Category: စကားလက်ဆောင်

(၁၉.၁၀.၂၀၂၂) ရက်နေ့။

 1,858 total views

၁) အာဇီဝ ပြဿနာ= အသက်မွေးဝမ်းကျောင်းဆိုင်ရာနဲ့ပတ်သက်တဲ့ပြဿနာ။

၂) အသိလောက ပြဿနာ= ကဲ့ရဲ့ပြစ်တင်ခံကြရတဲ့ပြဿနာ။

၃) ပရိသသာရဇ္ဇပြဿနာ= ပရိသတ်တွေကြားမှာ လူရာဝင်အောင်နေထိုင်တတ်ရတဲ့ပြဿနာ။

၄) မရဏ ပြဿနာ=ငြိမ်သက်စွာဘဝရဲ့အဆုံးကိုရင်ဆိုင်နိုင်ဖို့ပြဿနာ။

၅) ဒုဂ္ဂတိပြဿနာ= မိမိဘဝကိုအဆုံးသတ်ပြီးလို့ နောက်ထပ်ဖြစ်လာနိုင်မယ့်ဘဝနဲ့ဆိုင်တဲ့ပြဿနာ။

။ ဒီပြဿနာငါးပါး (၅ မျိုး) ကို —

၁) ပညာစွမ်းအား (ပညာဗလ)။
၂) ကြိုးစားမှု စွမ်းအား (ဝီရိယဗလ)။
၃) ဖြူစင်ရိုးသားမှု စွမ်းအား (အနဝဇ္ဇဗလ )။
၄) စည်းရုံးရေး စွမ်းအား (သင်္ဂါဟကဗလ)။ လေးပါးနဲ့ ချင့်ချိန်တတ်ပြီး နေထိုင်တတ်ရပါတယ် မဟုတ်လား။

။ အဲဒီလိုမှ မသိထားမိရင် သီတင်းကျွတ်ပေါင်းများနေပြီလို့ပဲမဟုတ်လား။ ကျွတ်တမ်းဝင်ထိုက်ပါလျက်နဲ့ အကျွတ်တရားမရကြတဲ့အရှင်တို့တွေဟာ ဘာနဲ့မှကျွတ်ကြ (မလဲ) မည်လည်းပါပဲ။

တောင်ကလေးဆရာတော်
(၁၄.၁၀.၂၀၂၂) ရက်နေ့ညနေခင်း။

 2,370 total views

။ မမြင်ရတာကို ယုံ
မြင်ရတာကို မယုံ,မသိ,နားမလည်
ကိုယ်တွေ့ဖြစ် ယုံ
ကိုယ်တွေ့မဖြစ်ရင် မယုံ
မသိရင် မယုံတာ ပြဿနာမရှိ
မသိဘဲယုံတာက
ဘယ်လိုပါလဲ?။

။ ဒါပေမဲ့
လူတွေဟာ
မသိမမြင်ကြရတာကိုပဲ
ယုံနေကြတယ်မဟုတ်လား!
အဲဒါကို သဘောပေါက်။

အဲးခိုး
(၂၈.၉.၂၀၂၂) ရက်နေ့။

 2,740 total views,  1 views today

။ မိုးရိပ်တိမ်
မိုးတိတ်တိမ်
ကောင်းကင်တိမ်သားနဲ့တော့
မတူပါဘူး။

။ အရိပ်ကနေပြီး
တိမ်စွဲသွားတဲ့အချိန်ကို
ငြိမ်ပြီးကြည့်မိလိုက်တဲ့အခါ
လေပေါ်မှာမြင်ရတဲ့တိမ်
မိုးပေါ်မှာ မြင်ရတဲ့မိုးတိမ်တွေ
တိမ်ခြေ
တိမ်ခြည်
တိမ်လွှာ
တိမ်လိပ်
တိမ်ခိုးတွေကြား
ရွှေတိန်ညင်းငှက်ငယ်လေးက
တိမ်းညွတ်ညွတ်
လှပပ ပါပဲ။

