို သယ်ပိုးဆောင်ရွက်ခွင့် ရတာကြောင့် အရှင်တို့အားလုံး ဝမ်းသာရမယ့်အတွက် အားလုံးနဲ့ အသက်ပေးစွန့်လွှတ်ခဲ့ ကြတဲ့ လူမှုဘဝနိုင်ငံရေးသမားတိုင်း ကောင်းရာဘုံဌာန ရှိရန်မလိုပါ။ ဆုတောင်းခြင်းနဲ့ အသက်ရှင်ခြင်းကိုလည်း မလိုပါ။ ပေးဆပ်မှုမဟုတ်တဲ့ စွန့်လွှတ် အနစ်နာခံမှုအတွက်နဲ့ ပေးခဲ့တဲ့အသက် ဖြစ်တာကြောင့် ကြီးကျယ်စွာ ချီးမွမ်းရန်လည်း မလိုပါ။ နောက်ဆုံး လူမှုဘဝ၊ လူမှုလောကအတွက်နဲ့သာ အသက်ကို စွန့်လွှတ်ပေးကမ်းရခြင်းဟာ လိုရာဆုထူး ရဖို့ပါပဲ။ မြင့်မြတ်သူတို့ရဲ့ တိုင်းပြည်၊ မြင့်မြတ်သူတို့ရဲ့ နှလုံးသား၊ မြင့်မြတ်သူတို့ရဲ့ရင်ခွင်ဟာ ဒီမြန်မာပြည်ပါပဲ ဆိုတာကို လူသားတိုင်း သိဖို့ကိုပဲ လိုချင်ပါတယ်။
အရှင်တို့ သိတဲ့ အသိဉာဏ်ဟာ လူတိုင်း ဆင်းရဲခြင်း လွတ်ကင်းဖို့အတွက်ပါ။ ဆင်းရဲခြင်းလွတ်ကင်းဖို့ မိမိကိုယ်မိမိ ပေးထားပါတယ်။ အရှင်တို့ရဲ့အသိဟာ မိမိကိုချစ်တဲ့သူနဲ့ မိမိကိုနစ်နာအောင် လုပ်တဲ့သူ၊ မိမိကို မကြိုက်တဲ့သူတွေ အားလုံးကို ခွဲခြားထားပြီး ဆောင် ရွက်လုပ်ကိုင်တဲ့နိုင်ငံရေး မဟုတ်ပါ။ တစ်လောကလုံးအတွက်ပါ။ အရှင်တို့ရဲ့နှလုံးသားဟာ သက်ရှိ၊ သက်မဲ့ ဖျက်ဆီးမှုနဲ့ ထိခိုက်နစ်နာမှု၊ ပြုမူမှုကို မလိုလားပါ။
အရှင်တို့ဟာ –
(၁) မကောင်းမှုကို ကောင်းမှုဖြင့်
(၂) နစ်နာမှုကို ချစ်ခင်ရင်းနှီးမှုဖြင့်
(၃) မုန်းတီးမှုကို ချစ်ခင်ကြင်နာမှုဖြင့်
(၄) ထိခိုက်နစ်နာမှုကို မေတ္တာထားမှုဖြင့် မြန်မာ့နိုင်ငံရေး အောင်မြင်မှု ကိုအန္တိမ အဖြစ် ထားရှိရန် ကြိုးစားအားထုတ်မယ်။
အရှင်တို့ရဲ့ မြန်မာ့နိုင်ငံရေးဟာ ဘယ်သတ္တဝါ အသက်ဇီဝကိုမှ နစ်နာထိခိုက်ဖျက်ဆီးမှု မရှိရပါ။ သူတော်ကောင်း အတွင်းစိတ်ဓာတ်နဲ့ မေတ္တာထားပြီး စစ်မှန်တဲ့ တိုင်းပြည်မြေနေရာပါ။
