မဟာပညာUncategorized
။ မိမိအကြောင်းကို ပြန်စဉ်းစားပါ။
။ တစ်နေ့အတွက် ကောင်းတာတွေ ဘာတွေလုပ်ခဲ့သလဲ။
။ ကုသိုလ်အတွက် ဘာလုပ်ခဲ့လဲ။
။ မိသားစုအတွက် အချိန်များများ ပေးခဲ့ပါသလား။
။ မိမိအတွက် အရေးပါတဲ့အကြောင်းတရားက ဘာတွေပါလဲ။
။ သင့် မိသားစုထဲက သင့်အားမျက်ကွယ်ပြုထားပြီးသူ ရှိနေပြီလား။
။ နေ့တိုင်းလိုလို အလိုမကျဆုံးက ဘာတွေပါလဲ။
။ အဆင်သင့်အရံသင့် သင်လုပ်ထားရမှာက ဘာတွေပါလဲ။
တောင်ကလေးဆရာတော်
( ၂၉.၅.၂၀၂၂ ရက်နေ့နံနက်ခင်း)
။ အေဒီ ၁၉၈၇ ခုနှစ်၊ ဇွန်လအတွင်းက ဖြစ်ပါတယ်။
ကရင်ပြည်နယ်၊ လှိုင်းဘွဲမြို့နယ်၊ ကော့လုံကျွန်းထိပ်က သာသနာရေးကိစ္စ၊ ငြိမ်းချမ်းရေးကိစ္စအတွက် ဆောင်ရွက်ဖို့ သွားရောက်ခဲ့တဲ့ ခရီးက မှတ်တမ်းဓာတ်ပုံပါ။
အဲဒီတုန်းက ပင်ပန်းခဲ့တဲ့ ကိုယ်စိတ်တွေကို ပြန်စဉ်းမိတိုင်း ….။
တောမှီရဟန်း
၂၂ – ၅ – ၂၀၁၆
။ အေဒီနှစ် ၁၀၄၀ ခုနှစ်၊ တစ်ခေတ်တစ်ချိန်တစ်ခါက မြန်မာပြည်သည် ပါဒ( ပဒ) စေတီတော်ကိုးကွယ်ယုံကြည်မှုအရ စေတီလေးပါးတွင်ထိုက်သော ပါဒ( ပဒ) စေတီတော်ခေါ်( ဗုဒ္ဓခြေတော်ရာ) သည် မြန်မာပြည်အရပ်တွင် ရှိနေခဲ့ပြီးဖြစ်သည်ကို လေ့လာတွေ့ရှိရပါသည်။
။ ယင်းခေတ်ကာလမတိုင်မီကလည်း ပါဒ( ပဒ) စေတီတော်တည်ထားကိုးကွယ်မှုအရ အခြားသောနေရာဒေသအသီးသီးသို့လည်း ထုဆစ်ပူဇော်နေကြပြီလည်း လေ့လာတွေ့ရှိရပါသည်။
။ မြန်မာပြည်၊အိန္ဒိယပြည်၊ထိုင်း၊သီရိလင်္ကာ၊စသည့် ဗုဒ္ဓဘာသာထွန်းကားခဲ့ရာ အရပ်ဒေသအသီးသီးသို့လည်း ထုလုပ်ပူဇော်ခဲ့ကြကြောင်း တွေ့ရှိရသည်။
။ မြန်မာပြည်တွင်
၁) သဲကျောက်သား
၂) စကျင်ကျောက်သား
၃) ကြေးသားပေါ်တွင် ထုလုပ်ပူဇော်ခဲ့ကြသည်ကို တွေ့ရသည်။ အထူးသဖြင့် သဲကျောက်သားပေါ်တွင် မူလအစထုလုပ်ပူဇော်ကြသည်။
။ ယခု ဤခြေတော်ရာသည်
၁) သဲကျောက်သားဖြင့်ထုလုပ်ထားခြင်း၊
၂) အခန်း(၁၀) အဆင့်( ၉) ဆင့်ရှိခြင်း၊