။ သည်နေ့
တိမ်ရယ်
မိုးရယ်
လေရယ်
ငှက်ငယ်ရယ်
လိုက်ဖက်ပါပေတယ်။

။ နောက်တစ်နေ့
တိမ်လွှာကို
စောင့်ကြည့်ပါဦးမယ်။

ဘုန်းသစ်ထူး
(၂၆.၉.၂၀၂၂) ရက်နေ့ညနေချိန်။

 2,515 total views,  1 views today

။ အပေါင်းအဖော်
တစ်ခဏဖြစ်ရတာလည်း
ကျေနပ်တယ်။

။ မိတ်ဖြစ်ဆွေဖြစ်
တစ်ခဏဖြစ်ရတာလည်း
ကျေနပ်တယ်။

။ တစ်ခဏတာ
ဆုံဆည်းရတာလည်း
ကျေနပ်တယ်။

။ တစ်စက္ကန့်လေးသာ
ချစ်ကြရတာလည်း
ကျေနပ်တယ်။

။ တစ်သက်မှာ
တစ်ခဏလေးသာ
အားကိုးရတာလည်း
ကျေနပ်တယ်။

။ အခေါ်အပြော
မရှိကြတော့ပေမယ့်
ကျေနပ်တယ်။

။ မုန်းသွားလို့
မမြင်ချင်ကြတော့ပေမယ့်လည်း
ကျေနပ်တယ်။

။ စိတ်ဆိုးလို့
တသက်သက်လုံး
ပစ်ထားရက်ပေမယ့်လည်း
ကျေနပ်တယ်။

။ အကျည်းတန်
အကျဉ်းတန်
အမျိုးမျိုးလုပ်သွားခဲ့ပေမယ့်လည်း
ကျေနပ်တယ်။

။ နောက်ပိတ်ဆုံး
ဒီအသက်ပါ
ကွပ်မျက်သွားပေမယ့်လည်း
ကျေနပ်ပါတယ်လို့ပဲ ……။

ဘုန်းသစ်ထူး
(၂၂.၉.၂၀၂၂) ရက်နေ့။

 2,259 total views

။ ဆံရစ်ဝိုင်း
ဝိုင်းချစ်ဝိုင်း
ဝိုင်းစက်ဝိုင်းတဲ့
အရိုင်းပန်းလေးတစ်ပွင့်။

။ လမင်းတို့ရဲ့ကြယ်လေး
ကြယ်လေးတို့ရဲ့လမင်း
ကမ္ဘာမှာ
ကြယ်နဲ့လမင်း။

။ မေမေက ကြယ်စင်
ဖေဖေက လမင်း
သားသားက မြေပြင်ပန်းခင်း။

။ ဖေဖေအား
သားအတွက် အားအင်
မေမေအား
သားအတွက် ဂန္ထဝင်
သားရွှေစင်ဖြစ်ရမယ်တဲ့
ကြည်နူးခဲ့ မေမေ့ဘဝင်
​အေးမြတဲ့ ဖေဖေ့ဘဝင်။

။ မေတ္တာရေစင်
ချိုမြအေးကြည်
မိခင်ဖခင်
ကျေးဇူးဂုဏ်အင်ကို
ကြည်လင်အေးအေး
လမင်းလေးလို
ဖြူစင်ဖွေးဖွေး
ကြယ်စင်လေးလို
လေးမြတ်ပူဇေ
ဦးတင်လေ၏
ကြယ်တွေလတွေ သာပါစေ
လတွေကြယ်တွေ ဖြာပါစေ။

။ တမ်းတမ်းတတ
သတိရသည်
လမင်းကြယ်စင် မေမေသို့
ကြယ်စင်လမင်း ဖေဖေသို့
မေမေအချစ် မမေ့ဘူး
ဖေဖေအချစ် မမေ့ဘူး
နေ့စဉ်မပြတ် ဦးတော်ဖူး။

ဘုန်းထူးသစ်
(၁၄.၉.၂၀၂၂) ရက်နေ့ညနေခင်းချိန်။

 1,202 total views

။ မိသားစုတစ်စုဖြစ်လာရင်
ယုံကြည်မှုအားနဲ့
တည်ဆောက်ထားကြတယ်။

။ မေတ္တာတရားနဲ့
သစ္စာတရားတည်ထားကြတယ်။

။ ဒီတရားနှစ်ပါးထဲက
တစ်ပါးပါးအားလျော့လာရင်
မိသားစုဟာ
မိလည်းတစ်ခြား
သားတစ်ခြားဖြစ်ကြပြီး
တစ်သားတစ်စုတည်းက
တစ်မိတစ်စုတည်းကနေ
ကွဲပြားနေကြပြီးတော့
ကြေကွဲရာအဖြစ်
ဖြစ်သွားကြတဲ့မိသားစုတွေ
အများကြီးပါပဲ။

။ အခြေခံမခိုင်တာရယ်
အမျိုးမျိုးဉာဏ်ပညာရယ်
နည်းစနစ်ရယ်
နည်းပညာရယ်
နည်းပြဆရာရယ်
အစစအရာရာတွေရယ်
မပြည့်စုံမကုန်လုံလို့ရယ်ကြောင့်
မိသားစုကောင်းဘဝနဲ့
မတည်ဆောက်နိုင်ကြဘဲ
ကြွေရက်တွေစောကြရဲ့
ဘဝရှင်တွေ
များနေကြသလားပါပဲ။