အရှင်တို့ရဲ့စိတ်ဟာ တိမ်းစောင်းမှု လွယ်ကူပါတယ်။ လှုပ်ရှားပြောင်းလဲမှု မြန်ဆန် တယ်။ ဒါပေမဲ့ မိမိရဲ့ရည်ရွယ်ချက်ကိုတော့ မြန်မြန်ဆန်ဆန် . လုပ်ရအောင်လုပ်ပါ။ မိမိ ရယူလိုတဲ့အရာကို ဖိနှိပ်ပြီး မရယူပါ။ မတိုက်ယူပါ။ မူဘောင်ထားပြီး ရယူမယ်။ အများ ဒုက္ခလွတ်ကင်းလိုတဲ့ ဆန္ဒတစ်ခုတည်းနဲ့ပဲ တောင်းဆိုမှုတွေကို လုပ်မယ်။ မရတာကိုလည်း မတောင်းပါ။ ဥပမာ ဥပဒေကို ပြင်ဆင်ပေးဖို့၊ အုပ်ချုပ်မှုစနစ်ကို ပြောင်းလဲပေးဖို့အတွက်ပဲ။ များသောအားဖြင့် လူတွေရဲ့ စိတ်ဓာတ်ဟာ မကျေနပ်မှုနောက်ကို အမြဲတမ်း ရောက်တယ်။ ကလဲ့စားချေမယ်။ မကောင်းမှုနဲ့ တုံ့ပြန်မယ်၊ ကျေမယ်၊ ချေမယ်။ အရှင်တို့ရဲ့စိတ်ဟာ တရားခံကို ကြိုးစင်တင် ကွပ်မျက်ဖို့မဟုတ်။ အယူခံဝင်ခွင့် ပေးထားတဲ့ စိတ်မျိုးပါ။
အရှင်တို့ဟာ –
(၁) စည်းလုံးညီညွတ်မှုအမှန်တရားနဲ့
(၂) အကြမ်းမဖက်မှုတရားကို နားလည်ကြသူတွေပါ။ အသိဉာဏ်နိုးကြားတဲ့သူတွေ ပါ။ ဘယ်သူမှ ဟန့်တားနှောင့်ယှက်လို့ မရတဲ့ အရှင်တို့ရဲ့ဆန္ဒကို လွယ်ကူစွာ နောက်ဆုတ် ခြင်း မရှိပါ။ အချည်းနှီးမထားပါ။ လဲရင်လည်း ပြန်ထမယ့်သူတွေပါ။ အရှင်တို့ရဲ့ကိုယ်၊ အရှင်တို့ရဲ့စိတ်ကို ဆင်းရဲခြင်းရောက်အောင် ပြုတဲ့သူကို မလွတ်တမ်း အာရုံထားမှာပါ။ ဒုက္ခဆင်းရဲခြင်းကို ရှုလို့ အရှင်တို့ ဒုက္ခမရ မဖြစ်ပါ။ အေးချမ်းမှုသုခကိုရဖို့ ဆင်းရဲခြင်း အာရုံကို ရှုထားပါ။ လူသားတစ်ရပ်လုံးအတွက် နိုးကြားတဲ့ စိတ်ဓာတ်ပါ။
– ကိုယ်ကျိုးမဖက် စေတနာအပြည့်ရှိတဲ့စိတ် – နိုးကြားတဲ့စိတ်
– မေတ္တာစိတ်များ
– တိုင်းပြည်လူမျိုးအပေါ်မှာ ထားနိုင်ကြပါစေ။
အရှင်တို့ရဲ့ တိုင်းပြည်ဟာ
ပရိယာယ်ပါတဲ့ နိုင်ငံရေးနဲ့ တည်ဆောက်ထားတဲ့ တိုင်းပြည် မဟုတ်ပါ။ပရိယာယ်များတဲ့ ခေါင်းဆောင်ကိုလည်း မယုံကြည်ပါ။
ထိမ်ဝှက်ထားတဲ့ နိုင်ငံရေးအကြောင်းအရာတွေကိုလည် မယုံကြည်ပါ။အလွန်ဆိုးဝါးတဲ့သူကို နိုင်ငံ့ခေါင်းဆောင် မထားပါ။
ကိုးကား။ တောမှီရဟန်း၏ “အဝိဟိံသာနိုင်ငံရေး (၂၀၁၆)၊ စာမျက်နှာ ၁၁၁-၁၁၆၊ အဝိဟိံသာနိုင်ငံရေး (၇)” မှကောက်နုတ်ရေးသားဖော်ပြခြင်းဖြစ်သည်။