၃) ဘယ်ခြေသန်းမှစ၍ လှံမအမှတ်အသားထားလျက် အစပြုပြီး (၁၀၈) ကွက်စက်တော်ရာပုံပြုခြင်း၊
၄) လက်ရာခန့်မှန်းချက်အရ ပုဂံခေတ်( ပုကံခေတ်) နှောင်းပိုင်းကာလဟုယူဆခြင်း၊
၅) မသမာသူများက ဖျက်ဆီးခြင်းခံရသည်။
၆) သုတေသနပြုလုပ်သင့်ဟု ယူဆသည်။
။ မည်သူမျှအလေးမထားကြတော့သော ပါဒ( ပဒ) စေတီတော်ကို သည်နေ့ သင့်တင့်လျှောက်ပတ်ရာပါဒပလ္လင်တော်မြတ်ထက်တွင် ကပ်လှူပူဇော်ပြုပေးလိုက်ပါပြီ။ သာသနာအတွက် အမှတ်တရနေ့ဖြစ်ပါသည်။
ရင်ကို အေးမြကြပါစေ
တောင်ကလေးဆရာတော်
(၂၂.၅.၂၀၂၂) ရက်နေ့နံနက်။
။ တစ်ခါတစ်ရံ
တွေးမိပြန်သည်
ဒဏ်ရာဒဏ်ချက်တွေ။
။ တစ်ခါတစ်ရံ
ဒေါသထန်သည်
စိတ်မာန်အမှားတွေ။
။ တစ်ခါတစ်ရံ
ခွင့်လွှတ်ပြန်ပြီး
သည်းခံစိတ်မြတ်တွေ။
။ တစ်ခါတစ်လေ
အူမြူးလေသည်
အရူးဖြစ်တာတွေ။
။ တစ်ခါတစ်လေ
မှုန်တွေဝေသည်
စိတ်ပေတေလေတွေ။
။ တစ်ခါတစ်လေ
စိတ်အေးနေသည်
ကျေနပ်နေတာတွေ။
။ သည်နေ့တော့
စိတ်အညစ်တွေ
မပေရေအောင်
အပူသူတွေ ကင်းကင်းနေ။
တောမှီရဟန်း
(၁၁.၅.၂၀၂၂) ရက်နေ့နံနက်။)
။ ဒီနေ့တော့
နေတစ်စင်း
လတစ်စင်း
ကြယ်ခပင်းတို့ရဲ့
ကမ္ဘာကိုဝိုင်းရံတဲ့နေ့ပါပဲ။
။ အမျိုးထဲက
တစ်ယောက်
သွေးစုထဲက
သွေးသောက်
မျိုးဆက်ထဲက
သူတစ်ယောက်
ထွန်းတောက်မည့်နေ
ထွန်းပေါက်ဝေမည့်ကြယ်ကလေး။
။ အပြာရောင်ကောင်းကင်ရဲ့
ချစ်စရာ့ကြယ်ကလေး
တစ်မိုးအောက်မှာ
မိုးသောက်ပန်းပမာ
ဒီနေ့တော့
မိသားစုရဲ့
ကြယ်ကလေးတစ်စင်း။
(မြေးကလေး နာကိုင်းကိုင်းသို့ )
တောင်ကလေးဆရာတော်
(၇.၅.၂၀၂၂) ရက်နေ့ညနေခင်း။
☘️မင်းလှကနေ ပြန်လာပြီးနောက် 🌿🌿🌿
။ 🌿မင်းလှမှာ အေဒီနှစ် ၁၉၈၀/၈၁ မှာ နေခဲ့တယ်။ အစက ပါဠိစာပေသင်ယူဖို့ မြောင်းမြမြို့၊ ပဇ္ဇောတာရုံပါဠိတက္ကသိုလ်မှာ ပါဠိဘာသာအထူးပြုသင်ယူဖို့ပါပဲ။ အဲဒီမှာ မရောက်ဖြစ်ဘဲ မင်းလှကိုရောက်ခဲ့တယ်။ မင်းလှဝေဠုဝန်စာသင်တိုက်မှာ တစ်နှစ်နီးပါး နေခဲ့တယ်။
။ 🌿အဲဒီတုန်းက စာသင်ပေးတဲ့ဆရာတော်က