။ ရှိသမျှနဲ့
ဖြစ်သမျှဖြစ်ကြရတဲ့
အဖြစ်ပုံ
အပန်းပုံတွေက
ပန်းမစုံတဲ့ည
အကြမ်းပုံတဲ့ဘဝနှယ်
လောကအလယ်မှာ
ကြယ်မသန်းတဲ့
ညတစ်ညပမာလို
ဒီအဖြစ်ရသူတိုင်း
ရင်တမမ
နှလုံးမလှမပ
အလှမဲ့ဘဝလေးနဲ့
ဝေးခဲ့ကြရတဲ့မိသားစုတွေ
လောကမှာ
မရှားပါဘူးလေ။

။ အထင်နဲ့အမြင်
အကြင်နဲ့အခင်
လွှင့်ပျောက်နေကြတဲ့
လူတို့သရုပ်ကွဲတွေဟာ
မရဲဘဝ
အမွဲဆေးဖော်ရတဲ့
သူတို့ရဲ့မိသားစုအကြောင်းကို
ဆုတောင်းခါခါပြုပေးနေလည်း
မေတ္တာခါခါ ပို့ပေးနေလည်း
တိမ်ကွယ်လည
ပမာလားပေါ့
​ညှိုးနွမ်းလို့
ညှိုးငယ်ကြရသူတွေလေ။

။ ဘဝမှာ
တစ်ခါသာလူလာဖြစ်ရင်
တစ်ခါသာခန္ဓာရရင်
တစ်ကြိမ်သာမဂ်ပညာရရင်
ဝမ်းသာပါပြီဆိုတာ
သူတို့တွေ မသိလိုက်ကြဘူး။

။ သည်နေ့တော့
ကိုယ့်ရဲ့မိသားစုအကြောင်းကို
တွေးနေရင်းနဲ့
အတိတ်ကာလက
အကုသိုလ်ကို
အပြစ်မဆိုတော့ပါဘူး
ပစ္စက္ခဘဝရဲ့
အကုသိုလ်ကံသည်ကိုသာ
အပြစ်မဖြစ်အောင်
ဆင်ခြင်အောက်မေ့
နေပါတော့မယ်
သည်နေ့
ကျွန်ုပ်ရဲ့နှလုံးအိမ်နေ့ပါပဲ။

။ တစ်နေကွယ်
တစ်နေနယ်ကို
မရောက်ချိန်မှာ
တစ်နေရာမှာ
သင့်သာတရားရှိပါစေ။

( အားဆေးပေးပါသည်။)
ဘုန်းသစ်ထူး ( ဘားအံ )
( ၂၄.၈.၂၀၂၂) ရက်နေ့ ညချမ်းချိန်။)

 2,427 total views

။နေရတဲ့အချိန်က
တဖြေးဖြေးပဲ နည်းလာတော့
စိတ်ထဲက အလိုလိုနဲ့ပဲ
ပိုပိုပြီးလေးနက်လာတယ်။

။ နေတာထိုင်တာ
သွားတာလာတာ
စားတာအိပ်တာကအစ
အစစအရာရာပြုပြင်လာခဲ့မိတယ်။

။ အလိုလိုနဲ့
ပြောင်းလဲပြုပြင်လာခဲ့လို့
ထူးဆန်းနေသလိုပါပဲ။

။ တန်ဖိုးရှိတဲ့အချိန်ကို
ပိုလိုချင်လာနေသလို
တန်ဖိုးဖြတ်လို့မရတဲ့
အပြစ်ကင်းတဲ့
အကျင့်သီလတွေကိုလည်း
ပိုလေးနက်စွာနဲ့ဆောက်တည်နေမိတယ်။

။ သီလတစ်ပါးပါးပျက်မိမှာကို
အလေးထားမိတော့
ပျက်မိရမယ့်သီလတစ်ပါးပါးကိုလည်း
မပျက်အောင်
တည်ငြိမ်စွာနေတတ်လာတယ်။

။ အနီးအနားပတ်ဝန်းကျင်ရဲ့
စွဲမက်စွဲကပ်နေတဲ့
ကိလေသာပြယုဂ်တွေ
မြင်မိလေတိုင်း
မှားမိခဲ့တဲ့အဖြစ်တွေကို
ပြန်ပြီးဆင်ခြင်မိပါတယ်။

။ အမှားကြီးအမှားငယ်ဆိုတဲ့
အမှားတွေကြောင့်
ပြန်ဆင်ခြင်မိရင်
စိတ်ဟာအလိုလိုနဲ့
တုန်လှုပ်ချောက်ချားမိတာအမှန်ပါပဲ။

။ တုန်လှုပ်ချောက်ချားရတဲ့
အဖြစ်ကြောင့်
လူဟာ
အလိုလိုပဲစိတ်ဓာတ်တွေ
ညှိုးကျမိပါလေရဲ့။