၁) ဆရာတော် ဥူးကုဏ္ဍလ( ဘုန်းတော်လေး – အများဒါယကာအခေါ်)
၂) စာချဆရာတော် ဥူးပဏ္ဍဝံသ
၃) ဥူးကဝိနန္ဒ တို့ပါ။ အထူးသဖြင့် ဆရာတော်ဘုန်းတော်လေးက အဘိဓမ္မာဘာသာရပ်ကို သင်ပေးပါတယ်။ အခြားသောဘာသာရပ်တွေက စာချဆရာတော် ဥူးပဏ္ဍဝံသက သင်ပေးပါတယ်။
။ 🌿ဆရာတော်တို့ထံမှာ ပညာသင်ယူခွင့်အချိန်ကာလနည်းပါးကြပေမယ့် သင်ကြားလိုတဲ့ဘာသာရပ်တွေသင်ယူခဲ့ရလို့ပဲ ဝမ်းမြောက်မိပါလေရဲ့။ ဒီမှာမနေခင်က မန္တလေးစာသင်တိုက်ကြီးတွေမှာနေခဲ့ဖူးတော့ သင်ယူလိုတဲ့ဘာသာရပ်တွေ မစိမ်းပါဘူး။ ပျော်စရာပါပဲ။
။ 🌿တစ်ခါတစ်လေ ဆရာတော်နဲ့ဆွမ်းစားအတူကြွဖူးပါတယ်။ မြို့ထဲမှာပေါ့။ တစ်ချိန်မှာ ဆွမ်းစားအတူကြွလို့ ဆရာတော်က ဆွမ်းအနုမောဒနာပြုပေးဖို့ တရားချီးမြှင့်စေပါတယ်။ ဆရာတော့်ရှေ့မှောက်မှာပဲ တရားချီးမြှင့်ခဲ့ဖူးတယ်။ ကျောင်းရောက်တော့ ဆရာတော်က ” မဆိုးဘူး” လို့မိန့်ပါတယ်။ အားရှိသွားတာပေါ့။
။ 🌿အမှတ်ရစရာတစ်ခုက သက်ရွယ်ရလာကြတဲ့ဆရာတော်တို့ကို ကြည်ညိုရင်းစိတ်ရှိခဲ့တဲ့အတိုင်း ဆရာတော်တို့ခရီးသွားလာဖို့ အခက်အခဲမရှိအောင် မော်တော်ယာဉ်တစ်စီးလှူဒါန်းပေးခဲ့ဖူးပါတယ်။ အဲဒီတုန်းက ဆရာတော်ကြီးက တရားချီးမြှင့်ပေးဖို့ မိန့်ပါသေးတယ်။ အဲဒီမှာ တရားမချီးမြှင့်ရဲတော့ပါကြောင်း လျှောက်ကြားတော့ ဆရာတော်က ပြုံးပြပါလေရဲ့။
။ 🌿အသက်(၂၀) ရဟန်းငယ်ဘဝကနေခဲ့ဖူးတဲ့မင်းလှဝေဠုဝန်ကျောင်းဟာ ခုတော့ငယ်ကဆရာတော် လွန်တော်မူသွားပြန်တော့ မင်းလှကိုပြန်မရောက်ဖြစ်တော့မှာကိုလည်းစိုးရိမ်မိပါလေရဲ့။ ဒါပေမဲ့ မမေ့အပ်ရာတစ်ပါးထဲက မိမိပညာသင်ယူခဲ့ရာနေရာကို အသက်ဆုံးတိုင်မမေ့အပ်ဘူးလို့ ပညာရှင်တွေ ဆုံးမဩဝါဒရှိခဲ့လို့ မင်းလှမြို့နဲ့ဝေဠုဝန်ကျောင်းကို မမေ့ပါဘူး။