။ ပျော်ရွှင်မြူးထူးမှုတွေ
နည်းပါးကြပြီး
လူအများကြားကို
မဝင်ချင်မတိုးချင်တော့ဘဲ
တစ်ကိုယ်တည်း
ချမ်းသာမှုကို
ပိုလိုလားနှစ်သက်လာပါတယ်။

။ အဲဒီလို
လိုလားနှစ်သက်လာရင်
လူဟာအလိုလိုပဲ
အဖော်အဖက်တွေနဲ့
ဝေးကွာချင်လာကြတယ်။

။ အဖော်မဲ့ဘဝကို
လိုချင်လာတဲ့စိတ်ဟာ
ပြင်ယူဆင်ယူတာမဟုတ်ဘဲ
အဖော်အဖက်နဲ့
ပိုဝေးဝေးနေရတာကိုပဲ
နှစ်သက်နေမိကြတယ်။
ဒါဟာ လူ့ရဲ့သဘာဝပါပဲ။

။ ဒါကြောင့်
မိမိကို အဖော်မဲ့စွာ
တစ်ဦးတစ်ယောက်တည်း
ထားခဲ့ပေမည့်
ဝမ်းနည်းစွာဖြစ်ဖို့မလို့ပါဘူး။

။ ဝမ်းနည်းခြင်း( ဝမ်းနည်းမှု) ဆိုတာ
အပူမီးတစ်ပါးပါပဲ။

။ ဒီအပူမီးကို
ကိုယ်ကိုယ်တိုင်ပဲ
ငြိမ်းရမယ်မဟုတ်လား။

။ မငြိမ်းနိုင်ရင်
ကိုယ်ပဲပူလောင်နေမယ်။

။ ပူလောင်မြိုက်ခံရရင်
ကိုယ်ပဲနာကြည်းမှုတွေခံရမယ်
မဟုတ်လား။

။ ဒီနေ့
ပြောပြချင်တဲ့စကားက
အခြားမဟုတ်ပါဘူး။

။ ဘယ်နေ့မှာ
သင့်အတွက်
အကောင်းဆုံးဖြစ်နိုင်မည်လဲ။

။ သင့်အတွက်ရဲ့
အကောင်းဆုံးနေ့ရက်က
ရထားပါပြီလား?
ရှိနေပါပြီလား? ။

တောမှီရဟန်း
(၁၆.၈.၂၀၂၂) ရက်နေ့နံနက်ခင်း။)

 1,538 total views

။ သည်နေ့
စိတ်ထဲမှ
သည်စကား ပြောဖြစ်ကြမယ်။

။ သူသူငါငါ
ကျန်းမာကြလား
ဆင်ပြေကြလား
နှုတ်ဖျားမလွတ် မေးကြမယ်။

။ ကျန်းမာကြသူ
ပြေကြသူတွေ
မဟုတ်လေလည်း
သလိုနဲ့သာ ဖြေကြမယ်။

။ ရင်မှမအေး
မျိုးစုံတွေးတော့
ရင်လေးစုံစွာ
ဖြစ်ပုံများပေါ့
ဗျာပါဒဆက် မျိုးစုံစွာ။

။ ဘဝအရေး
ဘေးဖယ်ပြေးလွှား
ကြိုးစားလှုပ်ရှား
မနေနားလည်း
အားနည်းရုပ်နွမ်း မကြည်လန်း။

။ အိုခန်းဖြစ်လာ
ရုပ်ကြည်လွှာမဲ့
အနာနဲ့ဆက် မခိုင်မာ။

။ စိတ်လည်းမခန့်
လူအလန့်ဖြစ်
သန့်သန့်သန်သန်
ပင်ကိုဟန်ကွယ်
သေရုပ်နယ်ဆင်း
အိုမင်းထင်လာ နေပြန်တော့။

။ အရာရာခမ်း
ဇရာဖမ်းတော့
ကုန်ခန်းအားအင်
ဘုံလမ်းပြင်သည်
ရုပ်ရှင်သရုပ်
သည်ဇာတ်ထုပ်ကို
မွေးထုတ်ကြသူ သိလေပေါ့။

။ ခုတော့
မေ့ပေါ့သတိ
သမာဓိမဲ့
နတ္ထိပညာ
လွန်ဝေးကွာပြီ
သင်သာဆရာဖြစ်ပါစေ
သင်သာ မနာသစ်ပါစေ။
(မနာ သို့မဟုတ် မန ” စိတ်” ဟု အဓိပ္ပာယ်ကောက်ပါ။)

တောင်ကလေးဆရာတော်
(၇.၈.၂၀၂၂) ရက်နေ့နံနက်ခင်း။)

 124 total views