။ 🌿ဗုဒ္ဓဘာသာ၊ ဗုဒ္ဓသာသနာမှာ ဝေဠုဝန်ကျောင်းတော်ဟာ ပထမအဦးအစဝိဟာရကျောင်းဖြစ်ခဲ့လို့ အိန္ဒိယမှာရှိတဲ့ဝေဠုဝန်ကျောင်းကို မမေ့နေသလိုပဲ ပဲခူးတိုင်း၊မင်းလှမြို့မှာရှိတဲ့ ဝေဠုဝန်ကျောင်းကိုလည်း မမေ့ပါဘူး။ မမေ့နိုင်ပါဘူး။ ဘာကြောင့်လည်းဆိုရင် ဝေဠုဝန်ကျောင်းတွေဟာ ချမ်းချမ်းမြေ့မြေ့ ရှိနေကြလို့ပါပဲ။
။ 🌿ဒါကြောင့် ဒီနေ့တော့
၁) ပဲခူးတိုင်း၊ မင်းလှမြို့မှာရှိတဲ့ ဝေဠုဝန်ကျောင်းကိုအောက်မေ့နေရသလိုပဲ
၂) အိန္ဒိယမှာရှိတဲ့ ဝေဠုဝန်ကျောင်းမြတ်ကိုလည်း အောက်မေ့တသ သတိရနေမြဲပါပဲ။
☘️☘️ဝေဠုဝန်ကို မမေ့ဘူး။☘️☘️
တောမှီရဟန်း
(၅.၅.၂၀၂၂) ရက်နေ့နံနက်။)
။ ကံမကုန်သရွေ့
ဘယ်သူ့ကိုမှ
တစ်ယောက်နဲ့တစ်ယောက်
မေ့မသွားကြပါဘူး။
။ ကံကုန်သွားကြတော့
တစ်ယောက်နဲ့တစ်ယောက်
သူမေ့ကိုယ်မေ့ပါပဲ။
။ ကံမကုန်ခင်
အကုန်အကျများခဲ့ကြတဲ့
သံယောဇဉ်တွေ
သမုဒယကံအကြောင်းတွေ
အပ်ကြောင်းထပ်ခဲ့ကြပေါ့။
။ ခုတော့
မေ့နေကြ
မုန်းနေကြ
ရှုံးနေကြ
ရုန်းနေကြ
ရွာလည်နေကြ
ပုန်းနေကြပေါ့။
။ အခုတော့
ကံအကွဲ
ကံအမွဲ
ကံအလွဲ
သောက
ပရိဒေဝ
ဒုက္ခ
ဒေါမနဿ
ဥပါယာသတွေနဲ့ပဲ
ကြေကွဲနေရ ပြန်ပြီပေါ့။
တောမှီရဟန်း
(၂၈.၄.၂၀၂၂) ရက်နေ့နံနက်။)
။ ဘယ်အချိန်မှာ
နေဝင်ပါတယ်
ကိုယ်သာအသိဆုံးပါပဲ။
။ ဘယ်အချိန်မှာ
နေထွက်ပါတယ်
ကိုယ်သာအသိဆုံးပါပဲ။
။ ဘယ်အချိန်မှာ
နေသာပါတယ်
ကိုယ်သာအသိဆုံးပါပဲ။
။ ဘယ်အချိန်မှာ
နေမြင့်ပါတယ်
ကိုယ်သာအသိဆုံးပါပဲ။
။ ဘယ်အချိန်မှာ
နေတည့်ပါတယ်
ကိုယ်သာအသိဆုံးပါပဲ။
။ ဘယ်အချိန်မှာ
နေကွယ်ပါတယ်
ကိုယ်သာအသိဆုံးပါပဲ။
။ ဘယ်အချိန်မှာ
နေကျော်ပါတယ်
ကိုယ်သာအသိဆုံးပါပဲ။
။ ဘယ်အချိန်မှာ
နေပျော်ပါတယ်
ကိုယ်သာအသိဆုံးပါပဲ။
။ ဘယ်အချိန်မှာ
လမ်းဆုံးပါတယ်
ကိုယ်သာအသိဆုံးပါပဲ။
။ ဘယ်အချိန်မှာ
ခွဲခွာကြမယ်
ကြေကွဲကြမယ်
မုန်းပစ်ကြမယ်
ပူပန်ရမယ်
ဆင်းရဲရမယ်
ချမ်းသာရမယ်
နှုတ်ဆက်ကြမယ်
ကိုယ်သာအသိဆုံးပါပဲ။
တောမှီရဟန်း
(၂၃.၄.၂၀၂၂) ရက်နေ့ညနေချိန်။)
။ တောင့်တမှုဆိုတာ
တစ်ထပ်တည်းမဖြစ်နိုင်ပါဘူး။
။ ကြောင့်ကြမှုဆိုတာလည်း
လွယ်လွယ်နဲ့ မငြိမ်းနိုင်ပါဘူး။
။ လိုချင်မှုဆိုတာလည်း
တစ်ထပ်တစ်သားတည်းဖြစ်ဖို့
မလွယ်ကူပါဘူး။
။ တောင့်တမှုများလာရင်
လူဟာ ကြောင့်ကြမှုတွေ
များလာမှာပါပဲ။
ပူမှုတွေ များလာမှာပါပဲ။
။ အဆုံးမသတ်နိုင်တဲ့ဘဝကို
ကြောက်စရာပါဆိုတာကို
မသိနိုင်လေသမျှ
မိုက်နေကြဦးမှာပါပဲ။
။ ဘဝကိုတောင်းတမိရင်
တောင်းတတဲ့အတိုင်း
တောင်းတလို့ကုန်နိုင်မှာ
မဟုတ်ပါဘူး။
။ ဘဝကြောင့်
တပ်မက်မှုတဏှာများခဲ့ရင်
တဏှာစေရာအတိုင်းပါပဲ။
။ တဏှာရဲ့တောင့်တချက်ကို
မကျေနပ်နိုင်ရင်
မကျေနပ်တဲ့အတိုင်းလို
ခံစားရမှာပါပဲ။
။ တဏှာက
မိမိကိုခြယ်လှယ်နေသလောက်
စိတ်မကုန်သေးရင်
စိတ်မကုန်တဲ့အတိုင်း
ဆင်းရဲနေကြရဦးမှာပါပဲ။
။ လူဘဝမှာ
ဆာလောင်တာကို
မထိန်းသိမ်းနိုင်ရင်
မထိန်းတဲ့အတိုင်း
တဏှာဘက်ကို
ယိမ်းယိုင်နေမှာပါပဲ။
။ ရှံစရာအရာကို ( ရွံစရာ)
တပ်မက်နေရင်
တပ်မက်တဲ့အတိုင်းကို
ခံနေရမှာပါပဲ။
။ အနှစ်သာရရှိတဲ့တရားသားကို
အားကိုးအားထားရင်
ကိုယ်စိတ်အေးရမှာပါပဲ။
။ တရားအသား
ရင်ထဲခါးရင်
တိုးပွားချမ်းသာမှု မဲ့နေမှာပါပဲ။
။ တရားအဆီ
မနောကြည်ကို
နားမလည်ရင်
သံသရာရှည်ကြာနေဦးမှာပါပဲ။
(သည်နေ့တော့ ဤရွေ့ဤမျှသာပါပဲ)
တောင်ကလေးဆရာတော်
(၂၁.၄.၂၀၂၂) ရက်နေ့ညနေချိန်။)
။ မြန်မာလအစ ပထမလဟာ တန်ခူးလပါ။ တန်ခူးလကို သင်္ကြန်ပွဲတော်ကျင်းပကြသောလဖြစ်ပါတယ်။တန်ခူးလဟာ နွေဥတုမှာပါဝင်ပါတယ်။ ရက်မစုံသတ်သောလဖြစ်ပါတယ်။နွေလဖြစ်၍ပူပြင်းပါတယ်။မိုးနည်းရေရှားပါးသောဒေသတွေမှာ ရေတွင်း၊ရေကန်တွေ ရေဆုတ်နေပြီး ” တန်ခူးရေကုန် ကဆုန်ရေခမ်း” ဆိုပြီးတော့ ဆိုစမှတ်ပြုကြပါတယ်။
။ ” ရွှေတန်ခူး လေရူးဆော်တော့” ဆိုတဲ့စကားအတ်ုင်း၊တန်ခူးလမှာ လေရူးကလေးတွေ မူးမူးမိုက်မိုက်တိုက်ခိုက်နေပါတယ်။သစ်ရွက်တွေမှာ ပူပြင်းတဲ့နေအရှိန်တွေကြောင့် မြစိမ်းအရောင်မှ ရွှေဝါအရောင်သို့ ပြောင်းလဲသောလပါပဲ။ ကြည်နူးဖွယ်၊လွမ်းဆွတ်ဖွယ်သဘာဝအခြေအနေရှိတဲ့လလည်းဖြစ်တာကြောင့် ကောင်းကင်ပြင်မှာ မိုးသားတိမ်တိုက်တွေ မကန်းကြားကွက်လိုပဲ ပြန့်ကျဲနေပါတယ်။
။ မိုးလည်းရွာသွန်းတော့မယ်ဟန်နဲ့ ပြင်ဆင်နေတဲ့လပါပဲ။နေမင်းဟာ အပြင်လမ်းကိုစွန့်ပြီး အလယ်လမ်းခရီးကို ကူးပြောင်းလို့ ကွန့်မြူးထွန်းပနေတဲ့လပါပဲ။
။ အကိုင်းအညှောက် အဖူးအညွှန့်တွေနဲ့ စီရရီထွက်ပြူဖူးသစ်လျက်ရှိတဲ့ ချီချီကြွကြွဖူးပွင့်နေကြတဲ့ ငွေအဆင်းဆောင်တဲ့ကံ့ကော်ပင်မင်းတွေလည်း လေယူရာယိမ်းညွတ်ယိမ်းယိုင်ကိုင်းနေလျက်ပါပဲ။
။ ကြည်လင်တဲ့ရေအလျဉ်၊နှစ်သက်ဖွယ်တသွင်သွင်စီးဆင်းနေတဲ့ မြစ်ကမ်းသဲသောင်စပ်မှာ ကျေးငှက်အပေါင်းတွေဟာလည်း အတောင်တွေဖြန့်ကာဝဲကာနဲ့ ဖိုမယှဉ်တွဲ ချစ်တင်းနွှဲကြလို့ပါပဲ။
။ ဒါကြောင့် ဤတန်ခူးလကို စိတြနက္ခတ်ထွန်းပတဲ့လဖြစ်လို့ပဲ မြန်မာတွေက အတာနှစ်သစ်ကူးလအဖြစ်သတ်မှတ်လာခဲ့ကြပါတယ်။ စာဆိုရှင် ဦးကြင်ဥက
” ဖြေမနိုင် ရင်ဆိုင်ဝဲသို့၊ မှိုင်ပွဲတဲ့သစ်စေ၊ မုတ်ကွန်းဆောင်ပျံနှင့်၊ခြင်္သေ့ခံမှန်ပြတင်းမှာမှ သွင်းတဲ့လေပြည်၊ မျိုလို့သာ ခဲ့ရတယ်၊ သဲနောက်ကျဗျာပွေ ကြေကြေဘွယ့်ဘနန်း၊ နှင်းသတ်အထုံ ဝရတ်ကယ်သဉ္စာဘုံက ထည်ကောဋုံခြုံထွေးသော်လည်း၊ မလုံမခြုံသေးသူတို့၊ ဆွေးဖို့စတမ်း” လို့ဆိုပြီး စာသဘင်ခင်းပြခဲ့တယ်။
။ အဘိဓာန်ကျမ်းအရ
တန်ခူး = ထန်းဆွတ်သည်၊ ထန်းသီးဆွတ်သည်၊ထန်းဆွတ်လ၊ထန်းသီးဆွတ်လ၊ မြန်မာ့တစ်ဆယ့်နှစ်လတို့တွင် ပထမလ၊ မိဿရာသီ လို့ဖွင့်ဆိုထားပါတယ်။
။ တန်းခူးလ မြန်မာ့ယဉ်ကျေးမှုအရ
၁) မိဘကိုကန်တော့ကြခြင်း၊
၂) ရေကုသိုလ်ပြုကြခြင်း၊
၃) ငါးသတ္တဝါများကို ဇီဝိတဒါနပြုကြခြင်း၊
၄) ဘဘိုးဘေးတို့ကို လှူဖွယ်များပေးကမ်းကြခြင်းတို့ ဖြစ်ပါတယ်။
တောင်ကလေးဆရာတော်
(၁၂.၄.၂၀၂၂) ရက်နေ့ညနေခင်း။)